نظرة المجتمع

[مشكلتي]

السلام عليكم


دون ‘إطالة , أنا فتاة مثقفة ذكية مجتهدة أجيد الطبخ الخياطة الرسم الأشغال اليدوية المعلوماتية بل و أحترفها و أي شيء آخر قد يخطر على بالكم كما أني الأولى على دفعتي لكني لست جميلة , و هنا المشكلة المجتمع لا يعطيني أي فرصة لأبرز مهاراتي أو ماشابه بل بمجرد النظر إلى شكلي يشمئزون أو يشفقون علي لست أدري , و هذا بات محبطا جدا ما جعلني أسأم من نفسي و شكلي حتى بت أقارن نفسي مع كل الفتيات ,
مع العلم نلبس حجاب شرعي .حتى أبي -مرة كنت مع أمي في المنزل لوحدنا وجاء هو و قالتلو قبل ما تدخل احزر شكون الجميلة لي هنا مالا هو ذكر أخوااتي كل فلانة ثم فلانة ثم فلانة ثم علانة و أنا لم يأت على ذكري اطلاقا . المهم هوما بقاو يضحكو و انا ضحكت شوي بصح في قلبي قلقت حتى لو مزحة المهم لا علينا .و عدا عن هذا لم يتقدم أي شخص لخطبتي أي شخص عادي أيضا لست أهتم .حتى أخواتي ساعات يستهزؤوا بشكلي بطريقة غير مباشرة و عادي منقول والو .
مفهمتش علاش الناس مدايرين كيما هكا علاش ميفهموش بلي الشكل خليقة تاع ربي تاع ربي افهمو واحد ما خلق روحو , و زيد علاش ميخلوش فرصة للواحد يحكي و يشوفو جمال روحو أو أفكارو علاه مباشرة يحتقروه .
أنا الان عدة سنوات الاولى على الدفعة في الجامعة و كل عام تتكرر ردة الفعل كي يسمعو بيا انا الاولى , يقولوا هاذي هي الاولى ؟؟ بازدراء شغل مانيش عبد انا منليقش نكون الاولى ربما الاخيرة توالمني ,و نفس ردة الفعل كل عام يسقسي الاستاذ شكون الاول في دفعتكم يجاوبوه فلانة يشوف معايا و هو مشوكي و لبقية مشوكيين ثاني .

لمهم ساعات نقول خليني نجرب الماكياج في الدار و نشوف هل من أمل أن أبدو جميلة و لكن النتيجة أسوء بل أبدو أقبح و أقبح , منفقدش الامل نروح زعما ندير ماسكات عناية بالبشرة و ما شابه و نداوم على روتين ..الخ بصح والو معليش مقدر لي أن أبدو قبيحة . صدقوني يا ناس انا مقتنعة بشكلي و منهتمش بالموضوع هذا خلاص بصح كي نخرج للمجتمع و نشوف تعامل الناس كيفاش نولي نحب نهبل او نمرض كي نشوف بنات زينات و لا هكا يوجعني قلبي و نقول علاش مش انا كيفهم علاش و ثاني في الاعراس لو ندير وش ندير و نلبس وش نلبس واحد ما يلاحظ وجودي صدقوني تتعبت و مليت اكرهت نشوف في وجهي في المراية كرهت .

ماتقولوليش الجمال جمال الروح هذي هدرة تاع كتب و افلام برك واحد ما يعمل بيها و لا يهتم بيها الكل يعشق الجمال , صرت نتمنى نكون جميلة و خلي نكون غبية و مانعرف والو .
الحمد لله على كل حال