~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[omelbanin]

صباح الخير ،اخواتي ، البارح مزية ما طاوعتش الزوج لانو كي شاف واش طيبت قالي هذا ماكان . وممبعد الحمد الله بقا شوية من الطبق الرئيسي خليتو ليوم يفطرو بيه ولادي ماشي صايمين .
والشربة اليوم ما نطيبش ،لانو نطيب تاع يومين.
بعد صلاة العشاء قريت القران وكملت سورة البقرة البارح واليوم بعد الفجر بديت في ال عمران.

[omelbanin]

اختي كاملياس ،المراة تصلي في دارها احسن ، و صلاة العيد هي صلاة الوحيدة لي لازم نصلوها في المسجد.

[hanamohamed]

أَصْـبَحْنا وَأَصْـبَحَ المُـلْكُ لله وَالحَمدُ لله لا إله إلاّ اللّهُ وَحدَهُ لا شَريكَ لهُ، لهُ المُـلكُ ولهُ الحَمْـد، وهُوَ على كلّ شَيءٍ قدير
صباح الخير على الجميع يوم جديد وسعيد في هذا الشهر الكريم اخواتي الفراشات متعيوش ارواحكم في الدور في الكوزينة باه متعيويش وتقدرو على التراويح مضيعوهاش

[ام آدم]

صباح الخير يا غاليات ان شاء الله تكونو فوتو النهار الاول لاباس
انا الحمد لله بعد ما فطرنا غسلت الاواني وسيقت الكوزينة ودار لولاد والهول و الحمام و المرحاض اكرمكم الله وجوزت النشاف غلى الصالون
الصلاة عذر شرعي ولكني نحاول نستغفر كل ما تذكرت والله المعين
اللهم نسالك العفو والعافية في الدنيا والآخرة

[حياتي كلها امل]

السلام عليكم يا الغاليات انا البارح جاز نورمال لكن عيت شويا مع العشيا .
مور الفطور غسلت الاواني وسلحت الدنيا وطيبت قهوة للزوج البارح راسو دار فيه حالة حتى وشرب الدوا ومحبسش اذن العشاء صليت انا وبنتي وقريت قران ثم رقدت بني وليد رقد عيا ،اماالتبذير مدرتش حاجة كبيرة بقاتلي شربا انا نطيب تاع يومين وشوية غراتا فطرو به الاولاد والحمد لله.
اللهم اعنا على ذكرك وشكرك وحسن عبادتك

[omelbanin]

السلام عليكم ،غسلت لحوايج ونشرتهم ،دوختني السخانة برا ،جوزت نشاف على الكوزينة والهول والكولوار، وحطيت للاولاد يفطرو .

[hanamohamed]

اللهم انت ربي لا اله الا انت اغفرلي ذنبي ويسرلي امري

[فراشات العمر]

السلام عليكم
البارح كان رائد عندو شوية سخانة تحكمت فيها بالسيبو بصح البارح ابيه خرج العصير من الكونجلي ومباشرة بدون ما يحس قدملو يشر الصباح الساعة الثانية شعلت النار في جسدو غسلتلو وعملتلو سيبو والجيفان وحد ساعة وباه هبطت السخانة

[ام براهيم الخليل]

اسعد الله اوقاتكم رمضان كريم اللهم اعني على ذكرك وشكرك و
حسنى عبادتك اللهم اشفى امى الى راهى فى المستشفى شفاء لايغادر سقما اللهم اشفى مرضنا ومرضى المسلمين اللهم امين

[فراشات العمر]

ربي يشفيها ويرحمها ويخفف عليها اميين طهور ان شاء الله

[ام آدم]

ام ابراهيم ربي ءيشفي الوالدة ويخفف آلامها هي ووالدة ام هززار عاجلا غير آجل يارب

[ام متين]

اللهم اشفي والدة ام ابراهيم الخليل و والدة ام هزار وجميع المرضى وخفف عنهم الامهم ومعاناتهم وابعث فيه من القوة ما يعينهم على معاناتهم ومن الطمانينة ما يريح قلوبهم واجعل لهم بكل اه حسنات يا ارحم الراحمين يا رب العالمين.

