**نكار الخير**

[سارة 18]

نكار الخير
مليح لما الواحد يغير***على جال بلادو ويحبها
ويحب يشـــوفها ديما بخير***وفالمكــــــانة الي تناسبها
لما تربح من الفرحة يطير***يحتفل والدنيا يقلبها
ويدير كـــــامل واش يدير***يرفد علامها ويلبس ثوبها
كـــان كبيــــر ولا صغير***مفتـــــاخر بيـــها وبلعبـها
رافع راسو قــــــدام الغير***ويقول أنا واحد من شعبها
لكن انو في وقت قصير***تلعب مع فريق يغلبها
وتخسر كيفها كيف الغير***ولو انها ليست من قلبها
ذاك البنادم في وقت قصير***ينحي البذلة ويقلبها
ويـــوّلي يقولك تمسخير***ولا يلحــــــــق حتى يسبها
ولاّ يصبح لاعـب كبير***أو ينتــــقـد فيــها وفلعبــها
ولا يحسب روحو خبير***أو لعيــــوب كامل يصيبها
هاذ لبنــــادم نقولـو دير***فبـــالك بلي الخضرا شعبها
رابحة خاسرة مهما يصير***يبقى ديـــــما واقف جنبــها
وأنت راك تديـر فالسـمير***تبيّن فـروحـــك أو تلعبـها
غير فــدقيقة نكرت الخير***وشفّيـت فيها الي ما يحبها
شفيت النـــاس الــي تغير***وهاذ الشي يجيهاعلى قلبها
نهار خسرنا فرحو كثير***وكيما العادة بانو عيوبها
كيما الغندور والشــوبير***وأديب عمرو مـــا أدبها
بداو يقولوا حاجات تحير***الناس تحشم تقولها فــقلبها
وبراهيم الحجازي كبير***فالعمر بصح خــــــــاربها
ليل ونهار يهدر ويديـــر ***وكل حدوثة منين يجيـــبها
ومدحت شلبي الشرير***يشري الموت لو يصيبها
قاللهم .. مرضي خطير***شوفولي حـــــاجة نشربها
ماهي انفلونزا الخنازير***ماهي الطيور على حسابها
قالت آخر التقــــــــارير ***التأشيـــرة الّـــــي ما كسبها
وكيما هو كاين كثيير***في دكاكين الفتنة واصحابها
الي ما يحبـولناش الخير***مزيـــا برك ربــي خــيبها
ومزيا حنايا قلبــنا كبير***وما حبيناش ندخلوا فلعبها
والناس الي عندها ضمير***عمرها ترد عليّ يسبّــــها
أو فريــقـنـــــا ربح كثير*** وتكفي النتــــائج الي جابها
فريق تكوّن فوقت قصير ***خرج مصـر من أعصابها
ونشــاء لله مـــزال الخير ***منا للفــوق وين يصيبـها
رايحة تكونلو بوابـة خير*** أو يتأهل على حســـابها
عليــــها نقول فـــالأخير*** الي يشكك فلخضرا ولعبها
يتسمى نكّـــــار الخيـــر***ومستحيـــل يكـــون يحبها