تعقيب على موضوع الصلاة

[مشكلتي]

السلام عليكم
أولا شكرا جزيلا على الردود بارك الله فيكم
أردت أن أعقب فقط على بعض التعليقات و أوضح أمر ما.
الأخوات شكرا جزيلا تولاي رندة سيرين شكرا انا دائما قبل ما نخرج الصباح نخلي سورة البقرة و القرآن في الدار يقرأ نهار كامل و نضال ننصح فيه نقوليه نوض العن الشيطان يقولي صرك نوض و مؤخرا أصبح يحشم يقولي انا مانيش حامل روحي و ما عاجباتوش روحو راني نحاول معاه.
ثاني حبيت نقلكم حاجة و ربي يغفرلي في هذه النقطة: لكن نظن أن في دارهم ما لقاوش حرص ولا ما نعرف ( أسوء حاجة عندي اني نتهم الأولياء بأخطاء الأبناء ) بصح لاحظت انو زوجي كان يدخل لدار فارغة ما يقولش السلام كي نهدر على ماء زمزم يقولي ماكانش منها كي نهدر لو على حديث يقولي لازم يكون صحيح ....
المهم حاليا الحمد لله تبدل بزاااااااااف ولى يدخل يلقي السلام يشمت العاطس يقرأ الأدعية
على هاذي انا قلت السيد ماهوش موالف في دارهم ( بعد ملاحظتي لتصرفات إخوته و عائلته)
ضرك مازالي موضوع الصلاة مؤخرا قتليه راني بديت نحفظ سورة كي نكمل نجيبلك باه نعرض عليك
و نقوليه تعجبني كي نشوفك تتفرج حاجة تاع دين و إسلام .....
بقات الصلاة راني معاه .
بالنسبة ليا انا . نصلي الصبح الصباح الظهر نرجعلو للدار بصح العصر يروح المغرب يذن عليا في الطريق نوصل للدار يكونو تلمو
كاين مصلى حذايا نقدر نهبط ليه في العصر بصح يكون الغاشي ولازم نستنى و الخدمة مانقدرش نخليها ( انا ماعنديش وقت محدد نرجع فيه بصح لازم نخدم سوايعي معنتها لاكان ستنيت في العصر نزيد ندخل متأخرة في الليل)
مع تغير الوقت هاذ الاسبوع وليت ندخل قبل المغرب حقيقة نفسيا ارتاح كيما قال الأخ حتى كي تصلي تكون خاشع
فقط باه ما تبقاش في قلبي الأخ محارب الحمق ( اسمك على غير مسمى بالمناسبة) أخي ما تشفق عليا ما نشفق عليك قالك امرأة عاملة و وين في بلاد الكفر ( عقدتونا والله )
انا عاملة و بشاهدتي و بمكتبي و قدري و قيمتي عارفتهم واحد ما يدنا ليا ولا يقولي كلمة خارجة على الطريق و صدقني ما نخدم حتى مع عربي كامل كفار ( على قولك) كامل مسيحيين.
الأخت زبدة ذائبة واش نقلك . يمكن انا ما فهمتش ردك النقاط التي تركتيها لي باه نعمرها بلي بغيت. ....
لاكان على التشبيه الرائع انا نقلك هاذاك رآه انسان لا انت لا انا عندنا الحق نشبهوه بغيره و لاكان على الخدمة يا اختي ( زوجي يخدم مهندس و في مكان مرموق و عندو وضعية لابأس بها مقارنة بأنه اجنبي و ما عندوش بزاف منين جا )
الأخ بلال ما فهمتنيش واش قلت . انا قلت أنا نرجع نقول لوكان طلقت و تهنيت انا ماشي هو .

