في منتدى لونباف : ما أريكم إلا ما أرى .. وما أهديكم إلا سبيل الرشاد !

[ياسين العربي 24]

المشاركة الأصلية كتبت بواسطة طاب جناني

الأخ ياسين

شكرا على تعقيبك .أنت ديما تربط قضية الاصلاح والتغيير نتاع أطر النقابة بالقانون الخاص و شكون قلي من منخرطي النقابة لي راه مع القانون رانا كامل ضد القانون وهذا نقطة اتفاق الجميع سواءا المتضررين منو و لا المستفيدين لي متضامنين مع زملائهم .هذه النقطة ليس نقطة خلافية حتى نرجعو ليها ونقولو المعركة نتاعنا هي هذي يا اخي الملف راه عند الحكومة وحنا كمناضلين درنا الشيء لعلينا عيطنا وصرخنا وكتبنا بيانات وعقدنا جمعيات ودرنا اضراب ورحنا للدزاير واش حبيتنا نزيدو أكثر .الآن الكرة في ملعب الحكومة تستجيب أو لا هذا شغلها وحنا ننتظر في النتيجة .

راني نشوف الفترة الحالية سانحة ومانيش حاب باش نوقفو التفكير نتاعنا و نجمدوه على الملف نتاع القانون الخاص ولكن حبيت نكون عمليين وايجابيين وحاب يكون الممثلين نتاعنا كذلك ولدينا من المسؤولية والوعي باش ندير حوصلة ونركز على السلبيات أكثر لأننا ما ناش هنا باش يشكرونا ولا يمدحونا ولا يديرونا التاج رانا هنا واقصد جماعة نتاع القيادة باش نخدمو القاعدة التربوية ونجيبولها الحق وكيما يقولو خدام الرجال سيدهم .

أنا راني قلت الخلل راه في الجماعة لي راهم حاكمين المكتب لأنهم يمتلكون القرار النقابي في يدهم وحدهم في ظل مؤسسات مفرغة من القرار النقابي لي المفروض يكون مبني على إشراك القاعدة التربوية وليس مصادرة قرارها بدعوى قلة الوعي .يعني إذا كانت القاعدة ماعندهاش الوعي نديرو بيها واش نحبو .أنا نقلك أخي ياسين إذا افترضنا جدلا نقص وعي القاعدة التربوية هذا أدعى أن يتحمل المكتب الوطني إذا كان صادقا ومسؤولا كما تقول ويقولون عبء اعادة هيكلة المؤسسات بما يضمن حقوق العمال التي يمثلهم واشراك حقيقي للقاعدة لكي لا نكرر الأخطاء الجسيمة التي نتجرعها من قضية القانون الخاص.أما من أراد اتباع سياسة الهروب إلى الإمام والتسويف والمماطلة والتضييق على الآراء فهذا معناه شيء واحد وهو أنك تحشر الجميع في الزاوية وسنضطر للتنازل مكرهين على الاتحاد لهذي الجماعة والانحياز للقاعدة التربوية .

سؤال أخر لك اخي العزيز والمبجل ..انا دئاما اربط التغيير بالقانون الخاص لان قضية التغيير لم تطرح من قبل
بهذا الشكل .وانا ادرك تماما ان التململ وقع عندما تسربت معلومات حول القانون الخاص .ماذا لو تسربت معلومات اخرى
بهذا الشكل ..يستفيد كل اساتذة ومعلمي الاساسي بالدمج دون شرط او قيد .هل كانت فكرة الاصلاح والتغيير
تطرح بهذا الشكل .لنعود الى الوراء قليلا .