فراش البيبي بغرزة الضفيرة للاخت meriama13

fifiarch · 2012-05-06, 23:31

مساء الخير لبنات كامل
وبخاصة اختي
راني جبتلك بساط البيبي لي سالتيني عليه

اولا هذا مودال لبساط لكن مخدوم بغرزة الياسمينة المقلوبة
شوفي فكرة المخدة والدونتال على الجوانب هايل
العمل نتاع اختنا نبوغ
في دورة تعلم السموكس

وضك نجو لخدمتنا
اولا جيبي ثلاثة امتار قماش ساتان روايال
والقطعة تكون هكا

مبعد قسميها بهاذ الشكل وتهمنا القطعة الكبيرة هاذيك
لي عرضها متر وخمسة سنتيمترات وطولها مترين
لانو هاذيك لي راح نخدمو بيها السموكس
والباقي نتاع القماش نخدمو بيه المخدة والتبطين نتاع البساط من الخلف
وهكذا تقسمي القماش

بعدين تهزي القطعة لي قلنا نعملو فيها السموكس
وترسمي فيها كادر نتاع خمسة سنتيمتر من كل جيهة ونعتبروه حق الخياطة
هكذا

بعدين تنقلي الباترون هذا نتاع غرزة الضفيرة كيما موضح على ظهر القماش
بحيث المربع الصغير نتاع الباترون بعد الضلع نتاعو هوثلاثة سنتيمتر
وبين مجموعة اعمدة واخرى تخلي تسعة سنتيمتر
وتنقلي الباترون كيما موضح

بعدين تخدمي غرزة الضفيرة العادية لي نعرفوها حتى تكملي كل قطعة القماش
تتحصلي على قطعة
طولها حوالي متر
وعرضها حوالي ستون سنتيمتر
تجي قد البيبي ممتازة
بعدين تقصيلها قطعة قدها من القماش لي بقا وتخيطيها فيها من ثلاثة جهات وتخلي جيهة
باه تدخلي فيها البونج
كيما نديرو البساط بالبونج عادي
وبعدين تغلقي
وتنظميها وتديري الدونتال على الحواشي الاربع

والقماش الباقي ديري بيه مخدة
ابعادها خمسين سنتيمتر على اربعين
وانقلي عليها نفس الباترون وطبقي عليها نفس الخدمة تخرجلك باذن الله هايلة
وماتنسايش التزيين بالدونتال

نتمنى شرحي يكون واضح
واي استفسار راني هنا