بغض النظر على العنوان انا حبيت ندلي بدلو في الموضوع
الجامعة مركز للانحلال الخلقي .......خلاص ما ندخلولهاش
الليسي فيه الان العجب وانا ديما نقولها ربي يسمح للجامعة وراني ما نبالغش .......خلاص ما ندخلولوش
المتوسطة وبداو بناتها ينوضلهم القرون ...........خلاص ما ندخلولهاش
اذا بقى قدامنا غير الابتدائي ........نخمو فيه ندخلولو والا لا حتى هو ولكن علاه نتعب في روحي وانا ماراحش نروح للمتوسطة
اذن .................الحل الوحيد هو اني ما نقراش خلالالالالالالاص
بعد عقد من الزمن تهنينا خلاص من الجامعة وغيرها والان
ومن بعد
لما تمرضي اختي وين تروحي عند طبيب راجل في امور تاع النساء او لما تحبي تولدي شكون يقابلك راجل
لما زوجك يتكلم على الانترنات والتكنولوجيا الحديثة ووووانت تبقاي تشوفي بالعين فقط والا راح تقدري تناقشيه والا انت في واد وهو في واد
لما يقدر ربي على زوجك المرض او الوفاة منين تعيشي وتعيشي ولادك
لما ولدك يجيبلك تمرين ويقولك ماما ساعديني مافهمتش واش تقوليلو
مواقف كثيرة راح تحدثلك واكيد ما تعرفيش كيفاش تتصرفي وما تقولوليش نعيشو مثل امهاتنا لانو الوقت ماشي كيف كيف وقتهم ما كانش الطبيبات كاين العجايز الي هزو الخبرة من سنين وسنين وكانة نسبة الوفاة مرتفعة جدا على ابسط مرض
وما كانتش التكنولوجيا مثل هذي كانت الحياة بسيطة جدا لذلك قدرو يتاقلمو معاها
كانت كل ارملة تعني راهي فقيرة جدا هي واولادها عكس الي امهم تعمل تقدر على الاقل تعوضهم شوي
لما نتركو كلنا الجامعة بسبب الاخلاق شكون الي راح يرفد المجتمع لانو الدنيا ماهيش راجل فقط راهي راجل ومرى
السؤال الي يطرح نفسو الان والي نشوف فيه انا الحل هو علاش ما تقرايش في الجامعة انت وانا واهذيك ونحافظو على اخلاقنا ونغيرو نظرة المجتمع للجامعية بحسن اخلاقنا لانو الهروب عمرو ما كان حل للمشكل
قريت في الجامعة وشفت بلي مثلما كاين بنات ضايعات كاين بنات يحاولو انهم ينقضو الضايعات واخلاقهم ماشاء الله قدوة
اخواتي عن تجربة لاني قريت في الجامعة وخدمت ومن بعدها مكثت في البيت لما تزوجت لقناعاتي الشخصية نقولها ونعاودها الجامعة ماعندهاش دخل في الاخلاق والله راهو المشكل في الوالدين والاخوة وكل مسؤول على بنت يرميها وما يحوسش عليها اكيد راح تفلت من اول فرصة في الجامعة او غيرها والدليل بنات الثانوية الان اخلاقهم كارثة الا من رحم الله وملابسهم فاضحة والساعة الي يخرجو منها وكانهم نزلو من الفضاء الملابس النظرات التمايل الاشارات ووووووو
والان النساء المتزوجات يخافو على ازواجهم من بنات الليسي ماشي من بنات الجامعة
انا على نفسي راح نقري بنتي وما نقبلش يكون مستواها دون الجامعة وندفعها حتى تكون قدوة في الجامعة ولكن راح نتبعها في كل صغيرة وكبيرة ما نرخيلهاش الحبل ونقول بنتي متربية وبنت فاميلا راح نغرس فيها الاخلاق وزيد نخليها تحس ديما مراقبة الله اولا ثم مراقبة باباها وخوتها ليها لانو يوجد ما في السلطان ما لايوجد في القران والشدة مليحة ساعات
تخيلي اختي لو انو كل اب وكل ام حرصو على بناتهم وفرضو عليهم الحشمة في اللباس والتصرفات وراقبوهم وغرسو فيهم الاخلاق من الصغر هل تعتاقدي انو راح تبقى الجامعة بهذه الصورة او الليسي .......اكيد لا
اذن المشكل في التربية والوالدين الي تخلاو على مسؤوليتهم ماشي في الدراسة او المستوى الثقافي
( تقرير عن مشاركة سيئة )، و الموجودة أسفل كل مشاركة .
2012-02-16, 10:51
العرض الشجري