ادخلو تفهمو نسبية الرياضيات ^-^

[achiever.x]

صحا عيدكم كامل و انشاء الله بعد شهر نلقاكم كااامل ناجحين و فرحانين كيما فرحة العيد ،،
اسيدي هاهي المقالة لي تحوسوا عليها اقراوها شحال من مرة على خاطر شوي فيها لكذب بزاف 👇👇👇👇

👝👝👝
هل الرياضيات نسبية ام مطلقة؟
هل معيار الرياضيات يكون في البداهة و الوضوح(المطلقية) ام في. تعدد الانساق(النسبية)؟
هل الرياضيات ثابتة ام متغيرة؟
هل الرياضيات يمكن وصفها بالصناعة الصحيحة في كل الاحوال(المطلقية)؟
هل الرياضيات واحدة ام متعددة؟
هل تعدد الانساق في الهندسة يسيء الى اليقين الرياضي؟
هذو لي لفوق كااامل قادر يجيوك و شوف هوما اذا حبو يقلقونا يجيبو سؤال مبدع ،،،بصح متنساش حنا les hommes 😂😂😂 نقدرولها بإذن الله

🔦🔦📚المقدمة :::تبداها كيما نتاع الاصل ،،،يعني يا بالعقل /الفكر/انواع المفاهيم/فلسفة العلوم//ممبعد يا حبيبو تم تم تدخل تعرف فالرياضيات 😈😈
ممبعد قول هكذا: لكن النقاش لم يكن حول تعريف الرياضيات بحد ذاتها بل كان حول نتائجها فهناك من يرى انها نتائج مطلقة اليقين و آخرون انها نسبية اليقين فياترى ❓❓❓❕
هل الرياضيات مطقلة ام نسبية(و انت حر كفاه تطرح السؤال بشرط متخرجش من الموضوع)اوكي بب💑

عمبالي مهمومين بصح خليك من الدنيا ارواح تضحك معايا على الخرطي تاع الجماعة لي تحت هاذو شوف شوف كفاع يشيتو و يكذبو 😹😹😹😹
💠💠💠💡الموقف الاول💡: الرياضيات مطلقة اليقين ،،نتائجها يقينية مطلقة،،يعني مافيهاش نقاش خلاه بكلnever ever
بصح على واش اعتمدوا كي قالو هكذا؟(المسلمة)
يا لوخر اعتامدوا على المنطلقات و المبادئ نتاعها اللي يميزها الوضوح و البداهة يعني حاجة باينة و كامل نعرفوها و simple
و ثاني اساليب البرهنة اللي ما فيها حتى شك 😉

شكون قال::شبيك تاكل فيا 😭😭😭،،قال عمي ديكارت اللي نحبووووه و كانط🍻🍻🍻و سبينوزا(كي شغل بينازة،،كيما انا قصيرة 😜😜&#128540
ℹالحجج والبراهين ؛؛::ℹ
1@@@على خاطر الرياضيات تعتمد على البداهة و الوضوح بصح حبس واش هي البداهة من قبيل تحكي عليها يا وسمك؟
💖💖البديهية : حاجة باينة مع روحها ما تحتاج ني برهان ني رهج ني خوها مثال : الكل اكبر من الجزء ،،بابا خلق قبلي ،،،ياذن الاذان نتاع المغرب ممبعد نفطروا يعني حاجة باينة تعرفها وحدك لروحك

