هديتي للجميع بمناسبة رمضان

[أمــــال]

السلام عليكم ورحمة الله وبركاته

بمناسبة شهر رمضان المبارك اليوم جبتلكم لعبة جديدة من تراثنا القديم اسمها بوقالات بعد الفطور تتجمع كل العائلة والصدقاء وناخذ اناء من الطين اسمو البوقالة و نضع فيه اوراق مكتوب فيها كلام بالمعاني و كل واحد ينوي شخص في بالو و يحمل ورقة و يقرا حظو مع هذا الشخص سواء قريب او صديق او حبيب

وان شاء الله تعجبكم
اختر رقم من 1حتى 35 وعقد ونوي














1-خرت نهار الجمعة ، في يدى شمعة ، قالولي أمسحى ذيك الدمعة ، و انساي الخلعة ، قريب يتلموا احبابك و صحابك و يفرحوا معاك الجماعة .

2-الناس تنده بالرجال و الوالي ، وانا ننده بربي العالي .

3-لا تخمم في ضيق الحال شوف عند الله ما وسعها الشدة تهزم الارذال اما الرجال ما تقطعها .

4-حبيبك حبيه والسر اللي بيناتكم خبيه واذا حبك حبيه اكثر واذا نساك لاتسالي عليه.

5-حواجبك سود وعينيك ياقوت والله ماننساك حتى نهار الموت.

6- نزلت للبحر وجدت الرمل يغلي, حملت بيدي و حطيت في حجري, و الشاب إلي نساني راني عليه ادعي, إن شاء الله يرجع لي بحري.

7-هبط لقاع البحر ، فرّشت زربية ، خرجت لي جنية ، قالت لي واش بيك يا بنية ؟ قلت لها راحوا حبابي و خلاوني وحدانية.

8-الدالية دلات ..و دلّ العنقود ، خلي القمر ينكشف ، والسحاب يذوب ، و خلي لالات النسا تنال المرغوب.

9-يا شمس واش بيك ذابلة ، إلا لابيك الزين راني نفكر فيك ، و اذا بيك الزهر ربي ما يتخلي عليك .

10-دقتني شوكة في عين الركبة امسحت الدم ونسيت الهم.

11-رفدت الفاس وكسرت الكاس والله ما ننساك يا وليد الناس.

12-نديك نديك يا لو كان دمي يسيل قدام اماليك.

13-يا الشابة بشبوب الياسمين رانا فالقلب ولا رانا منسيين.

14-عندي طفلة شعرها عكري اللي يخطبها يجيني بكري الي عندوا المال يديها واللي ما عندوش يبقى يشوف فيها .

15-قطعت اللحم وعرفت عباروا وسمعت الكلام وعرفت من قالوا السبع في داروا والكلاب نابحة ما دارت والوا .

16-هبطت للبحر وصيدت ثلاث حوتات الاولى طرف فمها نار والثانية زنجار والثالثة قلبي معاها طار .

17-غرست وردة في محبس كبرت ودارت الشوك واش داني نلمسها حتى وليت مهلوك .

18-راكي يا بنتي كيف شجرة العرعار من برا خضراء ومن داخل نار .

19-اهبطت لجنان لقيت جنية قالتلي يا بنية مال ولا ذرية قلتلها ما نسحق لا مال لا ذرية نسحق سعدي يولي ليا .

20-الطمع يتلف الغنيمة و الخوف يفسد العزيمة ومكتوبي الزاهي يفرح لميمة .

21-ذاك السطح العالي فيه شفت الغالي وفيه نبات كي راه جاي غزالي .

22-اذا انت برنوس انا قفلة فيك ولا انت محبس انا وردة فيك واذا انت تحبني انا نموت عليك .

23-اتبع راي الوالدين ولا ماربحتش تسلك على خير .

24-يا ويح من طاح في بير واصعب عليه طلوعه فرفر ما صاب جنحين يبكي وسالوا دموعه.

25- يا شاغل الدماغ صرف من دخانها يعميك بالاك من المراة المجنونة تتلاقى هي والزمان عليك .

26-غرست ياسمينة في وسط الدار طاحوا وراقها وحد النهار قلت حبيبي نساني قالي ما نسيتكش بلعاني مالقيتش الطير اللي يوصلك سلامي .

27-مثلت روحي للحمام مبني على صهد ناروا من فوق ما بان دخان ومن تحت طابوا حجاروا .

28-يا قلب نكويك بالنار واذا بردت نزيدلك يا قلب خلفتلي العار وتريد من لا يريدك .

29-سافر تعرف الناس وكبير القوم طيعوا كبير الكرش والراس بنصف دينار بيعوا.

30-يا زارع الخير حبة ويا زارع الشر ياسر مول الخير ينبا ومول الشر خاسر.

31-خمري يا الخمري عايروني بيك وبعد المعايرة شاركوني فيك.

32-سفينة فوق سفينة والقلب معمر غبينة.

33-سيدي الطالب ديرلي مزرية جيبلي هذاك الشباب اللي مابغاش يخزر فيا انا شابة ورزينة بصح زهري دارها بيا .

34-غالي , غالي والغالي ربي مهما تروح وتغيب معزتك في قلبي.

35-بنت السلطان عليها ثلاث خطاب الاول فارس الفرسان والثاني كاشف الحلام والثالث يتمناها ترجع في يوم من الايام.

اموولة