[omelbanin]

اللهم البس والدة ام ابراهيم ووالدة ام هزار لباس الصحة والعافية،وارفع الضر عنهم يا لطيف الطف بحالهم ااااااامين

[حياتي كلها امل]

يارب يارحمن يارحيم يا ملك يا قدوس يافرد ياصمد اشفي والدة ام ابراهيم الخليل ووالدة ام هزار وشفهم شفاء لا يغادر سقمى .
اللهم في هذا الشهر الكريم اشفي جميع مرضان ومرضى المسلمين

[حياتي كلها امل]

ام لينا ربي يشفيلك راءد

[غزالة1]

اللهم يا شافي اشف ام ام ابراهيم و ام ام هزار و اعط القوة لاولادنا
اللهم اشفي مرضانا ومرضى المسلمين

[ام مؤمن]

ام هزار ام ادم و ام رائد كاميليا و غزالة و ام هنا و كامل اللي باركولي الف شكر و ربي يفرحكم بوليداتكم و شكرا على النصائح و الدعوات الله المعين راني نحاول نخدم بشوية و غير الضروري برك نفطر زوجي و نتهلى في الصغيرة و عيني على اخواتها ...النهار طويل لكن سهر الليل أطول خصوصا انو الفلوسة تاعي تبات تقيم الليل كل ساعتين تنوض و مانرقدش معاها تقريبا كامل الليل الصباح نصبح دايخة المهم ربي يقدرني ان شاء الله مرحلة و تفوت
ام رائد ربي يشفيه ان شاء الله الاماكن الساخنة بالفعل تراكمت الله يعطينا قوة يا من عاش وراء العيد ان شاء الله نستعيد عافيتي و نتوله بالدنيا كيما تقول ماما ماهيش هاربة ههه من هذه كامل الصحة هذا ماكان الله يديمها علينا اجمعين و الله يشفي كل المرضى يا رب

[جهينة اليقين]

السلام عليكم ان شاء الله تكونو بخير ام ابراهيم الخليل وام هزاز الصبر الصبر فهذا ابتلاء من الله داووا مرضاكم بالصدقة اللهم اشف مرضانا شفاء لا يغادر سقما

[جهينة اليقين]

البارحجوزت النهار مليح وعند الفطور ما كلينا والوغير الحريرةوالبوراكوشوي بطاطا طاجين الحلو بقى كيم هووبنتي غسلت الماعن وانا صليت العشاء وركعتين زيادة دايما هكذا اليوم الاول وما عرفتش الدنيا وين راهي حتى للصحور ثم صليت ركعات وكي ادن الفجر صليتورجعت لفراشي

[جهينة اليقين]

وعلى الساعة الثامنة رحت زرت الوالدين وشريت بعض الحاجيات ومن بعد بنتي دارت بسبوسة وانا دوشتواخذنا قيلولةا اليوم ان شاء الله راحة ندير جلبانةوبطاطا مقلية للاولاد فقط انا ما ناكلهاش والمرقة تاع الحريرة عندي وسلطة وعصير التفاح بالنعناعوفلون حاولو يا لبنات ما تبذروش لانه شهر الصيام والقيام وليس التفنن في كل ما لذ وطاب وكاين مساكن الي ما لقاوش واش ياكلو وكاين الي محرومين من العايلة وكاين الي من الوطن فاللهم انا نحمدك على نعمك التي لا تعد ولا تحصى

[omelbanin]

يا حبيبتي ،جيت نشتكيلكم باش تلقاولي حل، انا زوجي مبذر من النوع الرفيع وكيما درت معاه ما حبتش تروحلو ،كيما هاذي المرة كي خلص قلتلو بالعقلية ،نقضو شوية ارمضان ،ونخبو الباقي نصرفو بشوية باش مالخر ما نطيحوش اومبان، واذا خفت تخسر اعطيني نخبيهم ،وكل اليوم نشوفو واش خصنا من الضروريات نشرو.ok.
مشينا لاباس حتى لليوم طل فيهم وين راني مخبيتهم ، وقالي نروح نقضيلك شوية خضرة،علااابااالي يجيبلي االمرشي قع .
قووولووولي واش نديرلو؟؟؟؟؟

