همزة وصل بين المعلم و الولي : انت تسأل والمربي يجيبك

[~ حراير ~]

السلام عليكم و رحمة الله تعالى و بركاته

الشيخ عبد الناصر كيف أحوالك مع تعب التلاميذ و التصحاح و المعدلات ربي يكون في عونك و ربي يثبت أجرك

حبيت نشاورك في هاد التلخيص و تلخيص لنص نجيب الطفل البدين

و هاد هو التلخيص و ما طلبته هو لخص كل فقرة في جملة واحدة ثم اربط بين الجمل لتكون فقرة

نجيب ولد طيب القلب لكنه يأكل كثيرا ، حتى أثناء صومه في رمضان يزداد وزنه ، ففي أحد الأيام سقط مغشيا عليه نصحه الطبيب بنظام دقيق، فخاف على نفسه لأنه اصبح ضعيفا كالبرميل الفارغ ذهب للطبيب الذي نصحه بالنظام الدقيق و كثرة الحركة، فقلل من الأكل و أكثر من الرياضة، و رغم التعب ضمر جسمه، فاصبح جسمه جميل و اكتسب صداقات كثيرة و حصل على جوائز رياضية

طبعا التلخيص و الكتاب أمامه

أنا جاني ملخص بزاف لكن ما قدرتش نعطي تعليق... لأنه المطلوب جاني بعد جهد جهيد

و حبيتك لو تتفضل عليا و تقولي كيفاش تصحح التعبير يعني تفرزلي الحالة
و حاجة أخرى انا نحب كل موضوع نعطيلو منه عدة وضعيات يكتبها و لو ل3 أسطر و ما عرفتش وش من وضعية نعطيها لهاد الموضوع حسيتو علمي أكثر منه ادبي

و حاجة أخيرة ...لو اطلعت على الرابط الي وضعتو على مرادفات التعبير ... يعني إذا مافيهاش "غلاسة" و سماطة و إذا عندك الوقت حبيتك تساعدني كيفاش نقدر نستعمله ... بصراحة يا الشيخ عبد الناصر راهي الحشمة منك قتلتني و ماعرفتش انعبر .... قصدي تعطيني وضعيات نقدر نستعمل بيها هدوك المفردات بسهولة و بطلاقة .... لأني حسيت روحي مودرة يعني متبحرة يعني تائهة في وسطهم و لحد الآن ما وريتهمش راهم عندي مخبيين لأني أنا بذاتي ماعرفتش منين نبداهم .... يعني كما يقول المثل الشعبي "جبت قط يونسني صار يبرقلي في عينيه"

هاد بالنسبة للتعبير و حاجة أخرى للفعل المتعدي و اللازم حبيت نفهم وش الهدف من أننا نعرف هاد الفعل لازم او متعدي يعني باختصار احنا مش راح اندخلوهم في الإعراب مالي وش دخلنا فيه لازم و الا متعدي على روحو
و شوفلي هاد الجمل من فضلك
فحص الطبيب الخالة / شكرت الخالة الطبيب
في زوج يليقو لازم لأنه لما نقول شكرت أبي فهمت المعنى لكن يبقى السؤال مطروحا من شكرت
و إذا ما كنتش فاهمة قولي خاصة أنه جاتني فكرة درك و هي هل الفعل اللازم يبقى طول حياته لازم أم قد يتعدى في بعض لأحيان
عذرا يا الشيخ سامحني

دوختك باينة لكن أرجوك استحمل مني آخر سؤال على المضاف و المضاف إليه
مثلا ذهبت إلى فرقة القسم ياك فرقة القسم مضاف و مضاف إليه لكن لما نجي نعرب نقول ذهبت فعل ماض إلى حرف جر القسم اسم مجرور بإلى ........ كيفاش عرفت القسم بلي مضاف؟؟؟؟؟؟؟
في الحقيقة أني حاولت نقرأ كتاب أخي أغيلاس تاع الإعراب لكني لم افلح في التركيز لأني ما نعرفش نقرأكتاب قراءة إلكترونية و الكرتوش خلاصلي يعني ما لقيت قدامي غير الشيخ عبد الناصر نلصق فيه ينحيلي الإلتباس

مشكور الشيخ عبد الناصر و ربي يباركلك في وقتك و جهدك و صحيحتك و عينيك آمين

تصبحو بخير و تنوضو على الفرح و السرور و الهناء