غادي نطرطق

مشكلتي · 2012-02-01, 10:43

صباح الخير/مساء الخير

بغيت ندخل هنا ونفتحلكم قلبي لمعمر معنديش لمن نحكي غير ليكم..ندخل للموضوع انا في عمري23 عاقدة هدي عامين بشخص خدام ولباس بيه يكبرني ب10سنوات مزال مادرت العرس راجلي يسكن ويخدم فمدينة بعيدة علينا ومايجي يشوفني غير من شهرين الى 3اشهر غير فالعطلة ولازم كي يجي يشوفني كل يوم .. المهم المشكلة نتاعي هي راجلي حاسة بيه بخيل وهاد الشي كل يوم نقتنع بيه تصوروا عمرو في هاد العامين جا عندي وخلعني بشي كادو انا ماشي نتاع مادة ولكن غير من باب الذوق وقدام دارناا حتى الرسول صلى الله وعليه وسلم يقول تهادو تحابو المهم راني معمرة من جيهتو واحد المرة عفست على قلبي وطلبت منو دراهم نشري بيها حاجة عجبتني بزااااااااف وكانت اول مرة ضحك ضحكة طويلة وقالي غااااااااااااااااااااالية والمبلغ نحشم حتى نقولكم عليه ..مرة اخرى قولتله فليكسيلي قالي صحة بعثلي100دج ......دايما كي نخرج للسوق نقوله عجبتني شي حاجة ومعنديش دراهم يسكت ويغير الموضوع.. واللي راها باقية فيا عمره وسقساني وقالي واش يخصك ؟؟؟علاش منستهلش انا جميلة جداا وهدا بشهادة العدو قبل الصديق البعيد قبل القريب راني عاقدة معاه وراهم يخطبوني.. انا عمري تصورت نرتبط بواحد بخيل لان هاد الصفة نكرها والراجل اللي تكون فيه تقلل من الرجولة نتاعه بالنسبة ليا هو يقوول يبغيني ويموت عليا ومستعد يجيبلي النجووك ولكن غير بلهدرة .. دايما نقول كاين اللي كيفي ولا غير انا هاد المرة مشيت لبنت عمي وهي مخطوبة كي دخلت لبيتها بقات توريني لكادويات قالتلي كل مايجي عندي يجيبلي كادو حتى مالقيت وين نديرهم وسقساتني انتي واش جابلك ؟؟.. وعندي صحبتي اخرى حتى هي عاقدة بلا مانحكيلكم كل مرة يعطيها دراهم .. خلاصة القول انا منقدرش نعيش مع واحد يكون مسمار ..دارنا الحمدلله الحاجة اللي نطلبها يجيبوهالي ولكن مبعد لعرس كيفاش يبقاو يخدموا عليا؟؟؟قولولي واش ندير غادي نهبل معاااااه لوكان مكنتش عاقدة نرمي الخاتم ونتهنى

sabrina2007 · 2012-02-01, 13:08

تعرفي انا كنت كيفك خطبني واحد مش قصة ماجيبليش ولكن لم احس يوما اني اعز عليه من الدراهم بصراحة بطلته لاني لا اطيق العيش مع انسان بهذه الصفة

نجمة ساطعة · 2012-02-01, 13:13

اختي الكريمة ربي يصبرك يا رب ... راكي خلعتيني كي قلتي نكره البخيل
و زهرك حطك في البخيل لاني شوفي زوج حوايج يا لو كان يعود مصعب بن عمير
ما راح نتزوجو و عانس بدراهمي و دراهم بابا نعيش ملكة و لا زواج كيما هذا
بخيل و شكاك ... منقدرش اقسم بالله غير اكثر شيء امقته في الرجل البخل
يا لطيف بعيد الشر

loulou88 · 2012-02-01, 13:23

السلام عليكم
اولا انتي عاقدة يعني زوجك شرعا وقانونا
لذلك حاولي ان تصلحي اخطاؤه ليس بقسوة بلطف لأنه زوجك ، انتي اهديه شئ بسيط مثلا ساعة ،عطر ....سوف يحس بأنك انتي احسنتي إليه سيبادلكي بنفس المعاملة
واريد ان اوضح ليس معناه تجيبلك نجيبلك لا انتي هنا تحاولين ان تشعلي فيه صفة الكرم أو مثلا قولي له : لماذا لا يشتري شئ لامه او أخته كهدية ؟وسترين سيترك عادة البخل
واكيد زوجك فيه صفات رائعة حاولي ان تتذكريها حتى لا تكرهيه وانتي لم تدخلي بيته بعد
وفقكي الله