[جهينة اليقين]

اولا اختي ام هارون لازم تديري معاه الحيلة باش تبدلي لو هذا العقلية يا اختي البلاد راهي في ازمة وكل واحد يقرا للزمان عقوبة ناس بكري يقولو الراجل ساقية والمرا جابية يعني انت الي تقتصدي اذا اعطاك الشهرية نحي منها شوي وخبيه للطواريء ومهما حصل ما توريهم لوش الا في الوقت المناسب واذا جاب لك قضيان زيادة انت ما تطيبيهش كامل الي يتكونجلا خبي منو والي ييبس يبسيه وكي يقول واش يخص قولي لو كاين الا الفواكه او الاشياء الي تفسد حاولي تتصدقي بها وما ترميهاش يعني انت تكوني قافزة وحيلية فهمتي ؟

[omelbanin]

: والله غير يا جهينة ،في شعبان كنت ظل نكونجلي ،هذا طرشي هذا قارص،.......غير باش نقص القضيان في رمضان و ما يلقاليش سبة باش يشري ويجيبلي ، في عوض الحاجة وحدة خمسة حوايج.
وضرك ماشي انا لي قلتلو اشري هو غير لقا دراهم ،قالي نروح نقضيلك واش خص .
انا نظن عندو حالة نفسية ،هو عاش حياتو فقير ،حتى كي تزوجت انا عندو سوفريت من الفقر ،وضرك كي رزقو ربي ولا كون يصيب ظل يشري.

[ام آدم]

ام هارون حبيبتي انت حاولي معاه وكيما قالتلك ام راضية اظا جاب بزاف وخفتي يفسد تصدقي منو وربي يرزق الجميع

[ام آدم]

ام راضية ما تتخيليش شحال نحب نسمع نصايحك فيها حكمة زحسن تدبير ودايما نستفاد منك الله يفتح في وجهك ابواب الخير

[ام متين]

شوفي اختي انا ثاني راجلي يحب يقضي وانا دائما نقولو كلش كاين لكن الله غالب يشري الاكيد ان يشري حوايج ملاح لكن الفساد ماهوش مليح وكيما قالتك جهينة تعرفي كيفاه تتصرفي في الشيئ الي يشريه المشكل لما يكون من هواة الطبخ ويدير كل شيئ بالزايد وخاصة القلي ربي يهدينا ويهديهم الشيئ الي نقدرو عليه نديروه والي فوق الجهد الله غالب
نقولك الصح انا في البدايات كنت نتقلق لكن مع الوقت ندير واجبي ما نفسدش ما نبذرش ننصح اذا كان الجو مناسب للنصح
ربي يرزقنا ويهنينا ويشفي امهاتنا وامهات كل المسلمين يارب في هذه الايام المباركة فرج كرب المكروبين وهم المهمومين واهدنا الى ما فيه خيرنا وير امتناامييييييييين

[ام آدم]

انا اليوم عندي شربة تاع البارح وشوي طاجين حلو زدت معاه شوي كفتة وسلاطة ومطلوع
الله يتقبل صيامكم وقيامكم ان شاء الله

[omelbanin]

حبيباتي ،جهينة ،ام ادم ،ام متين ،شكرا على النصائح والله غيىرانا نحب لي يوريلي وينصحني . وراني دايرتكم كي خواتاتي .
اللهم اهدنا في من هديت.اااامين.

[omelbanin]

صح فطوركم، وتقبل الله الصيام.
سمراء الدنيا حبيبتي وين راكي ، طل علينا .

