انصحوني .

[minani123]

الاسلم عليكم و رحمة الله وبراكته

انا اليوم حبيتكم تنصحوني
ذركا الباك مابقالو والو غير 92 يوم و انا مانكذبش عليكم كنت في المتوسطة الله يبارك نقرا و نجيب معدلاتي حتى لو ماقريتش راني نجيب معدل 14 و 15 مي من طلعت للثانوية وانا تبدلت 180 درجة ماعدتش نقرى حتى لو قريت نقرا غير ساعتين ولا ساعة ونحبس و ديما نجيب 12 ولا 13 من دخلت للثانوية وانا اعتزلت الحفظ نجاوب من فاهمة ونجيب في الاجتماعيات 11 ولا 14 و في الشريعة 15 ولا 16 و كي عاد الباك انا قلت خلاص نبدل السيستام ولازم نقرا
دونك انا بديت نقرا للباك من الصيف قريت شهر كامل ليكور في الرياضيات قرينا فيه على الدوال برك ونقراو في اليوم ساعتين و الاستاذ كي يعطينا تمارين نقرى في الدار ساعة برك باسكو ماحبيتش نتعب روحي و اذا تعبت روحي نكره القراية مع سبتمبر و كنت ناوية نجيب الباك ب14 باه نروح لمدرسة عليا

من دخلنا القراية في الفصل اول وانا نقرا في الدار ساعتين ومن باعد نريح و قرايتي تكون خفيفة ومانوضش بكري و منباعد فاتو شهرين وانا بديت نوض ونحفظ كملت على ذي الطريقة فصل كامل و انا جبت معدلي 12 كالعادة و الاشكالية انو انا ماركزتش مليح في الامتحانات والخطأ فيا انا لي ماقريتش مليحة

ايا جا الفصل ثاني و انا صاي بدلت البرنامج نقرا في اليوم 4 سوايع و نغيب ساعات في الثانوية ماشي ديما مع العلم انا راني مدايرة ليكور سبيسيال في المات وليكور في العلوم و الفيزياء و ليا شهري وانا دخلت ليكور فرونسي باسكو راني حمارة فيها تحسنت في بعض المواد و طحت في بعض المواد مثلا في العلوم تحسنت بزاف و في الفررونسي اما الفلسفة فطحت عليها على الفصل اول هي و الفيزياء و الرياضيات و بعد ما شفت النقاط الكارثية وانا طاحلي مورال و خايفة من معدل ثاني ( اكيد يعني ماشي درجة معدل 9 يعني كنت حابة نجيب 13 ولا 14) وانا ذي سمانة مانيش رح نروح للثانوية باه نقعد نراجع

وانا ذركا راني كرهت من قراية كي نقعد نقرا نقرا نص ساعة ومنباعد نتوه في ذهني باسكو انا معتادة بانو الفصل ثالث مانقراش فيه وننجح وانا بديت نخاف من باك اكيد نحوس ننجح مي نحوس ننجح بمعدل باه نروح للفرع لي نحوس عنو


اوكي طولت عليكم انا انجليزية و الادب ماعنديش مشكلة فيهم مشكلتي هي مع الرياضيات و الفيزياء كنت نجيب فيهم الله يبارك 18 و 16 ذركا هبطت مع اني انا فصل كامل قريت فيه غير فيزياء ونحل في تمارين المغني و زايد الحفاظة كرهت منها انصحوني ذركا واش ندير وكيفاه نستغل العطلة وكاش كتب خارجية مليحة في الرياضيات والعلوم و الرجاء الرد بسرعة

[Dhiaeddine Ben]

اولا لازم تحبي المادة لي حابة تقرايها يعني انكي تقراي مجبرة وولا فوق القلب مراحش جيب نتيجة
اما المراجع كاين بزاف انا ننصحك بتمارين بوالريش في العلوم و سلاسل مصطفاي في الرياضيات تلقايهم في الانترنت
موفقة

[Histidine~]

انا مثلك معدلي 14 و 15 فالليسي/ فالمتوسطة 17


كرهت من الليسي :'(

[~عيون القلب~]

اختي ننصحك متقارنيش روحك بأنتي نتاع المتوسط
كامل كنا ندو 17 و 18 واليسي درنا سقوط حر وعدنا ندو 12و 13
وخاصة هاد العام وحدو مهما قريتي ومهما تعبتي لازم تقولي مزاال ملحقتش وصح كامل رانا نشوفوها فرواحنا مثلا الفيزياء هاد العام مهما نحلو و نسهرولها ووو في الاخير تدي 10 و لا 11 ونتي خادمة على 19 18 , هاد مهوش مقياس المهم نتعلمو من الاخطاء نتاعنا ونتفاداوها في الباك ان شاء الله
المهم ننصحك متقارنيش روحك بغيرك اكبر حاجة تفشل هي كي تقارني روحك وراني شايفتها فروحي
و الوقت لي يناسبك وترتاحيلو اقراي فيه ماشي لازم ديري كيما هداك ليدا 17 ولا 18 درك كي تشوفي لداو 18 كل واحد و طريقة لتناسبو ماشي قع دارو نفس الطريقة باه اداو الامتياز
رتبي نفسك ووقتك برك تنجحي ان شاء الله
موفقة