شكرا على ردودكم خاصة اللي نصحني و دعا له . و ربي يثبتنا كاملين و يغفر لنا

[زبدة ذايبة]

هذا الذي تتكلمين عنه رجل مسلم

كيقاش هذي ماشي موالف على هذ الأمور

صراحة عقلي ماقدرش يستوعب هذا الشيء

وزيد الموضوع اللي كتبتني عنه، يخص الركن الثاني في الإسلام

بعد الشهادتين تجي الصلاة

الصلاة شأنها عظيم جدا في الإسلام

من المفروض ماتتقلقيش من الردود بقدر ما تتقلقي من عدم صلاة زوجك

ومهما على زوجك في مراتب الدنيا من وظائف ومن مناصب لا معنى لها أمام الصلاة

الرجل الذي لا يستطيع الصلاة رجل عاجز مهما كانت مكانته وظيفيا عالية

والرجل الذي لايستطيع الوضوء والذي هو شرط من شروط صحة الصلاة رجل قذر

مهما تعطر، ومهما استحم ومهما كانت ملابسه نظيفة


الحياة قصيرة والموت لاتطرق الأبواب تستأذن، بل تأت فجأة

الصلاة شأنها عظيم

يقول تعالى: ومن يعظم شعاءر الله فإنها من تقوى القلوب"

لذا لب تقاعس زوجك عن الفريضة هو عدم الخوف من الله

وعدم تذكر الاخرة ، والغفلة عن الموت

[solinne]

ربي يهديه اختي انتي انصحيه وذكريه ديري حلقات دينية في التلفاز كي تجتمعو وحاولي بكل الطرق وإذا خشن راسو خلاص ما راكيش مسؤولة عليه ادعيلو ربي وقومي الليل واقراي سورة البقرة لمدة 40 يوم بنية هداية زوجك وراح تشوفي نتيجة إيجابية بإذن الله والله المستعان

[بلال88]

معذرة على سوء الفهم والحمد لله لعل قلب الرجل بدأ يلين أسأل الله أن يعجل هدايته.
فيما يخصك أنت أختي الفاضلة سبق وبينت لك خطر تأخير العصر إلى المغرب يعني تخيلي واحد يؤخر صيام رمضان إلى شوال لأعذار واهية! نفس الشيء بالنسبة الى الصلاة بل تأخير الصلاة أعظم!
يعني المصلى جنبك وليس لديك مشكلة مع صاحب العمل جاءك الشيطان من جهة أخرى قائلا: كيف تخرجين متأخرة؟!
لست هنا في مقام الفتيا ولا الوعظ أو الوصاية عليك لكن اسألي نفسك وأجيبي بصدق : هل هذا عذر فعلا لترك أعظم فريضة على المسلم؟!!
إذا كنت تخافين على نفسك من الخروج متأخرة ليلا فذاك أمر آخر!
العصر يُجمع مقدما مع الظهر في وقت الظهر عند الضرورة. واسألي نفسك مجددا هل أنت فعلا في حالة ضرورة؟
وكما قلت سابقا اسألي أحد المشايخ الموثوقين عن حالتك وهو يفتيك.

أخيرا كأنك تعجبت من وصف المسيحيين بالكفار!! أي نعم وربي كفار وهل تشكين في كفرهم؟!!
"لقد كفر الذين قالوا إن الله هو المسيح بن مريم"
"لقد كفر الذين قالوا إن الله ثالث ثلاثة"
هل بعد قول الله شك؟!
دمت بخير وعافية وكل يوم وأنت الى الله أقرب.

[سيرين راجي]

والله غير فرحتلك كي قلتي راه بدا يتحسن الحمد لله بقات الصلاة اكيد مع المثابرة والصبر والنصح
المستمر ربي راح يعينك وتاخدي اجر عظيم والله كي يهدي ربي انسان على يدك خير من الدنيا وما فيها
للاسف هذي مشكلة اغلب لالشباب اليوم حتى في البلاد العربية تلقايهم ما يصلوش لكن معدنهم طيب
ربي يهدي الجميع وبشرينا كي يولي يصلي رانا ندعولوا في الصلاة

[رندة.]

الحمد لله أنو زوجك بدأت تتحسن أحواله، واصلي معاه وما تيأسيش وبإذن الله راح يزيد يتحسن أكثر ويواظب على صلاته.
ان شاء ربي يهديه ويفرج عليك أنتي ثاني وتحافظي على صلاتك في وقتها.