[حياتي كلها امل]

صح فطوركم ويارب يتقبل منا اللهم ارزقنا في الدنيا حسنة وفي الاخرة حسنة وقنا عذاب النار

[ام هزار]

حبيباتي صح فطوركم اجمعين . ان شاء الله تكونو في احسن الاحواال . امين يا رب
شكرا لكل وحدة فيكم دعت لامي و لام ام ابراهيم بالشفاء . بارك الله فيكم جميعا . و ربي يحفظكم . كل وحدة باسمها حتى ما ننساكمش
ام البنين .حبيبتي . مشكل التبذير راهو عند زوجي ايضا . عانيت منو لسنوات .لكن في الفترة الاخيرة بديت نتحكم في الوضع شوية .و على سبيل المثال في هذا رمضان . تعمدت ما نقضيوش حتى اول يوم منه . و قتلو نشريو غير الضروريات لانو كانت عندي من قبل بعض المستلزمان كالخضار .و بما انو النهار الاول تاع رمضان جا سخون بزاف . الزوج ما قدرش يدور بزاف . و اشرالي ما طلبت فقط و طبعا انا تحكمت في الطبخ درت قيس قيس .النهار الثاني يعني اليوم الشربة تاع البارح يحبها بلحم الغنمي مع قطعة دجاج لي و لبنتي .زدت فقط شوية حميس قيسنا فقط و شووووووووية طاجين لحلو مع سلطة خضراء بالطماطم و البيض و هو زاد شرا قطع قلب اللوز لينا و لدار باباه بالحساب . حتى اني ما طيبتوش في الدار .دايما يقعد بالرغم اني نبعث منو لدار شيخي . و صدقيني كلينا غير الشربة و السلطة و الحميس قالي نسحر بيه و طاجين لحلو بقا كيما راه المهم ما يفسدش . الامر اللي خلاني نتحكم شوية في المصروف . انو زوجي خلصلو المصروف في امور طارئة قبل رمضان و انا اللي نعطيلو من واش بقا عندي و نتعمد ما نعطيلوش بزاف . نقدر برك شحال يجيو و نمدلو . و الحمد لله هذي الساعة . و كل يوم حيلة و تدبيرة :19::19:. ربي يعينك و يعينا اجمعين
اللهم يا جامع الناس ليوم لا ريب فيه ردنا اليك ردا جميلا . و اشف امي و ام ام ابراهيم و ام متين و ولدها و غزالة و رائد و جميييييييييع مرضى المسلمين . امين يا رب العالمين

[جهينة اليقين]

صح فطوركم تقبل الله صيامنا وقيامنا ام ادم والله راكم كيم بناتي والشي الي نقدر عليه ما نبخلش بيه عليكم

[جهينة اليقين]

الاخت الي سالت عن الصلاة في المسجد اظنها كاميليا قال عليه الصلاة والسلام لا تمنعوا اماء الله مساجد الله وصلاتها في بيتها خير لها يعني المراة تصلي في بيتها احسن ولكن هذا ما يمنعش تروح للمسجد اذا ارادت والله اعلم

[omelbanin]

السلام عليكم ،اصبحنا واصبح الملك لله.
،ماحبش يجيني الرقاد من موقبيل وانا نتخبط.

[omelbanin]

http://www.up.djelfa.info/uploads/146536127025881.jpg

[omelbanin]

http://www.up.djelfa.info/uploads/146536265399721.jpeg

[ام متين]

صباح طيب مبارك للجميع الحال من بعضو يا ام البنين انا الوقت الي موالفة نوض فيه نوض وزيد الزوج يروح يخدم يعني غير يوقف نكون واقفة وحتى وقت القيلولة ما نرقدشبزاف 5 او 10 دقائق

[ام متين]

دعاء هذا اليوم من رمضان

اَللّهُمَّ ارْزُقنا فيهِ الذِّهنَ وَالتَّنْبيهِ ، وَباعِدْنا فيهِ منَ السَّفاهَةِ وَالتَّمْويهِ ، وَ اجْعَل لنا نَصيباً مِن كُلِّ خَيْرٍ تُنْزِلُ فيهِ ، بِجودِكَ يا اَجوَدَ الأجْوَدينَ

[جهينة اليقين]

