أسبوع متعب للغاية !!!!

فريال المحتاجة عفو الله · 2011-12-01, 09:59

بسم الله الرحمن الرحيم و الصلاة و السلام على أشرف الأنبياء و المرسلين محمد صلى الله عليه و سلم
هذا الأسبوع كان متعبا للغاية بدأنا يوم الأحد مع مادتي اللغة العربية و الانجليزية ... العربية الحمد لله خدمت مليح كي العادة و النص كان رائع لميخائيل نعيمة و + لقيت الموضوع في الانترنت ( بعد ما درناه للأسف ) و كانت الإجابة موفقة على العموم
الانجليزية أيضا كان سهل بصح الفقرة تحكي على correption اللي هو الفساد و أنا بلا مافقت مع روحي درت على counterfeiting اللي هو التحريف أو التزوير بالرغم من أنو التحريف نوع من الفساد إلا أني عاودت الفقرة كاااملة شطبت علاها و عادوت كتبت ... والله العظيم الفقرة الأولى اللي عملتها كانت هااايلة و غاضتني روحي كي فاسيتها هههه و الثانية جات أبشع مما يكون خاطر عملتها في 5 دقايق

روحت على 03 بقيت نراجع في الرياضيات حتان للـ 05.30 دون توقف و مبعد رحت لليكور رياضيات و كلي أمل انو يعمللنا تمرينات باش نراجع مليح و كي نروح ما نمسش الرياضيات و نبقى غير مع التاريخ و الجغرافيا بصح الأستاذ ( أستاذي في الثانوية ) قالنا لا نعملو درس
المهم روحت حفظت تاريخ و جغرافيا و واش من حفظ هكاك برك و الله كنت تعبانة
رقدت على 12.30 قريب و انا مانيش مكملة حتى مادة التاريخ و نضت على سعدي على 05.00 حفظت
درنا المات و عملت أخطاء ما نحكيلكمش علاها أختي الصغيرة اللي تقرا في الابتدائي تعرفهم المهم ديت 15/20 و مانيش راضية عليها
التاريخ و الجغرافيا جاوني حوايج جامي سمعت بيهم و اضطريت نجاوب حسب الفهم لذا لا فكرة لدي إذا خدمت و إلا ما خدمتش
نهار التلاثاء عملنا علوم و صرات وحد المغامرات في الأقسام النهائية نتفكرها نضحك جابنا 2 تمرينات الأأول سهل جدا ( يشبه لتمرين الفرض و الثاني مليح كي نقلكم تمرين تع باك ) أنا بديت بالتمرين الثاني و حصلت فيه و الغاشي كااامل آآه ساهل الامتحان هذا وش بيك
ما انتبهتش ليهم و بقيت مركزة و هي الفكرة أنو عطانا سلسلسة غير معبرة و نخرجو arn m و الرامزات المضادة تع arn t و ممبعد نخرجو الأحماض أنا ظنيت بللي سلسلة معبرة كي خرجولي التلاثيات ما لقيتهمش بجدول فك الشيفرات اللي عطاهولنا
ما نطولش عليكم فقت بيها بعد 30 دقيقة ههه نص ساعة و أنا في سؤال واحد و الناس الكل عمرت الورقة غير أنا نخربش وحدي ... خرج عقلي من راسي حتان لقيتها و كملت التمرين الثاني و بديت في الأول و ممبعد الغاشي كمل التمرين الأول السهل و راحو للثاني و هادي ناضت تبكي و لوخر يعيط و يضرب في راسو قالولو يا أستاذ راك غلطتي و أنا غير نضحك
قلت ما نقلهمش خللي يكتشوفها وحدهم
80 بالمئة من قسمي حلو تمرين واحد ... و في المساء درنا فرنسية و خدمت الحمد لله
روحت على 3 بقيت مع الفيزياء حتان للـ 9 و الحمد لله جابت نتيجة جانا موضوع فيه 04 تمرينات ( 2 فيزياء نووية و 2 كيمياء ) و راني نستنى في علامة مليحة ان شاء الله
التربية الإسلامية موضوع سهل سهل سهل جدا جاوبت في 1/2 ساعة و جيت خارجة ( ربي يستر ) أبي قاللي تعمليها نهار الباك اكي مهبولة
اليوم درنا فلسفة و ما كنت حافظة واااالو خربطت من راسي و جيت خارجة ( درت ساعة وحدة برك )
الحمد لله يا ربي بصح و الله غير عييت عدت نغمض عيني نشوف الدالة الأسية و قانون التناقص الإشعاعي هبلت
و راني مقصرة في العبادة شوية ربي يغفرلي برك

