فرحتي لم تظهر مع كربي ساعدوني

[مشكلتي]

السلام عليكم أخوتي في الله
اليوم تجرأت باش نحكيلكم مشكلتي لي عدبتني راهي في شحال و مانيش عارفه كيفاش مام با نبدا
أنا بنت بدات همومي يوم تخطبت و هادي الخطبه خلات كامل الناس يدورو علي حتى صحاباتي و حتى لهنا نورمال بويسك مهما كان هادو غير صحابات. بصح لي ضروني بزاف انو خالاتي دارو علي و بنات خالاتي تاني لي تربيت معاهم
المهم دارولي بزاف حوايج وقاسوني بزاف لدرجة اني مانيش عارفه واش هي فرحة الزواج بصح الحمد لله أمي وقفت معايا و هدا راهو قاتلني بويسك صلة الرحم تقطعت و حاسه امي توحشت تروح لدارهم كيما بكري بصح هوما راهم شغل كي تدخل عليهم تكلي ضيفه و واحد من خالاتي لي جرحتني بزاف لدرجة وصلتها لقدفي في عرضي مام با متشوفش أمي و تتخزن منها كي تروح ليهم
مهما صرا و مهما كحال قلبي بعد ما عايروني و كبرو في الفرحه و قاسو علي كلام يجرح عرضي حاولت نرجع الامور لماجاريها بصح هوما راهم مصريين على قطع العلاقه
منقدرش نقول أنو السبب انو خالاتي كبار و مكتبلهمش المكتوب لأنو بعد خطبتي تزوجت بنت خالتي و وقفو معاها و جهزولها و فرحولها يعني هادا تاني زواج لا؟
علاش وحده وقفوهالها و وحده راياو عليها و سهلوهالها؟؟؟
حبيت ندي رايكم راني هامله نتاع الصح دوكا كي ندير؟ أمي نحسها مالغري كرهتكم بصح نحسها توحشتهم و تغيضني كيفاش نرجعها ليهم؟ مع العلم حللتهم و طيحيت نيفي شحال من مره ليهم و كل مره يقطعوني؟
تاني حاجه نديهم معايا للعرس؟ علما ان أمي ماهيش قابله بويسك دارولي لي بروبلام في حنتي؟
راني حشمانه من هاد الوقت لي خلانا نحكو على دمنا بصح مازالني مشوكيا
حسيت ستخسرو في هادا الزواج
واش رايكم؟