السلام عليكم انا كذلك من الساعة السابعة والنصف وراني ندور فالنت ولهاني باش نفصل وحد الجبة وهذي نقطة ضعفي

[جهينة اليقين]

اللهم انا نعوذ بك من العجز والكسل

[arwa alaa]

صباح الخير عليكم يافراشات
واش راكم دايرين فيها

[سمراء الدنيا]

السلام عليكم و رحمة الله و بركاته
رمضان كريم للجميع و تقبل الله منا منكم صالح الاعمال

[حياتي كلها امل]

السلام عليكم وصباحكم مشرق وسعيد انا هذو ايام رمضان نوض على السابعة وهذا وين جيت درت راديو لوليدي وغدا نديه كنتخول .
على سلامتك ياسمراء رمضانك كريم وكل عام وانت بخير
اللهم انا نسالك الهدى والعفاف والتقى

[ام آدم]

وعليكم السلام ورحمة الله وبركاته سمورة
صباحكن سعيد مليء بالذكر والاستغفار
اللهم اجمع شملنا اخوات تحت ظلك يوم لاظل الا ظلك

[ام آدم]

اللهم اشف كل مريض و أعد كل غريب لدياره وأقر عين كل أم بولدها
اللهم أعنا على الصيام والقيام واجعل رمضان نقطة تحول ايجابية في حياتنا ونقنا فيه من كل الخطايا

[omelbanin]

]السلام عليكم ،صح رمضانك حبيبتي سمراء ، كيف الاحوال .

يامقلب القلوب ثبت قلبي على دينك.

[سمراء الدنيا]

صباحكم سعيد يا فراشات
ربي يشفي كل مريض .... و يفرج هم كل مهموم .....
اختي ام هاجر واش عامل وليدك كانش ما ارتاح ؟

فراشات دورتنا خلاصت و رايحة باذن الله نغلقها
واش رايكم في اقتراح الاخت سرسورة من قبل عن افتتاح موضوع عن يومياتنا في رمضان ؟
في انتظار افكاركم و اراءكم

[حياتي كلها امل]

سقسي عليك الخير اختي سمراء راهو يتحسن والحمد لله.
وفكرة عن يومياتنا في رمضان انا راني من مؤيدي الفكرة

[omelbanin]

السلام عليكم ،حبيبتي سمراء اكيد فكرة يوميات رمضان فكرة مليحة ،وشنو نركزو على:الصفة المليحة لي اكتسبتها هل طبقتها في هذا اليوم ، وشنوهوما الصفات السيئة ،لي كانو عندي رمضان العام الماضي وهذا رمضان راني نقص فيهم(في مجال الاكل الصحي ،الجانب الديني ،والجانب الاجتماعي.)
ومن جانب قراءة القران ،كل وحدة تقولنا وين راهي لاحقة.

[جهينة اليقين]

السلام عليكم انا واش ديرو راني معاكم المهم نكونو مع بعض من بداية يوم جديد وانتهاء بيومياتنا في رمضان

[omelbanin]

السلام عليكم، حبيباتي ،شكون لي يخرجلها لاتاي مليح تقولي كيفاش الديرو؟

[ام آدم]

وعليكم السلام ام البنين شوفي في اليوتوب تلقاي ام وليد مدايرة طريقة هايلة لعمل لتاي

[ام آدم]

انا اليوم آخر يوم ما نخدموش غدا تبدا الثلاث ايام تاع خدمتي لاني كيما قلتلكم نخدم بنظام المناوبة 3 ب 3
الحمد لله وفرت 5 خبزات مطلوع في المجمد لاني خفت ما نقدرش ندير مع السخانة والتعب تاع الخدمة و الاكل عندي 2 اطباق في المجمد
كشما ندير شربة وسلاطة ونشوف مع روحي لانو غدوة اول نهار نخدم فيه وانا صايمة ربي يعينا اجمعين

[ام آدم]

اليوم بحمد الله فطوري شربة وطاجين جبن و حميص وسلاطة خضراء وطاجين حلو ومطلوع
صح فطوركم

[omelbanin]

حبيبتي ام ادم ربي يعينك على الصيام،تسحري مليح برك وكثري من الفواكه. والتمر باش يعطيك طاقة.
انا طيبت شربة ،طاجين الزيتون مع فريت ،سلطة بيطراف وخضراء ،بوراك وفلان.
اللهم تقبل منا طاعاتنا .

