يما وبابا مرضوني

[مشكلتي]

السلام عليكم
راني في صراع كبير. من جهه منحملش يما وبابا بسبه وش دارو فيا انا وخاوتي.. ومن جهه شايفه روحي مقصره في البر بيهم.
الشي لي يخليني منطيقهمش انو رباونا بالانتقادات والعنف اللفظي كل تحريكه بانتقاد وسب وشتم ودعاء. وغير ذلك اهمال و..و.. وفوق هذا بين بعضاهم مش متفاهمين ومنفصلين فالبيت وكانو متطلقين واذا تواصلو غير يتشاجرو وهاذ الشي يأثر فينا ويضرنا.
وااشي لي يخليني نلوم روحي هو انو كبارو وولاو يحتاجو يتقربو لينا يحتاجو حنانتنا لي مقدرناش نمدوهالهم كيعاد مشفناهاش منهم ومنعرفوش كيفاه نمدوهالهم وحتى وبغينا منقدروش. يحتاجو يحكيو معانا وانا وحده منحملش نسمع صوتهم وولفت مخي يتجاهل وش يقولو كيشغل ماهدروش لان ملي يهدرو غير السلبي. حاولت ننسى كامل وش شفت منهم وننقرب ليهم مرضت مرضت عباد سلبيين يجهلوني يقلقوني. من الاساس هوما هكا وزيد مع لكبر ولاو كيما لولاد الصغار وانا معنديش طاقه طاقتي استنزفوها.
تعبت الصراع هذا مرضني جسديا صداع لا يتوقف والام حاده في جسمي مخليت طبيب مرحتلش والاخير تاع الاعصاب قالي مشكلتك نفسيه. تبعت عند طبيبه نفسانيه عامين بدون جدوى كيعاد هي تقولي اتقبليهم هذو هوما والديك واحد لاخير والديه وانا مقدرتش نتقبلهم كيعاد بزاف سيئين ومنيش نشوف فيها بهذي الصعوبه انو يكونو ملاح ياسيدي مطلبتش يشكروني ويدللوني طلبت برك ميضرونيش.
تقولي اتحمليهم وانا مقدرتش خلااص تشبعت.
تقولي استمتعي بالحياه معاهم وانا منقدرش لانو هوما ميعاونونيش بلعكس يصعبولي المهمه. حاولت نطبق وش تقول ونضريت كثر لانو كينتقرب ليهم ننضر. لوكان نعيش بعيده عليهم نعيش مرتاحه ميضروني بسلبياتهم منشوف روحي مقصره في حقهم. ومشكلتي هي نفسها مشكله اخوتي ومفهمتش الحل وين. لي عندو نصيحه ميبخلنيش بيها بارك الله فيكم وربي يفرج على كل مومن