نجمة ساطعة · 2012-02-01, 16:55

اقتباس:

المشاركة الأصلية كتبت بواسطة loulou88

السلام عليكم
اولا انتي عاقدة يعني زوجك شرعا وقانونا
لذلك حاولي ان تصلحي اخطاؤه ليس بقسوة بلطف لأنه زوجك ، انتي اهديه شئ بسيط مثلا ساعة ،عطر ....سوف يحس بأنك انتي احسنتي إليه سيبادلكي بنفس المعاملة
واريد ان اوضح ليس معناه تجيبلك نجيبلك لا انتي هنا تحاولين ان تشعلي فيه صفة الكرم أو مثلا قولي له : لماذا لا يشتري شئ لامه او أخته كهدية ؟وسترين سيترك عادة البخل
واكيد زوجك فيه صفات رائعة حاولي ان تتذكريها حتى لا تكرهيه وانتي لم تدخلي بيته بعد
وفقكي الله

زيد هي تهديلو البخل للاسف صفة ممقوتة في البنت و الولد
و من شاب على شيء شب عليه ... لو كان تهديلو كنوز الارض
لن يتغير ....
هي قالت لكم انها تطلب منه و لا يلبي ما معنى هذا ؟؟؟

عُضو مُحترم · 2012-02-01, 18:11

والله يا اختي

من جيهة على حساب واش كتبتي راه بخيل

و لكن ربما هناك وجهة نظر اخرى ما سمعناهاش

ربي يرزقك الزوج الصالح الكريم
============
رايح نخمم مليح في موضوع الكادوات هههه

loulou88 · 2012-02-01, 19:35

اقتباس:

المشاركة الأصلية كتبت بواسطة نجمة ساطعة

زيد هي تهديلو البخل للاسف صفة ممقوتة في البنت و الولد

و من شاب على شيء شب عليه ... لو كان تهديلو كنوز الارض
لن يتغير ....

هي قالت لكم انها تطلب منه و لا يلبي ما معنى هذا ؟؟؟

السلام عليكم اختي لم تفهمي ما اود الوصول اليه هي لما تهديه شئ كأنها تنوره بأنها هي احسنت اليه باتلمقابل هو اكيد سيفطن لحاله ويتحرك فيه شعور الجودة والكرم
لذلك انتي لا تقولي له اعطيني و جيبلي هكاك يكره
+ ممكن هديك تبيعتو ليس ررومانسي يعني كي تكون مناسبة اكيد شرالك حوايج الفاتحة والعقد راكي تعرفيهم وراح يشريلك حاجة دهب ساسلة ولا مقياس شئ لي يقدر عليه صح؟ااكيد صح زيد بلاك حاب يشري دار يلم في الدراهم متدري اختي
ماهو الحل؟ هل تنفصلين؟؟وانتي لم تدخلي بيته بعد؟؟ انصحكي باالتأني
المهم كلاني قلبي عليك
ربي يهديه ان شاء الله

loulou88 · 2012-02-01, 19:51

اقتباس:

المشاركة الأصلية كتبت بواسطة نجمة ساطعة

اختي الكريمة البخيل بخيل يعني ميحكوش فيها اثنين ....

نقولك قصة عندي وحدة متزوجها احد اقاربي بعيد الشر
كل العائلة عارفتها انها بخيلة لدرجة لا تتصور لانها تربات
في عايلتها هاكة تعرفي زوجها كان فحشوش و عايش الحياة
بعد العشرة رجعاتو كيفها قدقد
مثلا زوجها يخلص اكثر من 11 مليون للشهر معندهاش ولاد ياسر
آخر مرة شفتها في عرس عائلي لابسة فستان باين عليه غالي
راسي حبس هههه ما استوعبتش كي سولت قالولي تاع مرت
خوها سلفتها هههههههه قتلهم انا ثاني عقلي ما تقلبش الامر

اختي لانها عاقدة كون قريتي اول رد ليا تلقييني كتبتلها ربي يصبرك
يا رب منحبش خراب البيوت لازمها تتحملو كون جات محطوبة برك
كون قتلها زيدي خمي مليح

المهم ربي يهنيها برك

اختي علاه تخلعي فيها بحكايات
المهم حنونتي حنا ل 2 نحبولها لخير
ربي يهديه انا مديت فكرتي
سلااااااااااااااااااام

alaaemica · 2012-02-01, 13:24

الرجاء الكتابة بالعربية

الدكتور سام · 2012-02-01, 13:38

بصراحة ادا كان زوجك كما حكيتي.راه صح بخيل.و البخل صفة مدمومة.رب يصلح الامور و يرجعو سخي ان شاء الله

