قلبي محروق يا خاوتي

[مشكلتي]

سلام الله عليكم جميعا



حبيت نحكيلكم يا خاوتي واش راهو صاري

بالاكم بالاكم تخلوا بناتكم و لا خواتاتكم بلا ما تراقبوهم عسوهم و خافوا عليهم و حنوا عليهم لانو الشارع ما يرحمش ما يرحمش راني نكتب و الدمعة طيحلي

اغلى الناس عندي ضاعت في بحر المخدرات ولات مدمنة عاصية ربي من كل جيهة تخلات على والديها و حطمت حياتها و حياة عايلنها كانت تقرا مليح و مجتهدة ملي عرفت شي بنات فالاقامة تبدلت و تبعت طريق موش مليحة ما ترضي لا ربي لا العبد بصح حنا ما فقنالهاش حسبناها ملاك ما عرفشناش بلي الشارع صعيب و بلي ما كاش انسان معصوم راحت و ضاعت و ماولاتش ترجع كيما كانت خسرناها ......
نصيحة من قلبي كل واحد و لا وحدة عندها طفلة تعسها تراقبها تحاول تفهمها عقلها وين رايح و ين جاي صحاباتها شكون مام الى كانت فلا سيتي * الاقامة الجامعية * ما تخلوهاش وحدها روحو لعندها مرة على مرة و ديرولها العسة مع وحدة صحبتها تكون ثبقة بصح عمركم ما تحسوها بالتزيار و الظغط حنوا على بناتكم و خاوتكم سقسوهم وش تحتاجو لانو الطفلة الا مالقاتش الكماليات و الاحتياجات عند باباها و خوها تروح للبرانية دير لحرام على جال حوايج حنا نشوفوها تافهة بصح هي تعنيلها بزاف
وصوا بناتكم على الصلاة من صغرهم راني تقول من صغرهم مش حتى تكبر و يفوت الاوان لانو الصلاة هي اساس الدين و حاجة اخرى ما تصدقوش اي حاجة تحكيهالك بنتك و لا ختك خاصة اذا كان علابالك بلي عوايدها تكذب

و في الاخير ما رانيش نقول بطلوا بناتك من القراية ولا احبسوهم في الدار بالعكس مي رافقوهم و راقبوهم بالتي هي احسن و انصحوهم و حسسوهم بالقيمة تاعهم في دار باش ما يحوسوش يلقاوها برا ...
و ربي يستر علينا وعلى بنات المومنين