أرجوكم علموني الطبخ

*ام رامي* · 2012-03-16, 18:47

اقتباس:

المشاركة الأصلية كتبت بواسطة dalel16

كيفك أم رامي ن شاء الله تكوني بالف خيريا رب

يارب يحفظلك رامي ويجعله ولد صال ومطيع آمين يارب العالمين

سامحيني النات مراهيش مليحة معايا

حبيت نسقسيك

نصف حبة بصل يقابله 2 لتر ماء ويوكلو 4 أشخاص ؟؟؟؟؟؟؟؟؟؟ لجميع المرق الي فيها الخضار وماتشربش الماء؟؟؟؟؟؟؟؟؟؟؟؟؟؟؟

احنا في الدار منحبوش بزاف الحمص نحن نديروه برك برك بنة وتشباح نشبحو بيه الكسكس و الشخشوخة ووو

اما البطاطا محشية عجبتني بزاف ونجربها ان شاء الله

شكرا لكي جزيلا

الحمد لله بخير وعافية وانت وش احوالك ؟؟ ان شاء الله لاباس
الله يجازيك خير على دعواتك الصالحة لي
شوفي اختي دلال ما تربطيش كمية الماء بكمية البصل كل طبخة عندها كمية الماء اللازمة لها وكمية البصل اللازمة ايضا مثبا الارز نديروفيه حبة بصل كبيرة ...لاه ؟؟ لانو محتاجين صوص والصوص قوامها البصل باه تكون كثيرة وبالمقابل لايحتاج كمية كبيرة من الماء بالعكس حوالي لتر او اقل لانه في نهاية المطاف محتاجين صوص مش مرق
الارز ..المعكرونة ..التليتلي ..السباقيتي ....................حبة بصل كبيرة + لتر ماء ونخليها تغلي حتى تولي صوص
اللوبياء ..العدس ..الحمص .الفريك .........................نصف حبة بصل كبيرة او حبة صغيرة +لترين ماء لان الحبوب تشرب الماء
مرق خضار مشكلة ..مرق زيتون ...شفلور ..جلبانة.......نصف بصلة كبيرة او واحدة صغيرة +لتر ونصف ماء
شربة فارميسال وشربة لسان العصفور كلاهما عجين لكن لسن العصفور يحتاج ماء اكثر من الفارميسال وخاصة نوعية عمر بن عمر
العيش او البركوكس ......يحتاج 3لتر من الماء او اكثر حسب نوعية العيش باه يطيب مليح ويجي جاري فيه مرق كثير
الشخشوخة تحتاج بصلتين ولتر ونصف ماء بالتقريب
شوفي اذا قدرك نتاع اربعة اشخاص انا ايضا قدري نتاع اربعة يعني تبعيني كل ما ندير وجبة نحسب لك المقادير اوكي
وانت جربي وشوفي اذا ناسبتك او لا
نقطة مهمة
القدور تختلف عن بعضها هناك كوكوت تضيع البخار بزااف وتفقد كمية كبيرة من الماء وهناك كوكوت تضيع القليل فقط يعني تلقاي تقريبا نفس كمية الماء اللي حطيتيها
ايضا هناك نقطة اخرى
انك تطهي بالدجاج غير اللحم
الدجاج 20 دقيقة واللحم نصف ساعة او اكثر وبالتالي اذا كان لحم زيدي شوييية ماء لانك تزيدي في مدة الطهو

ارجو تكوني فهمت واي سؤال ما تتردديش