بسمك يا مجيب يا عالي العليا سهل ياربي في ما طلبتك ياو هاب
هاذي الدنيا الفانية لعبت بيا او مانحسبهاش اتدور على لعقاب
نفسي والشيطان دارها بيا وطاوعهم صغري عادو قاع اصحاب
مهر الصغر امسرجو تايه بيا رافع راسو للسماء شايش لولاب
للكيفان العالية هارب بيا ومدربيني على المواسح بيا راب
عارفها خاطيه ويقولي ليا شي الناس امحللو من غير اكتاب
واتفرقو لبطال كي طاحت بيا واخرج فيهم كاسح الخزرة رهّاب
ماضي العين اللي اضفارو موذية طرشون الحومة اللي ظفرو عطاب
اتحظنهم وادالهرم لايح بنيا وادرق صغري لهيه عليل غاب
طار اقرابي والرخم حط عليا ومن الفم تفرقت جماعة لحباب
البنة ضاعت كي طاحو سنيا واسماط اللي ضاري يطياب
ثقلت وذني و السمع غاب عليا وفارقنا درس المساجد والخطّاب
الشوف اللي بيه كانو عينيا اتبدلي في مضربو دمعة واضباب
واقضبني سطر الظهر واركابيا ثقلت رجلي عادت المشية تصعاب
ضركة عادت لارض طالبة عليا حتى انا عزيتها والنوم اطياب
حاجة جنبي عادت بعيدة عليا والماء في الاناء وانا قاب
من لا يفهم انفسرو ليه الرؤيا هذا فعل الهرم بعد الشباب
العمر اتحدر قربت الرحلة ليا وضني جاء فصل الحصيدة زرعي طاب
بسمك الاعظم نطلبك يا مولايا و بالرسول اللي رسلتو بالكتاب
خفف حملي راه ثاق بالسيئـــــا و الهمني عند القبر حسن الجواب
لامن نترجاه غير انتايا لا ماحي للذنب غيرك يا وهاب
اغفر لللامة مع والديا و السامع قولي بفضلك يا نواب
لخضر جعيدير كاتب هاذيا واجعلها يا ربي في الاخرة صواب
نختم بالصلاة عن سيد رقيا محمد شفيعنا يوم الحساب
لخضر جعيدير مسعد
( تقرير عن مشاركة سيئة )، و الموجودة أسفل كل مشاركة .
2008-07-22, 08:51
فعل الهرم بعد الشباب *للشاعر جعيدير لخضر
العرض الشجري