مطلوع بصح ماهوش مطلوع

اسيل 2015 · 2015-10-19, 15:10

السلام عليكم حبيباتي البارح قاتلي عجوزتي ديري المطلوع حطيت ندير حطيت جفنة درت فيها السميد والخميرة مغرفة زيت ومغرفة صغيرة سكر ولميت بالماء ثم الملح معجنتوش درتو في الكيس المبلل وخليتو حتى خمر ثم عجنتو مليح ومباعد قرصتو وطيبتو واس نقلكم كي جيت نحطو مبقاتش مطلوعة لي ولات خريطة جزاير خريطة موريطانيا واش نقللكم مفهمتش واشني السبة بالرغم من اني مجريتوش بزااف من فظلكم اعطيوني وصفة ناجحة تاع المطلوع وطريقة الطياب

raboha · 2015-10-19, 22:42

ختي المشكل فالسميد راهو ميحبش الماء إذا تقدري تعاوديه و من عندي غير عاوديه باش تعرفي سميدك مليح
كاين سميد حتى و متكثريلوش الماء كي يرتاح في خمورو يزيد ينطلق
طريقة العجن تاعك عادية و هايلة و تخرج مطلوع هايلة

sandie belle · 2015-10-20, 15:03

اختي ممكن انت مازلت ماكيش محترفة في طياب المطلوع و انا راني كيفك ساعة تجيني مدورة و ساعات تجيني بيضاوية و مرات مستطيل هههههههههه المطلوع لمليح لازم تكون العجينة نتاعو مرخوفة شوي و طرية باش يجي طالع و خفيف و لكن كي تعود الوحدة ما تعرفش تلوحو في الطاجين يفسد الشكل نتاعو و ما يبقاش مدور و قادر يتلبز و ما يطلعلهاش, انت حاولي المرة الجاية ما ترخفيش العجينة بزاف باش كي تلوحيه ما يغلبكش و يفسد الشكل و خلي حتان تخرجي عليه و هاديك الساعة ارخفي العجينة
و ممكن ثاني يكون المشكل في الدقيق المهم زيدي جربيه و شوفي روحك

radia25 · 2015-10-20, 15:06

هههههههه شكون من الخبيرات تقولنا على طريقة ساهلة باه نرمو المطلوع في الطاجين ويبقى محافظ على شكلو انا تاني عندي مشكل معاه

~~ibtihal18~~ · 2015-10-21, 10:10

ديرو اما كونثر بلاكي مدورة و لا صينية تع بيتزا تع الحطب تقلبوها و ترشوها بالسميد ولا بالفرينة و و على ما اظن السميد خير و قرصو الكسرة عليه و خليها تطلع و مبعد كي تجي تطيبها نزليها طول من الصينية بلا ما تمسيها بيديك و تحل المشكلة

imanaz · 2015-10-21, 11:08

https://www.djelfa.info/vb/showthread.php?t=1745191

lilii7179 · 2015-10-21, 14:27

اكيد ان المشكل في السميد .تخيلي انا صراتلي كي كنت عروسة جديدة و اول مرة ندير الكسرة و اعطاتني عجوزتي سميد نتاع القمح و حكمت رخفتو بزاف كيما السميد العادي. لمزية كنت وحدي هههههههههههه لوكان شاف راجلي الكسرة الاولى لوكان قالي عمرك ما درتي الكسرة و لا حطيتي يدك فيها . المهم الكسرة الاولى او بالاحرى الخريطة الاولى خبيتها و لخرين زدتلهم الفرينة و ستنيتهم طلعو شوية و جاو ملاح. من ثما وليت كي يجيبلي سميد جديد ما نرخفش العجينة بزاف حتان نشوف حالتو كي نلقاه بلي يشرب في المرات القادمة نرخفها
بالتوفيق

radia25 · 2015-10-21, 14:31

اقتباس:

المشاركة الأصلية كتبت بواسطة lilii7179

اكيد ان المشكل في السميد .تخيلي انا صراتلي كي كنت عروسة جديدة و اول مرة ندير الكسرة و اعطاتني عجوزتي سميد نتاع القمح و حكمت رخفتو بزاف كيما السميد العادي. لمزية كنت وحدي هههههههههههه لوكان شاف راجلي الكسرة الاولى لوكان قالي عمرك ما درتي الكسرة و لا حطيتي يدك فيها . المهم الكسرة الاولى او بالاحرى الخريطة الاولى خبيتها و لخرين زدتلهم الفرينة و ستنيتهم طلعو شوية و جاو ملاح. من ثما وليت كي يجيبلي سميد جديد ما نرخفش العجينة بزاف حتان نشوف حالتو كي نلقاه بلي يشرب في المرات القادمة نرخفها
بالتوفيق

ههههههههههههه شفتي ختي تبهديل يصرا غير كي تروحي عند الناس والله تنساي على الخدمة كامل

أمل الاحلام · 2015-10-22, 11:06

ربي يكون في عونكم ...معليش تصرا لاحسن ناس
شوفو يا خواتي انا نمدلكم طريقتي هي ناجحة و مضمونة بصح المهم السميد يكون مليح
ديري 2 عبار سميد و عبر فرينة و خميرة لعجين و ملح وبداي تشمخي بشوي بالما دافي
مين تتلم لعجينة وماتطلقيهاش بالمابزاف ابداي تعجني و ادلكيها مليح و كل مرة غطسي يدك في الما الدافي
مين تبدا تطرطق اعرفي بلي راها مليحة ..غميها في حاجة و خليها تخمر
من بعد قرصيها و خليها تخمر للمرة الزاوجة بصح اهنا عسيها..غير تبدى تخمر طيبيها ماشي حتى تفوح ريحة لخميرة و تنتفخ لعجينة و ترجع تتفش
و صحتين و ان شاء الله تنجح كل واحدة حاصلة

ملاحظة صغيرة انا نحب السميد يكون شوي حرش يعني فوق لرطب بشوي هاداك ايجي بيه المطلوع بنين بزاف
جربو و خبروني ...

om kamilia · 2015-10-22, 11:28

https://www.djelfa.info/vb/showthread.php?t=1672604
هذا يعانك بزاف

ام ملاك الصبور · 2015-10-22, 11:51

المشكل في السميد ما يشربش الماء اضيفي له الفرينة من الاحسن حطي نص بنص وما تجريش العجينة يخرجلك مليح و ما تكبريش الخبزات كي يسهل عليك طيابهم

fatouma45 · 2015-11-19, 00:41

انا نقرص الخبزة و نكثرتليها الدقيق و مين تخمر نرفدها بالمغطا انتاع بوغت مونجي مدورة و كبيرة بكل سهولة و نحطها تطيب مايخسرش شكلها

om kamilia · 2015-11-19, 10:30

السميد لميح يعاون بزاف

هبة ام عبدو · 2015-11-19, 20:15

في المرة القادمة متكبريش الخبزة ديرها خبيزات قد يديك اليك الرايط ممكن يفيدك
https://www.djelfa.info/vb/showthread.php?t=1889630
المرة الجاية تنجحلك ان شاء الله

Basketteuse · 2015-11-22, 10:32

ديريهم قرص صغار وقرصيهم فوق سرفيتة وغطيها باه تنشف وتقدري تهزيهم، انا هك ندير