زوخو على عجايزكم بأروع طبق تقليدي شاوي

أم تينهينان · 2013-10-31, 18:51

مرحبا بيكم في كوزينتي لأول مرة
أقدم لكم طبق تقليدي 100 /100 . من الشاوية جهة باتنة اسمو الرفيس نتاع الشخشوخة. أو المشلوش.
نعملوه في المناسبات و خاصة نجاح لولاد في القراية.
هو طبق لذيذ و خفيف يصلح مع القهوة نتاع لعشية للعايلة أو لاستقبال الضياف

و الان هذي هي الطريقة مع الصور و الشرح

1- تعجني عجينة عادية مثل عجينة الشخشوخة أو المحاجب . أنا صراحو طبقت طريقة الوهرانية نتاع الكيس المبلول
من بعد تديري الويزات كيما الصورة و تخليهم يرتاحو ربع ساعة

2- تبداي تطيبي . حاولي ترققيهم على قد ما تقدري

3- بعد الطياب توضيح في الصورة

4- تروليهم بالورقة كيما السيقار

الورقة مرولية

5- تقصيهم كيما في الصورة بالمقص أو الموس

6- حاولي تفرقيها بصوابعك

7- تتحصلي على هذا الشكل. هنا واجدة

8- حضري العسل. أنا استعملت طريقة أم أنس

9- تفوري الشخشوخة نتاعك بطريقة عادية -اسمحولي ما صورتش هذا المرحلة

10- من جهة أخرى تحطي العسل و الزبدة يذوبو و صبيها فوق الشخشوخة المفورة

10- حطيها في طبق التقديم و زينيها بالمكسرات اللي عندك أو السكر قلاسي ..............

11- قدميها و كلك ثقة في نفسك ومن الأفضل تؤكل سخونة

في الأخير مرحبا بيكم . باسم الله

جربوه و ما تندموش
اللي بغات تفاصيل أكثر مرحبا بأسئلتها

FELDA · 2013-10-31, 18:58

ما شاء الله ربي يحفظك اختي باذن الله نجربو مزيدا من الاطباق الشوية

مليكة01 · 2013-10-31, 19:03

يشرفني اني نكون أول واحدة ترد

يعطيك الصحة باين بلي خفيف ويشهي يم يم يييييييييييم

حسبت المغارف راهم ثلاثة قلت بالخف أنا نذوق الأولى

راني قلت لأختي أرواحي شوفي النساء واش راهم يخدمو في باتنة

يا ويلك شمري على يدييك أنت الي تزوجت عند الشاوية هههههه

Basketteuse · 2013-10-31, 19:08

مرحباً ببنت عمي الشاوية ... كم احب هذا الطبق اظن انه مستمد من الرفيس الزيراوي . وبما ان الزيراوي صعب قليلا . اصبحوا يقصونه بالمقص ... ما رأيك ؟ فقد رأيت مؤخراً ان القسنطينيات ينسبونه اليهم !! بما انك أيضاً شاوية وربما اكثر مني خبرة ربما تستطيعين افادتي . وشكراااااا

Meriemchawiya · 2013-10-31, 19:14

الله الله فكرتيني فيه راني طيبت الرقاق و قصيتو وخبيتو في الكونجيلاتور فكرتيني غدوة نجبدو نديرو بصح احنا نسميوه المشلوش
يعطيك الصحة

أم تينهينان · 2013-10-31, 19:15

اقتباس:

المشاركة الأصلية كتبت بواسطة basketteuse

مرحباً ببنت عمي الشاوية ... كم احب هذا الطبق اظن انه مستمد من الرفيس الزيراوي . وبما ان الزيراوي صعب قليلا . اصبحوا يقصونه بالمقص ... ما رأيك ؟ فقد رأيت مؤخراً ان القسنطينيات ينسبونه اليهم !! بما انك أيضاً شاوية وربما اكثر مني خبرة ربما تستطيعين افادتي . وشكراااااا

شكرا أختي على الاهتمام و الرد

هو فعلا أسهل بكثير من الزيراوي و لكنه أخف منه
أنا أول ما شفتو في باتنة . و لكن كليتو حتى عند حبيبتي القسنطينية في الحامة.
و على كل قسنطينة أو باتنة ما كانش فرق كبير في الأطباق التقليدية.
و ان شا الله كاش ما نهار نحطلكم الرفيس الزيراوي الشاوي على أصوله نتاع الأوراس
كما كانت تحضره أمهاتنا .

ريم الوداع · 2013-10-31, 19:24

بففففففففففف علااه عليييييك حرامممم عليييك سفهتينييييي وقتلتينيييي بقدرة ربيييي راح نجربهااااا تسلم ايدكككك

أم ريمة* · 2013-10-31, 19:29

ما شاء الله روعة

Basketteuse · 2013-10-31, 19:29

احنا الزيراوي تاعنا نديروه بنفس طريقة المشلوش لكن مانقصوهش نفوتوه في السيار.. ومانزيدولوش الغرس .. مع العلم أني باتنية ولاحظت اختلاف طريقة تحضيره حتى بين الشاوية ...( مجرد معلومة) .. راني ننتظر طريقتكم في الزيراوي وقلبي ينحسر من السخفة ممممممم

أم إناس · 2013-10-31, 22:56

اممممممممم يسلام عليك اختي يعطيك الصحه بصحتك اميميميم

JIMI17 · 2013-10-31, 23:02

يعطيك الصحة أختي حتى حنا في بلادنا نديروه من زمان و حتي صحاب ورقلة و غرداية يديروه في أعراسهم مع الشاي شكرا مرة أخرى أختي

عماني نور · 2013-10-31, 23:56

احنا نسموه الرفيس ،، بزااااف بنين

توحشتوووووووو

يعطيك الصحة على الوصفة و الصور

والله يبارك ع الفحلات

كوثرنيل · 2013-11-01, 00:14

شكرا جزيلا اختي وبارك الله فيك وفي مجهودك وحسب الردود فالطبق هذا تتميزبه منلطق عديدة من الوطن احنا تانيك في منطقتنا يعملوه وله طاجين فخار مخصص احنا في منطقتنا نسميوه الفتات وكنت حابة نشوف الطريقة لطيبتيه بها طريقة العمل راهي نفس الطريقة وعندنا راهو طبق تقليدي يعملوه في راس العام اي كيدخل العام لجديد وراهي عادة ان الام لما تتزوج بنتها كيدخل العام الجديد تديلها الفتات مع الدجاج لاننا نطيبوه مع الدجاج والطريقة اننا نحضرو لاصوص انتاعو نقليو البصل والتوم مع نبته فلايو نقطعوها رقيقة وفلايو جد ضروري لانة يعطي للاكلة مداق جد مميز مع الدجاج بعد ذلك نضيف الماء والطماطم ومن جهة اخرى نكونو طيبنا حفنة فول رقيق حتى يدوب الفول مع الماء ثم نضيفة للمرق والفول مع نبتة فلايو والدجاج مع بعض يعطيو دوق خاص ولاننسى حفنة حمص بعد موجدنا المرق نسقيو به الفتات لفورناه ويقدم مع الدجاج وليشترط ان يكون دجاج عرب والاكلة فعلا جدجد مميزة

malek1608 · 2013-11-01, 00:23

الله يبارك و يعطيك الصحة أختي ممكن تقوليلي السميد الي خدمتي بيه الله يخليك

foufa rime · 2013-11-01, 01:26

بارك الله فيك