أم البراء السلفية · 2012-02-01, 13:40

السلام عليكم ورحمة الله وبركاته
الحب لي حبولك خيرمن بنات عمك وصحاباتك
والكادوات لي جابولهم
+
هذي ترجع للظروف ولا لطبيعتو هو كشخص
ولا بالاك ما يفيقش للحوايج هذو يعني جيبيهالو
غير مباشر بالاك يفهم وما يهموش لي كادو ولا لفليكسي
على ما أظن كاين حوايج أهم ما يهمش واش كسبتي
منو كحاجات مادية يهم واش كسبتي كحاجات معنوية

جسور المحبة · 2012-02-01, 14:30

يا اختي كاين رجال لي ما يفثموش وما يعرفوش مش بالضررورة بخلاء ولازم تقوليلو بطريقة غير مباشرة انا بزاف حكاولي على رجالتهم بصح ظهرو ما يعرفوش وما لقاوش لي يقولهم
ربي يكون معاك

rimana · 2012-02-01, 14:45

سلام
شوفي اختي والله راني حاسة بيك دوك نحكيلك انا تاني شوفي
انا تاني مخطوبة ونهار جاو يخطبو زعما فيونساي وخطبة
واش جابو لي جابلي باطة باتيسلي +خاتم وجاو وانا كي شفت المخطوبات صح غاظني الحال ونقنطت حتى دوك يبداو يقولولي درا شوفي واش جابولها شوفي .وانا صح مصبرتش قتلو معجبتنيش خطبة وقتلو من بعد بدا يرقع مرة على مرة كي جيني يجيبلي ريحة ديودورو مرة جبلي مونتو ..وانا تاني نحسو يالطيف مسمار +تيليفون مرات ربع ساعة نص ساعة يقولي نروحو نرقد خدام مي كومام تغيد شوية مي انا ماشي عاقدة وماشي مفتحة +مرات نحس روحي هو في طريق وانا في طريق
.صح هادو حجات ميهموش مي كامل لبنات يديرولهم كادوات صح تغيض مي انت بادري ديريلو كادو .وانت مرة على مرة ديري روحك زعفتي وبينيلو الحاجة لي معجباتكش ماشي تدوسي معاه مي حسيه بلي معجبكش الحال انا علبالي بيك بلي ماشي بيك المادة بصح قدام ناس حشومة وتحيري واش تقولي كيما انا رجعت نكذب نقول لي مكاش كيما نهار الخطبة واش جبولك ’’’’’’’’’’؟

صراحة هي صح .مي متمرقيهاش كي قتلك زعفي ..+ وشوفي هد التصرفات من جهة منطقية وواسعة
اما لي راهم يقولو ميعرفوش ميتمسخروش ’’......انا تاني قالي منعرفش مي معندوش خواتاتو؟ معندوش صحابومزوجين ؟ كي تتلفلو اروح للكوسميتيك يعطيلو واش يحب يديرو رحهم ميفهوش هادي هي
ولي فيها الخير ربي يجيبها

النجمة القطبية · 2012-02-01, 16:25

اختى الكريمة
نقولك فى البداية مبروك عليك وبالرفاه والبنين باذن الله
نرجعو للموضوع
يا اختى انتى ذكرتى كلمة بخيل وهاذى كلمة كبييرة بزاف بزاف كيفاش قدرتى تحكمى عليه وانتى مازال متعرفيهش
يعنى المفروض هو خطيبك برك ومازال متعرفيهش
متحكميش على الناس قبل ما تعرفى
واحسن شئ متقارنيش مع فلانة وفلانة لان كل واحد واش كتبلو ربى وربى يعلم كيفاش راح يعيشوالمستقبل
شوفى هذا انسان داخل على زواج ومسؤوليات بالاك راه يحط كامل دراهمو فى بيت الزوجية وبالاك صرف بزاف وظروفو متساعدوش
ومثلما يقول الحديث التمس لاخيك سبعين عذرا
المهم انا تقولك متتسرعيش واحسن حل هو الحوار قبل ما تظلمى و زيدى صلى صلاة الاستخارة عدة مرات
واللى فيه الخير يجيبوا ربى
بالتوفيق

hamzagolf6 · 2012-02-01, 16:41

اختي خطيبك هذا عجبني بزاف ووان شاء الله لما نخطب نكون كيما عقليتو
بصح نتوما تانيك راكم كثرتو علينا