مشكلتي سلفتي

[مشكلتي]

السلام عليكم ياريت نلقى لي يساعدني انا اختكم من الشرق الجزائري وبعد المشكلة بدات منهار جات سلفتي ضيفة عندنا وكانت حامل في الشهر التاسع بل في ايام الولادة المتوقعة وسلفتي هذي تسكن في نفس البلاصة تاعنا يعني بيناتنا وحد 500ميترا هكاك.وموالفة تجي تضيف والديها كل خمسطاش نيوم تقريبا وساعات تجي تمشي لقرب المسافة المهم
سلفتي هذي جاتها الولادة كي كانت عندنا قلت لزوجي اديها لسبيطار اداها زوجي ومبعد مشدوهاش فسبيطار زوجي لي هو خوها قاللها عيطي لراجلك وروحي لدارك انا منظلش نجري بيك وراجلك هو لي مسؤول عليك .
ايا الطفلة ناضت تبكي وعيطت لراجلها اداها .وفي الليل جاها السطر وراح راجلها كرالها طونوبيل وراحت لسبيطار وزيدت فالصباح على الخمسة وكي رحنا ليها زيارة من غدوة داك لقيناها مشنفة قريب مسلمتش علينا وو.
ومن هذاك النهار مزادتش ولات لدار حتى والديها تهدر معاهم فتيليفون برك .كي نعيطلها انا متهزش عليا والله ياخاوتي غير راها غايضتني وحاسة بالغلطة تع راجلي لانو بالفعل قسا معاها .عندها شهرين واكثر ملي زيدت ومجات مشافت والديها واماليها.زوجي كي قتلو علاه علاه قالي علاه راجلها كي شاف ولادتها لحقت حطها هنا قتلو لالا هي اصلا موالفة تجي وتطول وربما هي لي قالتلو اديني لدارنا على اساس خاوتها عندهم طونوبيل ويدوها لسبيطار لان زوجها معندوش سيارة زوجي قالي منيش مسؤول عليها راها في رقبة راجل يتمحن بيها
جاوبوني كفاه ندير عندها فايتة الشهرين مجاتش والله غايضتني وعلبالي بلي راهي محطمة ومحشومة من اهل زوجها وراها بين نارين كفاه ندير باه نرجعها ونصفي القلوب لكل من لديه نصيحة يتفضل

[نبض قلبي]

السلام عليكم

هي غلطة راجلك اكيد ، كيفاه يطاوعو قلبو يطيش اختو و يقولها عيطي لراجلك
مهما كان راهي في وضعية تحتاج ماليها و راجلها
المهم انت حسب ظني مادخليش روحك
لانو قادرة ترجع عليك
خليوها تريح راسها مليح و تخمم مع روحها و كلش
روحو طلو عليها مع عحجوزتك و باركيلها
اكيد راح تجيب فترة كيما هكا يغيضها الحال و من حقها

ربي يصفي القلوب

[سَامِيَة]

كل ما يمكنني قوله
بارك الله فيك

[ع.عيسى]

الله يبارك فيك ، ويكثر من امثالك ، كاين بعض الزوجات تجيهم على 16 ويستغلو الفرصة باش يفرقو بين الزوج واخته ، باش ما تتلاش تعاود تجي ....على اي حال هاذي مشكلة عرضية ، وقت وتنسى وتولي لاخوها

[المطمئنّة]

السّلام عليكم ورحمة الله وبركاته

أختي أشكرك على موقفكِ هذا وأسأل الله أن يجعل الصّلح بين زوجكِ وأخته عن طريقكِ ويكتب أجركِ
أكيد هو مخطىء في حقّها وهذه أخته يجب أن يكون سندا لها خاصّة وهي في حالة الولادة، التي هي من أصعب الظّروف التي تمرّ بها المرأة في حياتها وذلك بسبب الآلام الشّديدة والخوف كذلك
المهمّ، أنتِ يجب أن تحثّى زوجك على الصّلح بينه وبين أخته، وحاولي كذلك تطييب خاطرها بزيارة مع هديّة حتى تنسى حزنها
وفّقكِ الله أختي

[أثر]

زوجك محق في تصرفه لانه في حالة كيما هذي اي ضرر يلحق بالاخت او ابنها راح يكون زوجك في فم المدفع
صحيح عنده سيارة لكن احتمال يدير حادث وهي راكبة معه او احتمال يكون اهمال طبي او اي شيئ ف زوجك موش حاب مشاكل مع اي طرف
ليس من حق اخت زوجك تزعل او تتغشش لأن لي قاله لها زوجك هو مايجب ان يكون حقيقة
على كل حاولوا تعرضوها على غداء او عشاء ويتعاود يتلم الشمل باذن الله

[Elwawy]

مبروك المولود, أتمنى أن يكون بصحة جيدة, هو الشيء الأهم.

[zahra1999]

مشكيتش الاخ هذا عندو حق كي طردها علاه مخممش لكان تجيها الولادة فليل واش يدير زوجها يروح يطبطب على ديار الناس!!!!
ولنفترض بعدما حاوزها عيطلو صاحبو قالو ارواح اديلي المرا تولد .احتمال كبير يروح يديها وهنا يكون طيش اختو ولمد البرانية!!!

علقت على هذالشي كي شفت وحد قال اخوك عنده الحق في تصرفه حبيت نقول تصرف صحيح فالقانون اما الاسرة مفيهاش قوانين سينو تولي مهيش اسرة

[أثر]

وزوجها كي ماعندوش سيارة وما يقدر ياخذ زوجته باه تولد علاه تهز منه وتنوي تجيب اطفال !!!
كان يتزوج بوحدة عقيم ويهني روحو او يتحمل مسؤوليته كاملة ماشي مرته تهز منه الكرش ويديها لدارهم يجريوا بيها ف الليالي باه تولد ولدو
انا لي قلت راه محق وأنا وحدة ماشي واحد يا الفحلة
وكي جاتو عيب يطبطب على ديار الناس كان يشري سيارة او يشوف كاش سائق يتفاهم معاه قبل كي توصل زيادة مرته يجي ليهم كي يتصلوا به ولو نص اليل

[ing.Youcef]

صح كان المفروض يشري سيارة، أو يشري زوج سيارات باش لوكان وحدة مثلا ما تحبش تنوض يصيب الثانية، ولا يشري سيارة إسعاف ربما أحسن.. أو ربما يبني مستشفى فالدار باش يتحمل المسؤولية كيما يلزم.. أو .... سيناريوهات كثيرة..
على كل حال اللي عجبه تصرف الزوج يدير كيفه واللي ما عجبهش ما يديرش (وكفى الله المؤمنين القتال).
ما تتقلقوش وما تزعفوش كلش يفوت.
بالتوفيق..

[سجل أنا جزائري]

الله يبارك حسبت في لول راهي تشكي بسلفتك و مبعد لقيت العكس

على كل حال نتي درتي وش عليك مش غلطتك و خوك ما حقش عليه كان عليه يعاون اختوه في هداك الوقت خاصة انو راجلها مكش عندو سيارة و ايضا غلطت زوج أخته يبانلي استغلالي ما حقش عليه يخلي مرته عند خوه و هو مريح حتى ما عندوش سيارة يخليها في دارو كي يجيها الولادة يعيط لخوها يوصلهم عادي

نتي ألحي عليه يطلب السماح من أختو ولا اعرضيهم لعشاء باش تتصفى القلوب

[sahraou72i]

اعرضيها واعمليلها عشا زوين واطلبو منها السماح وخلاصت الحكاية