[جهينة اليقين]

ام هارون انا ندير لاتاي كيم تاع ام وليد بصح في الاخير ندير زوج كاسرونات ونبقى نفرغ من واحدة لواحدةوكانك راكي تبردي باش يدخل الهوا ويدير الرغوة يجي هايلوالله الخدامة مع العشية يحبوه قريب كيلو كملوه لي ههههه

[جهينة اليقين]

اليوم درنا حريرة ولوبيا ماشطو قراتان بالبيشمال وبنتي دارت سوفلي ام وليدوسلطة وخبز الكوشةما راناش ناكلو الجلبانة بقى نصها البارح راني خايفة نسخنها وما ياكلوهاشربي يغفر لنا

[حياتي كلها امل]

صح فطوركم ويرب يتقبل صيامكم اليوم طيبت شربة وعجيجات الشيفلور وفلان وسلطة فلفل وبيطراف في الاخير ماكلينا ماوالو انا عييييييييت اليوم وزوجي نفس شيء ماكلاش والاطفال نقبو شويا .
اللهم انك عفو تحب العفو فعفو عني

[ام آدم]

صح فطوركم حباباتي
ام هارون عزيزتي شكرا على النصائح وعلى الدعوة حبيبتي ولك بالمثل

[ام هزار]

صح فطوركم حبيباتي .
توامي ربي يعينك على الشغل برة و لداخل . انا حسبتك تعملي هذو ليامات . و راني خليتلك سؤال في الدردشة حول هذا الموضوع . و الله نحس بيك بزاف . رانا عاملات لبرة كيفكيف
سمراء صح رمضانك حبيبتي . و كيما قالت جهينة راني معاكم في كل الخطوات
البقية ربي يتقبل منا الطاعات و العبادات . امين يا رب
لا اله الا انت سبحانك اني كنت من الظالمين

[نسمة صبح]

جهينة اليقين قوليلي لا تاي تشريه بالميزان و لا كيفاش؟؟

انا كي نشري نشري واحد اسمو الراقي هاااايل...

[حياتي كلها امل]

كانو عندي ضياف هذا وين خرجو .حليلكم انتما يلي تخدمو سوغتو في رمضان ربي يكون معاكم ام ادم الحمد لله كي جيتي تخدمي كل ثلاث ايام .
ايا مالا تصبحو على خير

[omelbanin]

صح فطوركم ،انا كنت عند عجوزتي هذاوين جيت ،شكرا حبيبتي ام راضية على طريقة لاتاي .صح سحوركم ،تصبحون بالف خير.

[ام براهيم الخليل]

مساء الخير تقبل الله صيام وقيام الجميع اخواتي كم سعدة جيدا بي رفقتكم وكنتم لي خير ونيس في وحدتي ارجو الدعاء لكل مريض ومنهم امي اللهم اشفي مرضانا ومرضى المسليمين امين شكرا لي كل من دعت لي امي ولها بي المثل

[جهينة اليقين]

السلام عليكم واش احوالكم البارححسيت بوحد الفشل عمري ولا شفتو اظن دوشت وخرجت ننشر وانا سخونة وما لبستش مليح وضربني الهوا صليت العشاء فقط وشربت حبة بانادول ورحت فيها حتى للسحور كملت صلاتي وصليت الفجر ورقدت راني الحمد لله

[جهينة اليقين]

نسمة لاتاي مرات نشري تاع البواطة الي جات لكن مؤخرا واحدة قريبتي تسكن جوايه الصحراء راهي تشري لي بالميزان هايل

[حياتي كلها امل]

