التعسف في استعمال السلطة 2

[مشكلتي]

السلام عليكم مجددا
شكرا لكم جميعا على نصائحكم اخوتي
واش راح نقولكم انا زوجي عندو حب التملك بمعنى انتي زوجتي نحي قاع الناس من بالك حتى لوكان والديك لازم تفكري غير فيا انا وهاذ الشي راح يأثر عليا بزاااف كي عاودت قتلو وقتاش تديني قالي كي تبطلي تخمي في داركم انا نديك يعني وقت تنفحلو هو راكم فاهمين وقعدت معاه في قعدة حوار الي دايما ما طولش لانو ما يحبش الهدرة بزاف والثرثرة على اتفه الاشياء على حسابو هو وخرجنا بولا شيء هو متمسك برايو وانا غايضتني عمري واليوم بكيت حتى نشفو دموعي سيرتو مين عيطت يما وانا ما سمعتش التلفون ايا عيطتلو ليه وقاتلو واش بيها بنتي قاتلي هاذ اليومين نجي وما جاتش هو قالها راني خدام وكي نفرغ نجيبها وكي جا قالي يماك عيطت هدرت معاها وهي تعاتب فيا كيفاه الناس قاع جاو واليوم العايلة قاع راهي هنا وبنتي هي التالية بقيت نبكي ولقيتلها سبة كي العادة. بصح هي ما امنتش وقاتلي خلاص والله ما نزيد نقولك ارواحي غاضتني عمري وما عرفتش واش نرضي اذا يما ولا راجلي وليت كل واحد نلقالو عذر وانا مكاش الي يعذرني بلاك راه يبانلكم مشكل تافه بصح والله غير مشكل عويييص بالنسبة ليا
انا على بالي غدوة ولا غير غدوة يديني بصح الحل ما راهش هنا اذا كان هاذ السيناريو يتكرر كل ما نحب نروح لدارنا لازم نلقى حل ابدي انا نشوف سلافاتي ولا نسا خاوتي ماشي هكا المرا غير تحب تروح لدارهم يديها راجلها واش فيها ياك دارهم ماشي برانيين وكي قتلو حرت واش نرضي قالي ما يدوملك غير راجلك!!! ووالديا كيفاه ننساهم ولا ......راني نكتب ونبكي وحايرة كيفاه نبدل هاذي العقلية
المهم يعطيكم الصحة نتوما وربي يعيشكم ادعولي فدعوة الغائب مستجابة

بالنسبة للاخت امل
ايه ختي والله غير صح مازال فيه عقلية بكري وورثها على باباه خاطر كي نجي نشوف هو انسان واعي وصغير وخدم حتى خارج الوطن والفكر تاعو مازال هو هو
وكي قلتيلي ما تهدريش معاه بالخشونة نقولك حاجة هاذي وقيلا الي راح نديرها وبقاتلي الورقة الاخيرة كيما يقولو الي نلعب عليها خاطر انا من طبعي هااادية بزاااف ونهدر غير بلعقل ونفهم فيه وما نجبدلوش الهدرة حتى كي يكون هو هادي ونجيبهالو غير بالسياسة وفي الاخير ما نجني وااالو بلاك نسيي نولي نعيط كيما يدير هو نتفاهمو!!!

بالنسبةللاخ محمد التبسي لا والله يا اخي لا تقول لو كان كل الرجال مثل زوجي لكان المجتمع بخير فالمجتمع هو مجموع الاسر فما بالك بان تكون كل الاسر تعاني مشكلة صلة الرحم مثلي؟؟؟
فقاطع الرحم سيقطعه الله يوم القيامة
بالنسبة للصبر في هاذا الموضوع فقد مل الصبر من صبري ولولا صبري لما وجدتني هنا اطلب النصائح لحل مشكلتي وبارك الله فيك وفي نصائحك

الاخت intel
الحزم في القرارات هو الشي الذي ينقصني ولا استطيع فعله مع رجل جد عصبي
وفيما يخص نروح لدارنا كل جمعة هههه هاذي في المنام وما لازمش نومها نخاف راجلي يشوفني ههه يعطيك الصحة حنونة
الاخت زبدة ذائبة يعطيك الصحةانت تاني برك لفت انتباهي انو كاين الف طريقة نقدر نديرها ونبدل الوضع همال نقولك كل الطرق الي في راسك واكثر درتهم ولا شي مستحيل تغيير المبادئ بسهولة وفيما يخص الرضى الي تكلمتي عليه عندك الحق لو ما فتحتش كل المجال من الاول لما وصلت لهاذ الشي وبارك الله فيك

الاخت نور يعطيك الصحة وامين يارب

الاخت ميسو قاع الكلام الي قلتيه طبقتو من قبل يعطيك الصحة

شكرا كذلك للاخت فاتحة ،واصبحت اقلب كفيا على ما انفقت فيها.....