السلام عليكم و رحمة الله تعالى و بركاته
كيما وعدتكم و وفيت ان شاء الله غادي نشرح كااامل المناعة بطريقة ساهلة و نوصللكم أهم الأفكار المطروحة فيها
بداية نعرفو بلي الذات هي العضوية تاعنا معناه جسمنا و اللاذات هي الاجسام الغريبة اللي تجي من الخارج كيما جراثيم و فيروسات بصفة عامة باش تدخل للعضوية تفوت على 3 محطات الاولى : الخط الدفاعي 1 كيما المخاط تاع الانف و العطس و العرق و اللعاب
و الخط الدفاعي 2 هو الخلايا البالعة اللي تديرلها استجابة مناعية عن طريق عملية البلعمة و الخط الدفاعي 3 هو الخلايا كيما قرينا على اللمفاويات
الخلية اللمفاوية كلشي مهم فيها هو الغشاء الهيولي اللي فيه تتمركز الجزيئات الغليكوبروتينية اللي تتعرف على الاجسام الغريبة
هادي الجزيات الغليكوبروتينية تنتجها الCMH اللي فيها من النوع واحد أو إثنان نقولولها cmh مين ندرسوها عند الحيوانات لكن اذا درسناها عند الانسان نقولولها hla و فيها تاني من النوع 1 و2 درسنالها البنية تاعها و لقينا بلي هي عبارة عن تحت وحدات ثلاثية البنية و لقينا تاني بلي الcmh يتميز بالنوعية معناه مشي كامل الناس عندهم نفس ال cmh الا في حالة التوأم الحقيقي , و المورثة المسؤولة على انتاجها هي 6 اللي تنتج الفا و بيطا و 15 اللي تنتج بيطا ميم (تنتج معناه تشرف على انتاج )
ندخلو في الزمر الدموية : تتحدد بنظامين نبدو بنظام abo اللي فيه الزمر a , b , o , ab كل زمرة عندها مستضد و جسم مضاد ( رانا عارفينهم من قبل )
و النظام الثاني هو نظام الريزوس و بيه نعرفو الزمرة اذا كانت موجبة أو سالبة حسب المستضد d
[ تشرف على انتاجه مورثة 1
و الحاجة اللي نعرفوها من الزمر هي كالتالي و احفظوها كيما هاكا:
ال o معطي عاام معناه هو يتبرع لكاامل الزمر ( اذا كان o موجب يعطيه o موجب و سالب اما اذا كان سالب يعطيه غيل سالب علابيها هادي الزمرة صعيب يلقو متبرعين )
ال a و b يتبرعو لل ab و يتبرعلهم o و نسميهم الهانيين ( كيما يخدمو يعوضوهم )
ال ab عندو الزهر كاااامل يعطووه ( السالب يعطوه من كل زمرة غيل السالب و الموجب كااامل الزمر يعطوه )
اللي زمرته ab موجب يقولنا (نضربوه بعين )
انا نحبس هنا باش ماتملوش من الموضوع مي نديرلكم جزء ثاني نكمل فيه طرق التعرف على محددات المستضد
ربي يسهل و ماتنسوش اذا راني دايرة كاش خطأ قولولي نستفاد و تستفادوا
بيييييس ✌
( تقرير عن مشاركة سيئة )، و الموجودة أسفل كل مشاركة .
2018-01-15, 20:45
ملخص شاامل للمناعة على طريقتي 😌(جزء 1)
العرض العادي
