زوج خالتي

[مشكلتي]

السلام عليكم
منيش عارفة منين نبداا ليكم
عندي خالتي تزوجت براجل كبير عليها ودركا عندهم 11 عام زواج و3 اولاد

كي داتو الوضعية المادية تاعو مليحة و دركا ولاااااا احسن املاك مشاريع يعني الوضعية المادية تحسنت على قبل بزااااااااف.

المهم تعبت معااااااااه وكان دايما يجيبلها الضياف من كل بلااد وهيا تخدم وخلاص

مترتاحش .وكانت تسكن في بلاصة معزووولة

وحتى كي متكونش في دارها يجبلها الضياف ويخليهملها في الدار وصوالحها تمااا
المهم فاتت الايامات وهيا كاارهة حيااتها معااااه الحقوق الزوجية مفرط فيهم

ميحكييش معاها وميقعدش بزاف في الدار
يجيبلها غير المصروف ويقلها واش دير للضياف و خلاص


وهاذ المرة في رمضان تغيرت المعاملة تاعو معاها كلياااااااااا
ولا يقعد معاها ويضحك ودارلها دار جديدة في وسط البلاد ولي تبغيه يديروا

وكانت في فترة الحمل شهرين
للاسف كي سكنت في الدار الجديدة

الولد ماتلها في كرشها ومرضت

قاتلها الطبيبة متتحركييش ياسر .ايا عيطت لماما واختي باش يعااونوها لان هيا معندهاش غير ماما في نفس البلاد
ولااو يروحولها يعاونوها ويرجعوو للدار .راجلها ولا يقول لماما واختي اروواحو دايما
وكي يروحو تما اختي لاحظت بلي نظرات راجل خالتي غريبة ولات تنقص من المروح لخالتي

ولا يعيط عندنا ويقول لاختي اروووواحو وكل يوم يقولنا راني عارضكم للعشاء

جاتنا غريبة كيفاش تبدل قاااااااااع هاااااااااااك
كي رحنا تما قاااعد يسقسي في اختي واش ديري في حيااتك وواش راكي توجدي للمستقبل اختي قاتلوا راني نقراااا نكملها وساهل الحال. بعدها قالها محتاجك في موضوع كي تروحي للدار نعيطلك اختي قاتلو خلااااص
ايا قبيل كي عيطلها قالها راكي وحدك قاتلو ايه قالها المقدمات تاع راني باغي نتزوجك وكنت رايح نقول لخالتك هيا لتجبدلك على الموضوع وتديني احسن من لي تدي واحد صغير انا راني كبير ونعرف نخمم .عمر اختي 21 عام وعمرو 60 عام



تخليييلوا ميحشمش رايح يقول لخالتي نتزوج بنت اختك وخالتي مهيش مليحة درك من الاجهاض
اختي قاتلوا كيفاش راك تخمم هاك خالتي واش خصها قاالها راكي عارفة خالتك درك راهي مرييضة وانا ميعجبنييش الحال وهيا هااك
قالها كلي مشروووع مربح نسكنك في دزاير ننديرلك دار وحدك ونعيطك الاملاك لي عندي كامل احسن من لي تديه واحداخرى ونعيشك ونخاف نمووت وانت لي تتسااهلي الاملااااااااااااااك نكتبهم باسمك اقبلي برك .وراح نقنع خاالتك بهاذ الشيء

بعدها قطعت عليييه

انصدمناااااااااااا من هاذ الشيء والله متوقعناها منوو يدير هااااااااك موالف سااكت ويبان عااقل

غاضتناااااااا خالتي لي صبرت معاه وولادووو وزيد دركا خالتي مريضة وتعباانة خاايفين كاشما يصرا لها بعد ميخبرهاااا

احنا من كلامو قررنا منولوش نرووحو لدااارو

ووواش رااااايكم
رانا حايرين ومناش عارفين اذا نخبرو خالتي علاواش قاااااال
لان هو راح يقلهاا باش تقنع اختي بيه
اسمحوولي طولت
بارك الله فيكم

[النجمة القطبية]

