حجابي

[مشكلتي]

السلام عليكم جميعا
والله راني محتارة كيفاه نبدا واذا هادي صح مشكلة ولا انا راني نوهم في روحي
المهم انا امراة متزوجة وام لطفل وحامل والحمد لله
انا كيما معظم نسا تاع هاذ الوقت كنت دايرة حجاب عادي يعني في الصيف عباية اوملاية و في الشتا حجاب مونتو وزوجي يلبس عادي كيما الشباب تاع ضرك
انا عندي 2خاوتي اخينا
الكبير متزوج والي بعدو خاطب هاذ الاخير كل ما نروح لدارنا يقولي علاه يا ختي حجابك هكا. مزير عليك ويبقى ينصح فيا باش ندير جلباب بالادلة من القرآن والسنة وكل شي بقينا على هاذ الحال في كل مرة يعاود نفس الهدرة حتى اقنعني وقلتلو خلاص مادامك حابني ندير جلباب اشريلي انت من عندك باش نقول خويا دارلي الجلباب وكنت في منتهى السعادة والاقتناع
كي رحت في العيد الصغير. لدارنا لقيتو شرالي الجلباب فرحت بزاف ولبستو من هاذيك الدقيقة كي شافو راجلي عجبو الحال وقالي هكذا راكي مستورة احسن
في اليامات الاولين كنت بزاف فرحانة بصح كل ما تشوفني كاش وحدة تعرفني ولا من عايلتنا ولا من عايلة راجلي تبقى تقولي ايه جاك شباب بصح مازلتي صغيرة وغميتي روحك واخرى تقولي لازم ضرك ديري حساب لكلش واخرى تقولي راجلك يبان قدامك صغير عليك وانتي ما تبانيش قاع مرتو برا بلبستك مقارنة مع لبستو ووووو وبزاف هدرة فما نجاوبهم وبالدليل وقاع وكي نولي وحدي نبقى غير نخمم ونقول انا ورطت روحي واتخذت قرار سريع وضرك ما نقدرش نتراجع فيه والله غير عييت بزاف من هدرة النسا وسيرتو كي نخرج مع راجلي مع العلم هو انيق جدا وليت صح نحس بالفارق حتى راني كل يوم وراه علاش ما ديرش لحية وقميص مش تدين اكثر من انو راني حابة يكون في نفس مستوايا على بالي راكم رايحين تقولو هاذ من صفات المنافقين وانو جلبابي مظهري اكثر منو تدينا بصح هادا واش راني نحس الله غالب وليت نكره كي نكون خارجة ونحس اني مش انيقة قدام راجلي. سيرتو كي نكونو نمشو ويبقاو لبنات يشوفو فيه وكاني انا اختو ولا ماعلاباليش الغيرة تقتلتي بلا ما نهدر
نتمنى منكم تفهموني وتنصحوني باش نولي نحب جلبابي. انا على بالي راني على حق وهما على باطل بصح كيفاه نقدر نتغلب على الافكار السلبية الي عندي وعلى نفسي وجزاكم الله خير