قصيدة العزوبية

[سحر الجنوب]

نصحوني اصحابي مرة بالزواج .....وقالوا لي بركاك من التعواج
واهي رايحة ترميك الامواج ....اذا بقيت في بحر العزوبية
بقيت في الليل نطلع الحساب......ولقيت كلامهم صواب
وفي الغد بعثتهم نواب .......يطرحوا لاهلي القضية
بابا وافق في الحال ......وقال جيبوا بنت الخال
ويما جاها في البال.....تخطب لي وحدة بدوية
تفاهمنا على بنت المدينة ......قالوا راها فاهمة ورزينة
راهي تخمخم في الكوزينة ....تطبخ طبخات شهية
عولنا قصدنا الدار....حاملين في يدينا النوار
ودرنا رواحنا زوار .....قاصدين البنت المعنية
الراجل يشكر في بنته و يزيد.......قارية ما تركت مسيد
وصحيحة كالحديد .....بنت العلم والتربية
قلت واش هي الشروط ...راني صرت بيكم مربوط
ومالي عندكم محطوط .....ونزيد لكم الشهرية
قال لي يا وليدي سجل .....عشرين صباط باش تبدل
وخمسين سروال مفصل ......ويكونوا ضيقين شوي
وزيد كيلوا ذهب صافي ......وتجيبوا وانت زاهي
والشنتوف ماهو كافي ......راني درت فيك مزية
بنتي راهي غالية وشريفة .......ماتتركش يديها خفيفة
عشرين خاتم في قفيفة.......وتحطهم في يديها هي
كرفاش بولحية ماتنساش ....والمليون لازم يكون معاه
والحايك لازم منو تلقاه .....وتقدموا لبنتي هدية
قال لي اسمع يا سي موح ........بلاك تنسى خيط الروح
باش يزيد لبنتي في الروح........وتبقا ديما حية
تشري لها عشرين لكباش ......والجاج المشوي ماتنساش
جابو لي العروس للبيت ...وكي شوفتها من الخوف بكيت
قالت لي لازمني نبقى حرة .....ويماك لازم ترميها برة
وما تكثرش من الهدرة ......راني طفلة حضرية
قالت خف اطلع البرمي .....قلت يا امراه لازم تفهميني
ترفدي حوايجك وتلمي ......وتطيري اليوم عليه
:::::::::::::::::::::::::::::::::::::::::::::::::: ::::::::::::::::::::::::::::::::::::::
طبعا هاد القصيدة من تأليف شاب
وهادي ماشي ضد لبنات بصح فيها وجهة نظر
لا تحرموني من ردودكم


مع تحياتي سحر الجنوب

[هبة الله الرحمن]

السلام عليكم ورحمة الله وبركاته
اولا بارك الله فيك على كل كلمة كتبت هنا...انها رائعة..
وثانيا هى ليست ضد البنات كما قلتى... انه الواقع وما يحصل فى مجتمعنا...
تقبلى مرورى المتواضع على صفحتك

[سحر الجنوب]

المشاركة الأصلية كتبت بواسطة الهيبة من الله

السلام عليكم ورحمة الله وبركاته
اولا بارك الله فيك على كل كلمة كتبت هنا...انها رائعة..
وثانيا هى ليست ضد البنات كما قلتى... انه الواقع وما يحصل فى مجتمعنا...
تقبلى مرورى المتواضع على صفحتك

مشكورة اختي على الرد ، اخجلتي تواضعي