يا اختي واش راكي تهدري الجمع بين الخالة وبنت اختها اصلا حرام في الاسلام !!!!!!!!!!!!!!!!!وين راكم عايشين انتوما واحد فيكم ما علابالوا
وديجا مدام الراجل عينوا زايغة علاه عليكم تروحوا ليه وعلاه تهدر معاه وتجاوبوا في الهاتف مدام شكت فيه مسبقا وعلاه تزيد تعطيه في الامل وتفتحلوا الباب
انا عمري في حياتي ما نشفا حكيت مع راجل خالتي لوحدي هاتفيا رغم انوا بمثابة ابي كي خلقت تربيت قداموا وعلى يديه
واشنوا هادي الدسارة !!!!!!
تروح تهدر معاه وزيد رايحة جاية وتقوليلي واش نديروا ومراكمش حتى عارفين بلي حرام لا انتوما لا راجل خالتكم هدا عجوز وميعرفش الحلال مالحرام
خلاصوا كامل النسا في الجزائر بقات غير بنت الاخت بفففففف
خلوا المخلوقة في دارها واجبدوا عماركم تماما متجاوبوه ما تردوا عليه ما تحكوا لخالتكم بعدوووها هدا ماكان

[نجاة^^]

السلام عليكم
21 سنة تديه 60 سنة وزاد مزوج و بخالتك يا لطيف ربي يستر،من هاذ النوع تاع الرجال حاسبين رواحهم راح يكسبو الدنيا بمالهم
الحل تاع المشكلة راهو في يد اختك وامك لانو هوما حلولو العين لازم تقطع ختك العلاقة مع خالتك خاصة هاذ الفترة لانو هاذ الفترة (وهي محرمة على الرجل ان يقترب من زوجته فيستغل الفرصة) ،الحمد لله مصراتش واحد الكارثة لانو في قصة حكاتهالي وحدة قاتلي بلي وحدة في منطقتهم زيدت وجات اختها تقوم بيها تخيلي ان زوجها زنا مع اختها راح لامام المسجد قالو راك حبستلي راسي بقصتك منعرف نقولك ادي خت زوجتك وهي حرام عليك ولا طلق زوجتك ولا ولا ملقالوش فتوى (القصة للاعتبار فقط) تروحلها امك فقط ،وتكلمو وتقولو منيش حا نقبل حتى و اذا قبلت خالتي وادعيو ربي يهديه لانو خالتك اكيد اذا سمعت بلي حاب يتزوج عليها تكره حياتها والمشكلة اذا عرفت بلي حاب يدي ختك راح تكرهكم ،ختك قوليلها تزير روحها ،وتحطو عند حدو واذا مقدرتش ،لازم تخبر الوالد تاعكم وربي يوفقكم و يسهلكم و ربي يهدي زوج خالتك.

[محارب الحمق]

أولا يحرم الجمع بين الخالة وبنت أختها. ثانيا يحق للرجل التعدد ولا عيب في ذلك. ثالثا يحق للرجل البالغ من العمر 60 سنة التعدد. رابعا ليس من المحبذ عرفا اتساع فارق السن بين الزوجين لأكثر من 15 سنة. خامسا عليكم بالتفقه بالدين. سادسا لاتقولوا للخالة ولا لغيرها ماحدث. سابعا اقطعوا علاقتكم به فهو أجنبي عنكم. ثامنا عيدكم مبارك تقبل الله منا ومنكم

[رندة.]

لا حول ولا قوة الا بالله، ربي يهدي زوج خالتك ان شاء الله إنه على كل شيء قدير، لازم أختك تبطّل تروح لعند خالتك وتتجنب زوج خالتك وماتزيدش ترّد عليه في الهاتف، وإذا بقى يتصل بيها خبرّو الوالد تاعكم يهدر معاه ويفهمّو مليح على حُرمة الشيء الي راهو يهدر عليه.

[صُبح الأندلس]

الأمر لا يحتاج إلى موضوع أصلا الجمع بين البنت و خالتها محرم.انتهى
ثانيا تعلموا الاحتشام في اللبس و الكلام حتى لا يطمع الذي في قلبه مرض ماش معناه زوج خالتها كبير تلبس كما تلبس قدام الأب .

[عين الصقر]

أنا نرتكب جريمة قتل نورمال
الوقت اللي وصلنالو

[بـــيِسَة]

الله يستر
واش نقولك ايه روحولها خبروها و قولولها باش تعرف حقيقتو
و الا مقلتولهاش في اقرب و قت ربي ميحبش الساكت عن الحق شيطان اخرص
رو حوا احكولها خير من كيشما يديرلها و لا يزيد يدوموندي و حدوخرا بلاك تطلق و تتخلص منه
و متخلوهش هو الي يقولها بيسك الا مفبلتلوش رح يقتلها و لا يدير بيناتكم انتم الي تفهموها بالعقلية داكور
و ربي يجيب الخير و بالاكي اختك تقبل بيه بالاكي

[نبض قلبي]

ربي يهديه و الله
كارثة بأتم معنى الكلمة

[زبدة ذايبة]

الخالة أم.