🔥قال ديكارت (هذا خونا لي نحبو انا--هذا يدور بزاااف منين يدور العقل) لا اقبل شيء على انه صحيح الا اذا كان بديهي (او يخرط) و لا نقلك كون يغيبلك كيش قال دير هكذا: حيث ان ديكارت يضع الاشياء على انها صحيحة الا اذا كانت بديهية(كيما تحب بدل فيها)
🔥قال بينازة(سبينوزة و لا اذا حبيتو تيبازة )لو نشك في البديهية ولو قد شوي شوي شوي يعني رانا نشك فالماكياج نتاع العقل اللي هوما يا شطار (مبادئ العقل الفطرية)
و بما انو حنا كااامل نعرفو مبادئ العقل 💇💅💆 فبسيف علينا نعترف بالبداهة
يقول واحد فيهم بلا اسم المهم : البديهية هي معيار الصدق و الكذب
2@@@قالك كاينة حاجة اسمها التعريف الرياضي📖 و صدق المفاهيم الرياضية يعتمد عليه 💤 قول و الله مكنش عمبالي
و هاذ الهم تاع التعريف هو انك تشرح حاجة ڨيس ڨيس✒✏💭 متكثر ما تتعمق متفصل و تذكر الصح برك ،،حوايج جوهرية برك ،،،يعني الخرطي مكاه
📫مثلا : المثلث هو شكل هندسي/يتكون من ثلاث اضلاع متقاطعة/ مثنى مثنى/مجموع زواياه 180 درجة.
و اللي يبين بلي التعريف الرياضي صحيح انو اي واحد متجرأ و ماحاول يمنشر فيها آ نقصد يبطل صحتها (اتفكروا القدف فالاسلامية)
3@@@@قالك اساليب البرهنة تاع الرياضيات الكلاسيكية تعد معيارا للصدق علاااه ؟؟لانها تراعي الانسجام المنطقي للعقل
و هاذي الاساليب هي:كااامل عدات علينا،،
➗طريقة تحليلية::: ننطلق من مقدمة الى نتائج و كاين زوج منها 👈👈👈برهان تحليلي مباشر كيما المتطابقات الشهيرة
👈👈برهان تحليلي غير مباشر كيما البرهان بالتراجع (المتتاليات ياااه)
➗طريقة تركيبية و هي تنتقل من قضايا اولية لوحايد مركبة
4@@@@الرياضيات عادت لغة العلوم قال اوغست كونت (اوكنت تاع اوغست) الرياضيات هي الالة🎷🎺🎹🎻🎼🎶 الضرورية لكل علم
على خاطر الرياضيات تعتمد لغة الرموز + قدرة الرياضي على الانشاء و الابداع
و انا نقوووول ،،،على بيها الفيزياء ينذب وجها حبت توصل للرياضيات و تتشهر كيفها و طبقت المنهج الرياضي ،،،يا ماما يموتو على الشهرة 😓😓

نقلك شي واحد ما يغلطك الرياضيات كون ماهذوك الرموز راها والو (كي شغل هي غنية و الرموز هوما المال)

👊👊👊النقد ** يا خويا يا خويا تضربو الشيتة مليار فالساعة ياجدك مشفتيش كون الرياضيات تهبط رجليها للارض تولي والو == يعني كي تنزل لارض الواقع/التطبيقات التجريبية 👈👈تفقد قيمتها و دقتها انعمم آ سيدي
و ثاني الرياضيات شكون دارها ،،،ياك بنادم كيفو كيفك و هي انتاج بشري ،،،و العقل احكامة نسبية ،،،شفت كفاه يرحم باباك فهمهالي كفاه نبنيو حاجة مطلقة(الرياضيات) على حاجة نسبية (كيما العقل)
كيف نأسس ما هو مطلق على ماهو نسبي✅✅
انعم خمم تفهم بب

شوي ونسيت لي يقولو بلي الرياضيات مطلقة نسموهم كلاسيكيون 👔👕👖(يضرب لكلاسيك ولد الناس )

🔕🔕الموقف 2: الرياضيات نسبية
على واه اعتمدوا : قالك ظهور النسق الاكسيومي حطم🔨🔨🔨 فكرة البداهة و اصبحت كل القضايا الرياضية مجرد اوليات نسبية قابلة للنقاش.
🎾🎾شكون قال : روبار بلانشي ،،بولغان،،ليبنز
🚊قالك ليبنز كون جات الرياضيات مطلقة علاه الشك في النسق الاقليدي
حبس حبس بب شاهو النسق الرياضي: مجموعة من المبادئ و المنطلقات المنسجمة تنسجم فيما بينها باه تشكل كلا موحدا
اكسيومي يعني انو انت كي تمشي بحاجة تكمل بيها ،،اعتمدت على مجموعة من المنطلقات لازم تكمل بيهم ،،،نقلك شي نورمال تعدد الانساق بصح بشرط متخرجش من النسق نتاعك .

