أحلى وصفة بان كايك مسروقة

[إلهام07]

البسملة1

مساء الخير على البطبوطات اللي راهم سهرانين

كثرتوا تطلبوا في وصفة البان كايك .... يا ولدي ما حبيتش نحطها ، أنا بيا عليكم باش ماتسمانوش

هاني حطيتها وكل وحدة تتحمل مسؤوليتها خخخ

شوفوا مجربة أنا وأختي المتزوجة عدة وصفات بان كايك حتى الوصفة نتاعو اللي مكتوبة في علبة النيسلي مجربة ههههههه .... وكامل عجبونا وملاح ... الحق لازم يتقال

بصح صراحة أنا من هذوك الوصفات كامل عجبتني هذي الوصفة لأنو أخف منها ما شفتش .... مانعرف لاه الحاجة المسروقة بنتها سبيسيال ... هذي الوصفة ماجبتهاش بالطرق المشروعة .... ماكلاه تحبو تفهمو منين جات

قبل مانحط الوصفة نبهكم لحاجة .... انا ندير غير نصف المقادير برك لانو هذي الوصفة زاكية ماديروش كيما أختي ماقراتش الملاحظة ودارت 4 بيضات وقعدت عشية كاملة طيب في البان كايك ههههه ( هي طيبو على نار هادئة على هذي طول معاه )

المقادير :

4 بيضات،6م ك سكر عادي،نصف كاس صغير زيت،كاس كبير حليب ( كاس اللي يهز ربع لتر ) ،فاني،2 خميرة،رشة ملح،180غ فرينة

الطريقة:

في الخلاط الكهربائي نخلط جيدا البيض مع السكر والفانيلا ثم نضيف الزيت والحليب ونخلط وأخيرا نضيف الفرينة المغربلة والخميرة ونخلط جيدا.

نتحصل على خليط ثقيل شوية .

شفتو .. ساهل ماهل .... اللي ماعندهاش خلاط ممكن تستعمل الباتور .

نسخن مقلاة تكون ماتلصقش ونطيب فيها البان كايك على الجهتين (النار ماتكونش قوية )

نبدى ديما نجرب نطيب حبة ونشوف : إذا حسيت الخليط شوية ثقيل نزيد شوية حليب باش يجي البان كايك خفيف ( الخليط مالازمش يكون ثقيل ) .

ضروري النار تكون متوسطة باش البان كاياك يجيك مثقب

نعسلو ونقدمو مع القهوة والحليب .

وهذي صورة الكاس اللي كيلت بيه الحليب فقط

شوفو كيفاش يجي خفيف ومثقب روعة









جربوه يا بنات والله وصفة را\عة وأنا اعتمدتها وجربتها عدة مرات يعني ماتخافوش .. إن شاء الله على ضمانتي

تحياتي ............ من مطبخ لهلوبة