السلام عليكم وصبحكم الله بكل خير لباس عليك اختى جهينة انا ايضا طاح عليا واحد العيا البارح وليت الهدرة مانقدرش نهدر وراكي تعرفي لعندها الذراري اذا تسكت ولا تحبس

[ام متين]

صباحكم طيب مبارك على سلامة الجميع ربي يكون معانا جميعا اليوم راهي السخانة مع الصباح ربي يقدر الجميع وخاصة الي يخدمو برا اجر مضاعف ان شاء الله انا راني نحاول ما نعييش روحي بزاف في الكوزينة يعني نعمل شوية ونخرج منها شوية والا بعد الفطور ما نقدرش نوقف وزاد يوجعني راسي ربي يخفف علينا جميعا
البارح فقط حسيت ان الاولاد وابوهم فطرو الان الايام السابقة غير يذوق درت شربة مقطفة وبوراك ونوع من المقارون بصوص بيضاءمع الكرام فراش وكرات اللحم جات بنينة على حسب قولهم وسلاطة خضراء واليوم راني نخمم واش ندير مع هذا الحمان

[ام متين]

عن ابن عَبَّاسٍ، عَنِ النَّبِيِّ صلى الله عليه و آله:
" اللَّهُمَّ قَوِّنِي فِيهِ عَلَى إِقَامَةِ أَمْرِكَ، وَ أَوْزِعْنِي لِأَدَاءِ شُكْرِكَ بِكَرَمِكَ، وَ احْفَظْنِي بِحِفْظِكَ وَ سِتْرِكَ يَا أَبْصَرَ النَّاظِرِينَ ".

[omelbanin]

السلام عليكم ،كيف الحال اخواتي،مرت 3ايام ورانا في اليوم الرابع ،دنيا تجري .
اللهم اجعلنا في الشهر من الصائمات ،القائمات،التائبات ، القانتات.امين.

[ahlam2060]

صباح الخير بنات صح رمضانكم انشاء الله تكونوا كامل بصحة جيدة يا رب

[سمراء الدنيا]

السلام عليكم و رحمة الله
فتحت موضوع اليوميات في عجالة و ان شاء الله نسرد يومياتنا خلال الشهر الفضيل و نستفيد من بعضنا بعض
و لي عودة باذن الله لوضع يومياتي و برنامجي للشهر الفضيل
http://www.djelfa.info/vb/showthread.php?t=1961429

[فراشات العمر]

والله خسارة يتسكر الموضوع والفتو بزاف المهم خيرها في غيرها
ام البنين راجلك يحب لفساد ولا لالا انا كنت دايما نهدرلكم على القضيان بزاف وليت نخبي ونخبي حتى ملقيتش وين نخبي ولاو لولاد يكرهو من لحوايج بزاف مشماش وخوخ موز مع كل انواع الخضار يوليو يفسدولي في الثلاجة ومنطيشهمش حتى يشوفهم هو ويطيشهم حتى تقلق وقالي مانزيدش نصرف ولا نقص وحدو اقتنع بلي ماش المشكل في المصروف المشكل في كثرة القضيان وناكلو غير القديم ودايما نسمعو علاه مانكلوش الجديد حتى ناكلو تاع سمانتين وربي يهدي كل ازواجنا
بالنسبة لرمضان متهنية راجلي يحب غير طبسي تاع الشربة فوق الطابلة الكسرة يخبيها تحت الطابلة وشوية سلاطة واي مقبلة

[عفّة]

السّلام عليكم و رحمة الله
جميل جدا التنظيم والترتيب
لكنني لست من النوع الذي يمشي على منهجية

[maloo]

فضل ذكر الله
كلما أكثرت من الكلام كثرت أخطاؤك إلا " ذكر الله "
فكلما أكثرت منه مُسحت أخطاؤك ..
ذكر من حولك بالله .... !!قال تعالى :"وسيق الذين اتقوا ربهم إلى الجنة زمرا"
يقول ابن القيم :
يأبى الله تعالى أن يدخل الناس الجنة فرادى فكل صحبة يدخلون الجنة سويا"
يارب أجعلنا من الصحبة الصالحة