و انتوما احكولي واش صرا معاكم بالتفصيل خللي نعيشو أجواء مغايرة للروتين اللي عايشينو

raoufit · 2011-12-01, 10:11

قصة جميلة هههه
كون تقدري تحطينا مواضيع الإمتحانات تاعكم خاصة تاع الفيزياء اللي قلتي فيه 4 تمارين

sami47 · 2011-12-01, 10:15

اقتباس:

المشاركة الأصلية كتبت بواسطة raoufit

قصة جميلة هههه
كون تقدري تحطينا مواضيع الإمتحانات تاعكم خاصة تاع الفيزياء اللي قلتي فيه 4 تمارين

4 exercice :
https://www.djelfa.info/vb/showthread.php?t=791764

فريال المحتاجة عفو الله · 2011-12-01, 10:26

اقتباس:

المشاركة الأصلية كتبت بواسطة raoufit

قصة جميلة هههه
كون تقدري تحطينا مواضيع الإمتحانات تاعكم خاصة تاع الفيزياء اللي قلتي فيه 4 تمارين

حسنا درك نسكانيه و نحطو ان شاء الله

وحدي في الظلام · 2011-12-01, 10:31

الحمد لله

ربي يوفقنا اجمعييييييين

هدوء قاتل · 2011-12-01, 11:49

الــــــسلام عليكم ورحمة الله وبركاته
أهلا أختي فريال كيف حاللك ؟؟
أرى أنك أجهدتي نفسك كثيرآ
بالنــــــــــــــــسبة لي
هذه أول مرة اتعامل فيها مع الامتحانات
بهذه الطـريقة ...التي أفقدتني صوآآبي
يومي الجمعة والسبت إستغليتهما بحفظ الجغرافيا وحل تمارين مواد علمية في ليكور
يوم الأحد كان ان إجتزنا الادب العربي شعر لايليا أبو ماضي
الجميع كان يشتكي من صعوبة فهم القصيدة
حتى الأسئلة كانت غامضة نوعا ما 4 أسئلة في بناء فكري
إستغرقت مني الاجابة عنها 3 صفحات اما البناء اللغوي صفحتان (( استعنت بورقة إضافية لكن لم أكتب فيها كثيرآآ ))
لكن الحمد لله نقولو خدمنا
اما بخصوص الانجليزية من نفس اليوم كانت طويلـــــــــــــــــــــــــــــــــــــــــــة للغاية (( ساعة ونصف ))
نقولو خدمت تاني صآفا
كي روح ــت على 12 بعد تغديت طول رحت لتاريخ حكمتها معاه حتى 5 مافهمتش كيفاش ادالي وقتي كامل
حتى الجغرافيا مازال ماقلتش فيها بسم الله المصطلحات والوو والشخصيات عيني عينك
ماصدقتش روحي الرياضيات يعني مزية كنت مراجعة في الويكاند
فشلت بزاف ويأست طبقت الكراس ورحت نحل تمارين رياضيات لقيت روحي نخطأ في أتفه الاسباب
رغم اني فاهمة ماعرفتش واش صرآلي هذاك النهـآر يعني كنت خارج مجال التغطية
جيت نوض الصباح الاثنين كاشما نحفظ شخصيات ولا مصطلحات غلبني الرقاد

وتبدأ تبدأ الكوارث إجتماعيات ورياضيات
اجتماعيات الي توقعت مانجيبش فيها خدمت وجابلي ربي صحيحة في كل شيء رغم انها جات صعيبة
مي الي في رأسي حطيتوو + رياضيات الي كنت واثقة منها خليتها واخطاء تافهة جدا قريت نقطع قشي
غلطت في وحد المعادلة الاسية ماعلاباليش عمييت عليها ولا ماعرف كيفماه
المهم .. كي روحت نحيت على بالي شوية وبديتها مع علوم وفرنسية
علوم راجعت من 1 - 6 وانا معاها ومنبعد رحت لـفرنسية هزيت نماذج من نت قعدت معاها لـ 9
ومنبعد حليت شوية تمارين في علوم ورقدت
كي جانا سوجي طويل بزاف مي الحمد لله حليت مي كي خرجت فقت مع روحي بلي غلطت في زوج تمارين
وتحل الطامة الكبرى كي جيت نعقب فرنسية بقيت غير نفكر في علوم
فرنسية جات صعيبة بزاف ومانديتش فيها غير بعد نصف ساعة (( لاني كنت الوم نفسي على العلوم ))
مي الحمد لله متمكنة منها حليت وانا متأكدة وخرجت
نهار الشريعة الحمد لله يعــــني عقبت وكالعادة رايحة نغلط نغلط في امور تافهة
اليوم عقبنا فيزياء خدمت فيها وان شاء الله نضمن علامة كاملة
فلسفة كتبتلو بيت شعري وجيت خارجة

