حزين رغم ان كل شيء متوفر لي

[مشكلتي]

السلام عليكم

انا شاب 28 سنة متخرج و نخدم و ميسور الحال و لله الحمد. من صغري و انا معجب ببنت خالتي أدب و اخلاق و قراية و بالنسبة ليا هي مثال الفتاة لي حلمت بيها.و هي اصغر مني ب5 سنوات. كنت نراقبها في فترة مراهقتها و فترة دراستها في الجامعة و مالقيت غير الخير يعني من القراية للدار و العكس زدت عشقتها و تعلقت بيها.

خطبتها من خالتي لما كانت صغيرة و خالتي رفضت بحجة انها صغيرة و مازالت تقرا . كي طلعت هي للجامعة رجعت طلبتها من خوها .قالي نحكيلك معاها و اذا لمس قبول منها نتقدرم رسميا. المهم رد خوها صدمني قالي البنت مش تخمم في الزواج جملة و تفصيلا و طموحها الوحيد تنجح و تعول عايلتها لانهم ظروفهم المعيشية صعبة شوي. رجعت طلبت من خوها ياخذلي موعد منها يعني نحكي معاها بشكل شخصي و نحاول نقنعها لكنها رفضت رفض قاطع.

طبعا انا قلقت و اتخذت خطوة و هي اني خطبت طفلة اخرى و تم الزواج منها خاصة اني كنت حاب نحصن نفسي خوفا من الوقوع في الفاحشة .زوجتي متربية و قارية ايضا و تحبني بصح انا ماقدرتش نحبها خاصة اني و مع مرور الوقت نتفكر بنت خالتي و نقول لو انتظرت اكثر لكان افضل . جربت كل الطرق بش ننساها ماقدرتش و مازالت حسرة في قلبي و كل ما نسمع تقدملها شخص قلبي ينقبض و نرجع نرتاح كي نسمع انها رفضت .

حاولت اني نحوس على الامور لي نحبهم فيها في زوجتي لكن مالقيتهمش مثلا هي ذكية جدا و تجيد الكثير من العلوم و لما كنا صغار و كنا نتناقشو في امور الدين و الحياة كنت نلقاها ذات اطلاع واسع . بصح زوجتي هي امراة تاع دار تطبخ و تنظيف ولا علاقة لها بالكتب يعني في احيان كثيرة نحب ناقشها نلقاها مش تفهمني و النقاش لا يدوم لاكثر من دقائق . ما حبيتش نقارن الاثنين مع بعض لانو قريبتي راح تفوز طبعا لكن مالقيتش الحل .

خممت نزيدها زوجة ثانية لكني اشك انها توافق ماقبلتش بيا و انا اعزب راح تقبل بيا و انا متزوج .هي الان انسانة ناجحة في حياتها و في طريقها لتحقيق اهدافها و هذا مازاد احترامي و اعجابي ليها . لو كنتم مكانش وش ديروا ؟؟ انصحوني بنصائح واقعية مش محتاج زيف و مثالية .