فلسطيني وممنوع اتعيش

[متفائل]

فلسطيني ممنوع اتعيش قالولك اسكت ما تحكيش انت اخلقت للتلطيش للحواجز للمصايب للتفتيش كتبوا على اجبينك ينداس من الضابط حتى الشاويش فلسطيني وممنوع اتثور ومش مسموح اتكون منصور اياك اتطالب بحقك اوعى ابيوم اتشوف النور ممنوع اتجدد هويه ممنوع اتجدد باسبور فلسطيني وبدك تتعلم هاي شغله ضد الدستور فلسطيني ولازم تتألم من دون ما يشوفك دكتور فلسطيني ممنوع تتظلم ولا يطلع في اجناحك ريش فلسطيني ممنوع اتعيش
فلسطيني وان في سفريات اسمك بالاحمر مكتوب وعلى شباك مصلحة الجوازات كتبوا على اجبينك مطلوب لازم تتوقف ساعات مذنب او بدون اذنوب ويتوجه لك اتهامات انك سبب كل احروب قال ابسببك الحقنات والعدل بوطنك مسلوب وكأنك سبب كل النكسات وكل ازمات الشعوب وكأنه بسببك مختلفات على الاقصى بلحظة الغروب وذبح صبيان وبنات وعجز على امرها مغلوب فلسطيني ممنوع اتعيش هذي دنيا بس للخفافيش
فبدك اتشوف هالنهموم تابع كل شي عنا قبل النوم مذيع امعصب وكله اهموم نبأ عاجل يا اهل الله هدوا ابيوب في رام الله حكامنا قاموا اسم الله يتصلوا في بوش يقوم وفي سيفه يحمي المظلوم حكامنا اتصلوا بكوفي عنان قالوله يا خينا الاسلام انهان ان كان لك فوته على الامريكان الك منا كم خزان حكامنا اتصلوا في جاك شيراك قالوله يا خينا ما النا سواك ان كان لك فوته على تون ابلير كنك تقنعه يقنع بابا بلكن بابا بيقنع موسكو بلكن موسكو بتقنع بوش بلكن بوش بيقنع اولمرت وتردو الاقصى لاصحابه وتحموا الشعب الغلبان
نبأ عاجل يا اهل الله حكامنا العوض على الله
وحدتنا يا ناس اصبحت فضائيات الف دش فوق روسنا ضاوي شو يفيد البث الحي لشعب مات وبألف تلفزيون شو يساوي قضيتنا اصبحت عرب سات ونشيد الوطن اتحول غناوي واذا مش عاجبك هالمحطه حول على النيل سات حتى تسمع للسيد مكاوي اصل الوطن اتحول محطات وصارت كرامتنا فتاوي يا وطن مسجون جوى الشاشات عم تبكي وصوتك بالفضى داوي اهلك من النيل حتى الفرات مثلك مساجين بس في قهاوي
فيا خوفي من الحج الجاي اتكون الحجه صعبه وفي حجة مكافحة الارهاب يحطوا حارس على الكعبه ويصيروا يصفونا اصفوف ونوخذ اذن حتى نطوف ويحققوا مع كل خاروف رايح ينذبح اضحيه وبوش يصدر قانون ممضي من البنتاغون الي بيرجم ابليس الملعون بيكون ضد النازيه وبنصير نطلع على عرفات واحد واحد مش دفعات ونوخذ ليستا بالدعوات من البيت الابيض ممضيه وبوش يقدم احتجاج يطالب باضحية الحجاج اتكون ثمن للابراج الي وقعت بالصيفيه
يا شقاقي بلغ عياش امتنا في مبنى الانعاش

كلمات القاء واداء انس شعبان

منقول

للاستماع اليكم الرابط

https://www.youtube.com/watch?v=dWxq6Kfmkns