زوجي يهددني بعملي

[nadine0159]

ما رايكم في زوجي اللشي كلما كان لدينا مشكل يهاتف امه و ايضا يهددني بتوقيفي عن العمل مع انه يعلم ان العمل مشروط في العقد و الجماعة مع العلم ايضا انني اصرف على نفسي وولدي هادو ليامات برك طبيب تاع الحساسية بدواه 5000 و جينيكولوغ مع التحاليل راهي في 6000 و ابني شريتلو كسوة الطهارة و كسوة للايام العادية ووو ماكلتي و كسوتي الخاصة كل شيى من عندي و يزيد يدي الدراهم كيما ظهرلو كي يخصوه و يهدر على الخدمة قلتلو اذا كاش ماعندك هدرة في شان العمل طبعا فقط قلتلو عيط لبابا هو يفهمك مع العلم انني حامل و سقلقني بزاف هو الخدمة بعيد و انا تاني بعيدة على اهلي بزاف مكانش اللي يفهمك في هاد الدنيا غير والديا و اخواتاتي اللي يحسو بيا والزوج في اي لحظة يقولك تحبي تروحي لداركم روحي اي وحدة راح تتقلق انا نانكذبش عليكم بديت نكره من هاد الوضع

[wissem1]

اختي النوع هدا تع الرجال متخليلوش الفرصة يهددك قولو كون عينك في لي قلعدة في الدار اك ملول زوجتي وحدة متخدمش
قولو كلش ولا خدمتي نخسرك انت و منخسرش خدمتي
الوقت تع دروك صعيب بزاف مكاش لمان في الرجال خاشى البعض القليل لي يفهم وزيد راكي منقصة عليه المصاريف الكل كون جا واحد احر يفرخ
انا من رايي الشحصي ناقشيه ويلا مفهمش قولي لباباك يوضعلو النقاط فوق الحروف

[شمس بريكة]

انا عندي اقتراح ديري شهر كونجي وما تقوليلوش وقلو راني خليت الخدمة وخليه يصرف عليك وعلى ولدك هكذا يعرف واش راكي تصرفي ويحس بيك وعارفة بلي راح يقلق لانو مصاريف بزاف ويقلك ارجعي للخدمة

[سَامِيَة]

بصح ختي نادين هذا الوضع اللي راكي تحكي عليه وتقولي كرهتي منو أكيد عندو خلفيات أو هو محصلة تراكمات بمعنى أكيد فيه أسباب خلات الحالة تتكهرب فيما بينكم سواء من جهتك أو من جهة زوجك...قعدي مع روحك وسيي تعرفي وين راه المشكل.

[محمد جديدي التبسي]

بما انك استاذة راهي قريب العطلة كملي العام هذا وحبسي وخلي راجلك يتحمل مسؤوليتك ما تصرفيش عليه.
عمل المراة مش مليح خاصة المتزوجة وأنت راك أم كيفاه يعطيك قلبك تخلي ابنك وتروحي تخدمي وراه جايك ابن آخر خممي مع عقلك وطيشي عليك الخدمة وريحي في دارك نحن رجال وكارهين الخدمة والخرجة كل يوم وانت تشرطي في خدمتك فالعقد والله عجب !!!!
ربي يصلح حالكم.

[أم أسماء وعبد الرحمن]

السلام عليكم ورحمة الله
أختي
شوفي الاسباب الي تخليه يقلك حبسي خدمتك وحاولي تصلحيها وإذا ماكاش أسباب حاولي تدي كونجي كيما قالت الأخت وخليه يتحمل المسؤولية وحدو وربحي صحتك وراحة ولادك
ومن جهة أخرى راح تبان لك الطريق الصح ياإما ترجعي تخدمي ياإما تحبسي العمل مع العلم أن القرار الأخير صعب عليك ولكن فكري في أولادك وراحة بالك وحياتك الزوجية.
ربي يفرج عليك أختي

[nadine0159]