هذا حيوان وليس بشر.

الدين يعرفوه غير في احكام التعدد

وباقي الأمور عايشينها بالطول والعرض.

بغض النظر عن الحكم الشرعي.

الفارق كبير بزاف.

هذا يليق يكون جد لأختك وليس زوج.!!!!!!!!!!

يحاول يغريها بالمال حتى توافق!!!!!!

لأنه تعود على أن يشتري كل شيء بماله.

أحسست بالغثيان وأنا أقرأ موضوعك.

المهم

بالنسبة لخالتك ماتقولوهاش حتى ترتاح وتتعافى

وبالنسبة لأختك غلطت غلطة كبيرة وهي كلامها مع هذا الرجل.

من المفروض ماتهدرش معاه خلاص.

كاين أبوك وربما إخوتك الذكور هم الذين يتواصلون معه.

ماعندها حتى علاقة بيه.

وش اداها ليه تهدر معاه؟؟؟؟؟

شيخ وطفلة صغيرة !!!!!

وش رايح يقوللها؟؟؟؟؟

فتحت باب على نفسها كان من المفروض يبقى مغلوق ومسدود.

لكن هذا الذي يحدث غالبا عند حلول الفوضى الأسرية.

والابتعاد عن الدين.

نقولو كلمة لو والتي تفتح باب الشيطان:

لو كان ماهدرتش معاه كان الموضوع هذا أخذ منحى آخر.

ولو كان مابقيتوش حايرين كيفاش ديرو مع هذ الشيخ!!!!.

الخطأ صدر من شقيقتك....

والطمع في استعادة الشباب وتجديده مع فتاة شابة.

أصلح الله حالكم.

[لمسة ابداع]

ياللطيييف الوقت اللي وصلنا ليه

ربي يجيييب الخير شغل فيلم تركي

[أم رقية نسرين]

لا حول ولا قوة إلا بالله ربي يبقي الستر
تحكي و كأنو معلابالكش بلي الجمع بين البنت و خالتها حراااااااااام وش من كوكب راكم عايشين

[amoulette]

لا حول و لا قوة الا بالله !
شوفي يا اخت هذا شيء حرام
الان انتم لازم تجبدو رواحكم عليه لانه قد يسببب لكم مشاكل المهم اخبروا والدتكم و اذا عاود الاتصال بكم تكلمي معه انت و اخبريه ان هذا حرام و لكن عليك تسجيل المكالمة لتبقى كدليل ضده لانه قد يتهمكم ب الافتراء عليه و يفتعل مشاكل بينكم و بين خالاكم
و لا تخبري خالتك لانها مريضة و مثل ما قلت قد يكذب و يشوه صورتكم في نظرها كما عليكم عدم الذهاب الى بيته نهائيا و هددوه بانكم ستخبرون والدكم اذا فتح الموضوع مرة اخرى

[nihal159]

يعني بكل صراحة؛ هل أختك غبية لهذه الدرجة؟؟؟ أين هي فراسة الأنثى؟؟؟؟؟؟؟ رجل أجنبي يقولك نحتاجك في موضوع خاص و حاب نحكي معاك فالتليفون؛ واش معناها؟؟؟؟؟؟؟؟؟ واش من موضوع خاص و مشترك بين رجل و إمرأة؟؟؟؟؟ هل مثلا كان رايح يسألها على مواقيت الإمساك و الإفطار؟؟؟؟؟؟؟؟؟؟؟
كان لازم توضع حد لهذه المهزلة قبل الحدوث؛ درك عندكم حلّ واحد و وحيد و هي إنّ أختك تغيّر شريحة الهاتف و تقطعو كل إتصال معاه؛ و اتركو أمكم هي من تساعد خالتكم.

[قنون المربي والأستاذ]

السلام عليكم.
كشف المستور سبب البلاء، وهذا مايحدث أمام المحارم وغير المحارم إلّا من رحم ربُك.
أنصحها بأن تجعل هاتفها يَلْفَظُ مكالماته بمعنى يرفضها، أو تحوِّل مكالماته لرقم هاتف أخيها أو أبيها، فإذا ماردّ عليه صوت رجالي ارتدع
وأن تقطع الأتصال المباشر معه.
وكان الله في عونكم.