تقبلي تحيآآتي أختك أميرة

هدوء قاتل · 2011-12-01, 11:54

أختي لا تجهدي نفسك كثيرآآ
فستنهارين أخ ـيرآآ
أنا بذلت مجهودا مضاعفا في البداية
وعندما وصلت الإمتحانات فشلت فشلا ذريعا
أما بخصوص نتائج الفصل الأول في الماضي كنت لا أقتنع بـ 16 كمعدل
أما الآن فقد لا أضمن 15
ولعل كل مانقومه به الاآن من أخطاء وهفوات نتداركه في فترة مابعد الامتحانات
بعون الله سبحانه
سلام

منة الرحمن · 2011-12-01, 13:07

اقتباس:

المشاركة الأصلية كتبت بواسطة ألٱميرة الچْزآﮰـڔية

أختي لا تجهدي نفسك كثيرآآ
فستنهارين أخ ـيرآآ
أنا بذلت مجهودا مضاعفا في البداية
وعندما وصلت الإمتحانات فشلت فشلا ذريعا
أما بخصوص نتائج الفصل الأول في الماضي كنت لا أقتنع بـ 16 كمعدل
أما الآن فقد لا أضمن 15
ولعل كل مانقومه به الاآن من أخطاء وهفوات نتداركه في فترة مابعد الامتحانات
بعون الله سبحانه
سلام

نفس الشي نعاني منو .....

العام للي فات كنت ندي 17 و نحمد ربي لكن ما كنتش تعجبني ... العام هذا كيفك 15 ما نقدرش نضمنها ...

الأساتذة حكمو القسم تاعنا على أساس قسم تاع قرايين لكن المصيبة أنهم عاينونا (و هذا أغلب الظن ) ... و لوكان تشوفيهم أختي ....

أستاذ الرياضيات محطم من نقاط الفرض للي ديناهم ... و دوك يزيد يصحح الاختبار يزيد يتحطم ... هههههه

أستاذ الاجتماعيات غير البارح و هو يحلف فيا .. قالي نرجعو الأسبوع الجاي و نحاسبك .... هههه

أنا شخصيا لا تعليق ... هرتها في المواد كامل ... ما عدا الانجليزية ... قلتلهم كي ما نخدمش في كلش الانجليزية برك نخدم فيها .... هههههه

الفيزياء و العلوم ربي يستر تاني ....

علابالي كامل رايحين يتصدمو كي يشوفو نقاطنا ...

لكن على كل حال الصح مش اليوم ... نهار الباك هو الصح

فريال المحتاجة عفو الله · 2011-12-01, 13:09

اقتباس:

المشاركة الأصلية كتبت بواسطة منة الرحمن

نفس الشي نعاني منو .....

العام للي فات كنت ندي 17 و نحمد ربي لكن ما كنتش تعجبني ... العام هذا كيفك 15 ما نقدرش نضمنها ...

الأساتذة حكمو القسم تاعنا على أساس قسم تاع قرايين لكن المصيبة أنهم عاينونا (و هذا أغلب الظن ):d:d:d ... و لوكان تشوفيهم أختي ....

أستاذ الرياضيات محطم من نقاط الفرض للي ديناهم ... و دوك يزيد يصحح الاختبار يزيد يتحطم ... هههههه

أستاذ الاجتماعيات غير البارح و هو يحلف فيا .. قالي نرجعو الأسبوع الجاي و نحاسبك .... هههه

أنا شخصيا لا تعليق ... هرتها في المواد كامل ... ما عدا الانجليزية ... قلتلهم كي ما نخدمش في كلش الانجليزية برك نخدم فيها .... هههههه

الفيزياء و العلوم ربي يستر تاني ....

علابالي كامل رايحين يتصدمو كي يشوفو نقاطنا ...

لكن على كل حال الصح مش اليوم ... نهار الباك هو الصح

فعلا نهار الباك يبان كلش و ان شاء الله الأخطاء اللي نعملوها درك ما نزيدوش نعاودوها
أنا الحمد لله الأخطاء اللي عملتهم في الفروض ما عاودتهمش في الامتحانات و يااااا ربي أخطاء الامتحانات ما يكونوش في الباك و هكذا
من الخطأ نستفيد و جل من لا يخطأ

هدوء قاتل · 2011-12-01, 13:50

اقتباس:

المشاركة الأصلية كتبت بواسطة منة الرحمن

نفس الشي نعاني منو .....

