همزة وصل بين المعلم و الولي : انت تسأل والمربي يجيبك

[~ حراير ~]

السلام عليكم و رحمة الله تعالى و بركاته
الشيخ عبد الناصر كيف حالكم و ان شاء الله تكونو رجعتو تداومو في الدراسة
و هل مدارسكم مجهزة باجهزة التدفئة؟؟
لأنه الدراس و اليدين يترعدو شيئ مرعب في وقتنا هذا رغم انه كان عادي جدا في وقتنا احنايا

الشيخ راني سألتك من قبل سؤال و حاولت نستفاد من اجابتك و نطبقها لكني يأست
و هاد المشكل دائما يواجهني و نحس روحي راح نستسلم امامه حتى اني فكرت اني ماعدتش ندوخ راسي بيه لأنه امر سامط و ماتلقاش كيفاش تشرحو و حتى المداومة و الإستمرارية فيه مانفعتنيش
و هو على ملئ الفراغات في السنة الثانية في اللغة مثل أضع "كـ" "مثل" "كأن" "ليس" شوف كيفاش حروف متشابهة في المعنى و اخرى ماعندهاش علاقة بيهم خلاص
او اضع "لم" و "لن" تعيا تفهم كيفاش تميز بيناتهم كون ماتفهمش على الفعل الماض و الفعل المضارع
هاد هو سؤالي الي مشيبني و الي راح 4 نقاط لأفنان فيه و زادت غشتني "يعني زعفتني" انها خبت النقطة عليا و قاتلي ماعطاتناش النقطة ...مش لأنها خايفة و لكن مثل ماقاتلي ماحبتش تزعفني ... و طبعا انا فم وين جن جنوني

و حاجة أخرى يا الشيخ بالنسبة للسنة الرابعة اسمط درس في الكون و الي مافهمتوش في صغري و لا في كبري و هو درس حساب الساعة و الدقائق "حساب المدد"
انا امبارح استحمدت لربي انه رب الأسرة موجود و فهمها لكن وش نقولك عياط و صراخ و بكاء و من بعد قالي هاد الدرس نستعملوه في الخرائط و مانلقاولوش الحل فمابالك بأطفال صغار
يعني راهو شيئ فوق طاقة التلميذ .... او ربما انني انا ابالغ باش نغطي على ضعفي في هاد الموضوع

حاجة اخرى حبيتك تأكدلي هاد الأمر على الحال و الصفة
بالنسبة للحال نسأل الفعل "كيف"
اما الصفة فنسأل الإسم "كيف"
ام اننا نعرف الصفة بانها تتبع الموصوف و فقط

و بالمناسبة هادي معلومة قالتهالي اختي و فادتنا بزاف في المضاف و المضاف اليه
لما نسأل الفعل و نقول ماذا فعل ؟ يعطينا المفعول به
و لما نسأل الإسم و نقول ماذا ؟ يعطينا المضضاف اليه
مثلا : الرياضة تقوي عضلات القلب
الفعل تقوي لما نسأل : ماذا تقوي؟ عضلات هي مفعول به
لما نسأل الاسم عضلات ماذا؟ القلب مضاف اليه
يتسمى عضلات مفعول به و هو مضاف
هاد الطريقة حتى لو كانت طويلة الا انها نفعت اريج كثير كثير
فارجو ان تستفادو منها ، و من له طريقة افضل فليفيدنا بها

الشيخ عبد الناصر ربي يبارك فيك و في صحتك و في علمك و ربي يجازيك بالخير و الهناء و يثبت أجرك و يعوض تعبك معانا بنجاح وليداتك و ربي يفرحك بيهم و يرزقك برهم و ربي يسعدكم في الدارين و يعافيكم ويعفو عنكم ويرضيكم ويرضى عنكم ويسهل أموركم كلها اللهم آمين