قصيدة حيزيـــــــــــــــة للشاعر بن قيطون

[الفارس العربي]

رثــــــاء بن قيطون لحيزية بنت أحمد بن الباي سنة 1295 هــ


عزوني يا ملاح في رايس لبنات .................سكنت تحت اللحود ناري مقديا
.............................قلبي سافر مع الضامر حيزيا .............................

حسراه على قبيل كنا في تاويل .................كي نوار العطيل شاو النقبيـــــــا
ما شفها من رجال كي ظل الخيال .............صدت جدي الغزال تزهد عليـــا
إذا تمشي قبال تسلب العقــــــــال ..............أختي باين محال ماجت أمنيــــــا
جاب العسكر معاه والقوم من وراه ...........طلبت من لقاه في واحد بهديــــــا
ناقل سيف الهنود قي يومي باليد ..............يقسم طرف الحديد واللي صميـــا
............................قلبي سافر مع اللي رحلت من الدنيا......................

ما تشكرشي الباي جدك يا غناي .............بنت أحمد بن الباي شغلي وغنايـا
خلقت دار شطاح بروايح كفــــاه .............حاجب فوق اللماح مولعين بريــا
عينك خرد الرصاص مربوطة عالساس.....سوري كياس في يدين العربيــــا
خدها ورد الصباح وفرنك الوضاح .........والجمة عليه شاح مثل الضوايـــا
الفم كي العاج والمضحـــك لعـــاج ..........ريقك سيل لعاب عسل الشهـــايا
شوف الرقبة خيار من طلعة جمـار .........جعبة بلار والا قــــــزازيــــــــا
صدرك مثل الرخام فيه اثنين توام ...........من تفاح الزقام مسوه يديـــــــــا
.........................قلبي سافر مع اللي خلات ذي الكيــا......................

شوف السيقان بالخلاخل يا دبار ............تسمع في الرجل فراق فوق الريحيا
تصبح في الغزال تصرش للمــال ...........كي اللي ساعي المال بكنوز قويا
ما يسواش المال نقرات الخلخــال ...........كي نسبح عالحيال نلقى حيزيـــا
تستحوج في المروج بخلاخيل تسوج........عقلي منها يروج قلبي وعضايا
في التل مصيفين جينا محدورين..............للصحراء قاصدين أنا والطوايا ( الفرس)
الجحاف مقلقين والبارود ينيــــــن............لزرق بيا يميل لساحة حيزيــــا
......................قلبي سافر مع اللي رحلت من الدنيا ........................

ساقوا سوق الدلال حطوا عين آزال ........سيدي لحسن قبال والزرقا هيـــا
قصدو سيدي سعيد والمتكعوك زيد..........أمدوكال الجريد ضيق العشويــا
منو رحلوا الناس حطوا في البسباس .......بلهريمات قياس أختي حيزيـــــا
ماذا درنا عراس لزرق في المرداس........يدرق بيا خلاص قي روحانيـــا
في كل ليلة نزيد عندي عرس جديد ........في كل نهار عيد عندي زهويـــا
راقد طول لعلام جوهر في التبسام .........وتمعني في الكلام وتفهم فيــــــا
بنت أحميدة تبان كي ضي الومان ..........نخلة بستان قي وحدها شعويـــا
.....................قلبي سافر مع اللي رحلت من الدنيا .......................

يا حفار القبور سايس ريم القور ............لا تطيح الصخور على حيزيــــا
قسمتك بالكتاب وحروف الوهاب ...........ما طيحشي التراب على حيزيا
عشات تحت القبر والشاش معفر ...........أختي ضي القمر غابت عليـــا
لو نجي للمقر نسمع كان وصـــار..........نديها أنا جهار على القوم العديا
لو نجي للعلاب ننطع ثلث عقاب ..........نديها بالزناد على القوم العديــــا
إذا نحلة فراس مطبوعة لخراس ..........ما نحسبش الناس لو تجي ميـــــا
كي عاد أمر الحنين رب العالمين ........ما صبنالك منين نقلبها ديـــــــــــا
كي عاد حكم الإله سيدي مولى الجاه ....ربي رسل عطاه وادى لبنيــــــــا
ثلاثة وعشرين عام في عمر أم حزام ...منها راح الغرام ما عادش يحيــا
صبري صبري عليك نصبر للماديك ...نتفكر فيك يا ختي غير أنتيــــــــا
نبكي والراس شاب عن مبروم الناب ...فرقة لحباب ما تصبر عينيــــــــا
نبكي بكي الفراق كي بكي العشـاق .....قلبي زاد حراق ..خوضتي مايــا
يا عيني واش بيك وربي هاديك ........ربي يهديك ما تعفيش عليـــــــــا
...........................قلبي سافرمع اللي خلات ذي الكيا ................

الشمس اللي ضوات طلعت وتمسات ......كسفت بعد استوات وقت الضحيا
القمر اللي بان شعشع في رمضان .........جاه الوسيا وطال في وداع الدنيا
هذا درناه مثيل عن رايسة الجيل ..........بنت أحمد صيل شايعا ذواديـا
بيدي درت وشام في صدر الرخام ........مختم تختام في زنود الطوايـا (كتابة اسم حيزية على صدر الفرس)
درتوا بين النهود نزلتو مكــــدود .........فوق سوار الزنود حطيت سمايا
أزرق عنق الحمام ما فيهش تلطام ...........مقدود بالأقلام من شق يديـــا
اسعيد في هواك ما عادش يلقاك .............كي يتفكر اسماك تاتيه غمايـا
عزوني يا سلام في ريمة لريـــام ...........سكنت دار الظلام ذيك الباقيا
عزوني يا قعود في الزين المكدود ..........سكنت تحت اللحود ما رجعت ليا
عزوني يا صغار في عارم لوكار ..........خلات غير الدار عادت منسيـا
عزوني يا حباب فيها فرس ذياب ..........ما ركبوها انساب من غيري نايا (موت الفرس)
تسوى من البل عشرمية تمثيــــل .........تسوى غابة نخيل عند الزابيـــــا
........................قلبي سافر مع اللي وادعت من الدنيا....................

تسوى حومة تلول الصحراء وازمول .....ما ممشات الخيول عن كل ثنيـــا
تسوى اللي في البحور البادي وحضور ....أطلب نسل العمور تصفى غردايا
تسوى تسوى مزاب وسواحيل الزاب .....حاشا ناس القباب خاطي الوليــا
صدوا صد الوداع لزرق واختي قــاع .....من يدي طاح الصراع لزرق يا دايا
بعد شهر ما يحوم عن ذيك الملجوم ........بعد ثلاثين يوم أرى حيزيـــــــا
نوفي ذي الجواد واللي في لوهاد ..........بعد أختي قي زياد نحيا في الدنيــا
آمنا يا حنين أنا والوالدين ..................راه اسعيد حزين بيها الطوايــــــــا
.......................قلبي سافر مع اللي خلات ذي الكيا .......................

أرحم مولى الكلام واغفر لمولى الحزام .....لا قيهم في المنام يا عالي العليـــا
في خالد بن سنان بن قيطون فلان ...........قلنا على لي زمان شفناها حيـــــا
تمت يا سامعين في الألف وميتين ...........لحقت تسعين زيد خمسة باقيـــــــا
كلمة بن سي الصغير جبناها تعبير .........في شهر العيد الكبير تمت القصيـا
.....................قلبي سافر مع اللي رحلت من الدنيــا ........................

عفوا على رداءة الكتابة وغموض بعض العبارات فلقد قيلت قبل 135 سنة تقريبا