العام للي فات كنت ندي 17 و نحمد ربي لكن ما كنتش تعجبني ... العام هذا كيفك 15 ما نقدرش نضمنها ...

الأساتذة حكمو القسم تاعنا على أساس قسم تاع قرايين لكن المصيبة أنهم عاينونا (و هذا أغلب الظن ):d:d:d ... و لوكان تشوفيهم أختي ....

أستاذ الرياضيات محطم من نقاط الفرض للي ديناهم ... و دوك يزيد يصحح الاختبار يزيد يتحطم ... هههههه

أستاذ الاجتماعيات غير البارح و هو يحلف فيا .. قالي نرجعو الأسبوع الجاي و نحاسبك .... هههه

أنا شخصيا لا تعليق ... هرتها في المواد كامل ... ما عدا الانجليزية ... قلتلهم كي ما نخدمش في كلش الانجليزية برك نخدم فيها .... هههههه

الفيزياء و العلوم ربي يستر تاني ....

علابالي كامل رايحين يتصدمو كي يشوفو نقاطنا ...

لكن على كل حال الصح مش اليوم ... نهار الباك هو الصح

والله يا أختي منى تقول راكي تحكي على قسمنا
أحنا ثاني قسمنا أفضل قسم نهائي
لكن للاسف كون تشوفي قاع خليناهـآ في الإمتحانات
لا لا عادي صح النقاط ماشي ملاح
مي أكيد راح يمدولنا دافع بأآآش نجتهدوا أكثر
ونصلحوا أخطائنا والباك إن شاء الله نكونوا موجدنلوآآ على أكمل وجه

conviction · 2011-12-01, 11:22

هههه قصة مشوقة ، تبيين عى التضحيات لي يقوم بها التلميذ من آجل النجاح .
إنتي بربي إن شاء الله تجي دكتورة ... نتمنالك التوفيق الأخت

محمد بونعاس · 2011-12-01, 12:08

rabi ynajahna w yawafa9na brk ana koun nahkilak kifah 3agabt had smana mab9atach tafra

ح ـكآيه م ـبدع · 2011-12-01, 12:41

أختي نصيحة لك
ابداي دايما من بالتمرين السهل
و مباعد التمرين الثاني ابداي بلي متأكدة منهم كيما التعريفات و ما شابهها
و لي متأكدة منو اكتبيه على ورقة الاجابة باش ما تضيعيش الوقت
و جامي تبداي بالتمرين الصعب
تلقاي روحك فاتك الوقت و مباعد تنساي الاسئلة الصعيبة وتولي في حصلة
*---*-*-*----**-*-----*-*-*----*-*---
بالنسبة ليا كنت انا دايمن نبدا بالأسئلة السهلة و مباعد ندير شوية كلون نتاع صعيب
و ما نجيبوش الباك السنا و ما شابهها هههههههه
و مباعد نبدا في الصعيب
اما الفصل الثاني
نجي و نتمسخر شوية و نخرج
و لاثالث وقيلا ما رحتش نصو
جبت 7 المعدل ههههه
و آخرتها جبت الباك لول

~خيرات حِسان~ · 2011-12-01, 19:40

اقتباس:

المشاركة الأصلية كتبت بواسطة thomas knoll

أختي نصيحة لك
ابداي دايما من بالتمرين السهل
و مباعد التمرين الثاني ابداي بلي متأكدة منهم كيما التعريفات و ما شابهها
و لي متأكدة منو اكتبيه على ورقة الاجابة باش ما تضيعيش الوقت
و جامي تبداي بالتمرين الصعب
تلقاي روحك فاتك الوقت و مباعد تنساي الاسئلة الصعيبة وتولي في حصلة
*---*-*-*----**-*-----*-*-*----*-*---
بالنسبة ليا كنت انا دايمن نبدا بالأسئلة السهلة و مباعد ندير شوية كلون نتاع صعيب
و ما نجيبوش الباك السنا و ما شابهها هههههههه
و مباعد نبدا في الصعيب
اما الفصل الثاني
نجي و نتمسخر شوية و نخرج
و لاثالث وقيلا ما رحتش نصو
جبت 7 المعدل ههههه
و آخرتها جبت الباك لول

شكرا على النصائح أخي
ممكن تقولنا شعال جبت الباك "المعدل" ؟

بالقيم نرتقي · 2011-12-01, 12:47

أأأأأأأأأأأأأأأأأأأأأأأأأأوه واخيرا كملت
اليوم فيزياء 4 تمارين رقبتي تعوجت من التعب