🏄🏄البرهان و الحجج:🏄🏄
1@@@ قالك ظهور المنهج الاكسيومي هردلها جدها مخلا فيها والو ،،،ياك المنهج الاكسيومي هو تعدد الانساق ،،و كيما نعرفو بلي التعدد = النسبية شفت كفاه
قالك خونا بولغان كي كثرت الانظمة في الهندسة دليل على ان الرياضيات نسبية
يعني كيما تعرف اذا زاد الشيء عن حده انقلب الى ضده شبلق😹😹😹
🔺🔻ايا نحكو شوي على الانظمة تاع الهندسة شوي برك
اصلا انت كي تحكي عليهم فالمقال هكذا بعد:
🔁لوباتشوفيسكي (هذا تقولشي روسي اذا مكذبنيش ربي كأس العالم يا بابا ⚽⚽) قالهم المكان مقعر ،،،من نقطة خارج مستقيم يخرجلنا اكثر من موازي مجموع زوايا مثلث اقل من 180
🔁ريمان(ايمان) المكان محذب ،،قالك مجموعة النقط تنتهي لدائرة مش مستقيم ،،من نقطة خارج مستقيم يمر اكثر من موازي،،،مجموع زوايا مثلث اكبر من 180
💭و ممبعد خرجت حاجة اخرى و هي انه الجزء قادر يساوي او اكبر من الكل و من هنا تحطمت رحمة بابات البداهة مسكينة
2@@@قالهم خالي بلانشي التعريفات لغوية معندها حتى علاقة بالحقيقة الرياضية و منقدروش اصلا نحكمو على صحتها ولا كذبها
و انتقد السيد نفسو فكرة البداهة
(كي العادة يعرفو غير يفسدو)
3@@@قالك كفاه الرموز تاع حساب المساحة تقريبية و حنا نقولو الرياضيات مطلقة نكذبو على رواحنا ول مثال π=3.14=22/7 و هاذو كامل بالتقريب و انت كيما تعرف المساحة تاع الدائرة و الحجوم الله لاتربحها ديما فيها العدد π

😈😈ايا ننقدوها هاذو مايفيدهم غير الحرب 😈😈
قالك يا ولدي النسبية كاينة فالانساق برك بصح القيم تاع الرياضيات عامة تبقى صحيحة و مطلقة بصح مادمنا نخرجوش على النسق
و كاين حاجة كون جات الرياضيات نسبية علاه جد بابات العلوم الاخرى كااامل صرعونا بلي حابين يكونو كيفها مثلا الكيمياء و الفيزياء

👧👨التركيب :: صح الرياضيات صمطتها بالاكسيوم هذاك بصح بقات عندها وحد القيمة واش نقلك على خاطر المنطلقات اللي يبدا بيها الرياضي مافيها حتى نقاش تبقى صحيحة كي تخدم بيها في نص النسق الواحد
و اصلا آكم تشوفو العلوم الاخرى ولات تتكالب عليها كيما الفلك البيولوجيا الفيزياء و الكيمياء ...
قالهم غالي يا غالي (غاليلي) الكون مكتوب بأحرف رياضية (او يخرط)

نختموها و نقولو الرياضيات مهما تعددت انساقها تبقى هي top عليهم كامل و الموثوق فيها احكيلها اسرارك و راك مهني قالك بصح mais هذا ميعنيش انو منسبياش على خاطر تعدد الانساق ولا حقيقة و كامل رانا نشوفو فيها و ماش في حق من هب و دب يجي و يخرط علينا بنسق و لا يقيس نتائج نسق بواحد آخر
و هنا نكونوا خلصناها الحمد لله
👮👮👮هي صح مخلطة بصح انت اقراها شغل بلعب تلقاها تم تم تفهمت و تحفظت