أريد الزواج فهل أنا مخطئة؟

[صبريـنة]

السلام عليكم إخواني أخواتي أريد أن أطرح عليكم قصتي ونبهوني إن كنت مخطئة، أنا فتاة من مواليد 1980 يعني راني كبيرة وما بقاليش نزيد نكبر أكثر في دار بابا، المشكل أنه يتقدم لي خطاب والأب ربي يسمحلو ويغفرلو ما يقوليش خلاص راهو يرد في الخطاب بلا ما يقولي وأنا كنت نظن بلي واحد ما خطبني حتى لقيت بنت عمتي في مناسبة وقالتلي: علاش رفضتي فلان راهو خطبك وراهو إنسان صالح، قلتلها والله ما علابالي وكي قلت للوالدة: قالتلي مع الأول " رانا بغينا تلقاي خدمة وإذا بغيتي بعدها تتزوجي اتزوجي ، والنهار اللي بعدو قالتلي: شكون راهو يكذب عليك ويقولك في هاذ الهدرة؟ راهم يكذبو عليك يا بنتي
راني قريب نهبل، بين الوالدين وإكمالي لنصف ديني أكيد راني ما نقدرش نعايب والديا اللي رباوني وتعبو على جالي ولكن هاذي سنة الحياة ما علاباليش كيفاش نتصرف وسمعت بلي كاين واحد باغي يتقدم ليا بصح راهو خايف من رفض الوالد والله راني ما نرقدش غير نخمم راني ما بغيتش نخدم باغية نتزوج ونكون أم هذا واش راني باغية ما عندي ما ندير بالخدمة