تناقشت معاه اليوم كيما قالولي الاخوات و هددتو بابي و قلتلو نورمالمو تحمد ربي راني زايدة فيك النص و قلتلو في المرة القادمة تزيد تهدرلي على الخدمة راح نفهم بلي حاب تنهي زواجنا فهم الهدرة و تاني قلتلو انت مافيكش الامان كيفاش بغيتني نقعد ف الدار غدوا تخرجني من الدار ناكل الحجر صح خدمتي هي الاساس راني تعبت عليها و هو تاني اب اولادي و نحبو بصح اذا اقتضى الامر نخير خدمتي ماتستغربوش يا الرجال نعم نخير خدمتي راهي الدنيا ماترحمش و اولادي مهما يصرف والدهم ماشي كيما كيفي و السلام عليكم و رحمة الله

[solinne]

المشاركة الأصلية كتبت بواسطة nadine0159

تناقشت معاه اليوم كيما قالولي الاخوات و هددتو بابي و قلتلو نورمالمو تحمد ربي راني زايدة فيك النص و قلتلو في المرة القادمة تزيد تهدرلي على الخدمة راح نفهم بلي حاب تنهي زواجنا فهم الهدرة و تاني قلتلو انت مافيكش الامان كيفاش بغيتني نقعد ف الدار غدوا تخرجني من الدار ناكل الحجر صح خدمتي هي الاساس راني تعبت عليها و هو تاني اب اولادي و نحبو بصح اذا اقتضى الامر نخير خدمتي ماتستغربوش يا الرجال نعم نخير خدمتي راهي الدنيا ماترحمش و اولادي مهما يصرف والدهم ماشي كيما كيفي و السلام عليكم و رحمة الله

سبحان الله تخيري خدمتك على زوجك واب اولادك صراحة صدمني تفكيرك الا مسؤول

[nadine0159]

علاه تنصدمي هو تاني يتبلا داني خدامة و مكان حتى سبب يخليه يقولي حبسي من الخدمة امور تافهة يبدا درك نحبسك كي نسقسيه علاه ما يجاوبش بالنسبة ليا اللي بغا وحدة تخدم من نهار الاول يتفهم و يعرف انها مستحيل تفرط في عملها لانو انا بالنسبة ليا جزء من شخصيتي و خصوصيتي الللي تعبت عليها 25 سنة باش شديت الخدمة و اذا بغا وحدة ف الدار كان تزوج بوحدة ماكثة في البيت مع العلم انو بعيد عليا يجي خمسة ايام او اربعة كل 20 يوم يعني انا مسؤولة على نفسي و ابني حتى الحليب نشري من جيبي و تاني انا نفهم بلي امه هي الللي تحرضو عليا صدقوني مانيش نتبلاها بصح سمعتها بوذني يكون مليح رلي يهديها تبدا علاش ما دارتش و علاش ما تلمش حوايجك و علاش هو يبدا يبدل تصرفاتو انا نقول ربي يهديها و انا صابرة كاش ما يفرج ربي عليا بسكنة نروح اما عملي هو نصف حياتي راني دركا من 2009 و انا خدامة بعد ما سوفريت مع الاستخلافات حمدت ربي و درك بكل بساطة يقولي بطلي علاش راني نلعب و زيد يا اختي لعزيزة علابالي ما يكفيناش راهو يصرف على عايلة كاملة ىاهو يدي من عندي كامل راهم لاصقين فيه

[سَامِيَة]

حاولي قد ما تقدري توقفي بين حياتك العملية وحياتك الزوجية والأسرية صح الوحدة كي تكون خدامة وتسكن في بيت العايلة تصعاب عليها الأمور بزاف....نصيحة برك متتسرعيش في قراراتك.

[أم أسماء وعبد الرحمن]

السلام عليكم أختي نادين ماتقلقيش روحك وخاصة أنك حامل وبما أنك راكي متأكدة بلي راه تحت ضغوطات أمو حاولي أنك تستقلي ببيتك الخاص وهكذا راح ترتاحي وتنقص المشاكل.
هكذا صرا مع أختي وبعد ماستقلت وحدها زوجها تبدل وريحت من كل المشاكل.
إن شاء الله ربي يبعد الشيطان عليكم.