السكن و العرسو كيفاش الحل

[مشكلتي]

السلام عليكم و رحمة الله و بركاته احتاج استشارتكم لاني فعلا دخت و ما لقيت حتى حل
مخطوبة من 7 اشهر و انا و هو في الثلاثينات
اتفقنا بالبداية انه راح يبني فوق بيت اهله و نسكنو وحدنا لكن ملر الوقت و مازال ما كملتش و مطولة باه تكمل و هو قالي اذا انتظرناه راح نجيب عام و اكثر نستناو و ماناش صغار في 2 و ماهوش حاب يستنا اكثر ؟؟؟
واش ندير نخاف السكن مع عائلته أولا نخاف المشاكل ثانيا اخته متزوجة ساكنة معاهم و زوجها يزورها كل شهرين و انا ماراحش نكون على راحتي حتى في اللباس
و ما يقدرش يكري لانو هو الوحيد عند امه و هي مريضة جدا
و انا فعلا صعبة نسكن معاهم لامور عديدة واش ندير ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[ياسمين قدسي]

يا اختي ياخي فترة اسكني مع دارهم حتئ يكمل بناء منزلكم وانتقلو له ...ما تدخليش بعقلية انها راح تصرا مشاكل ما تصراش انوي نية مليحة وبالنسبة لراجل خته معليش ياخي مدة صغيرة ومبعد تعيشي وحدك وتدي راحتك ماهيش مشكلة كبيرة ...ربي يسهلك نتي وزوجك بسطيها تسهال

[لحن الحياة.]

اسكني مع اهلو مدة واصبري حتان تكملو
ربي يفرج

[nihal159]

فترة تاع عام مش قادرة تتحملي فيها أهلو؟؟؟؟؟؟؟؟؟؟؟؟ وسعي بالك؛ وماديريش أحكام مسبقة؛ ممكن أنت تبانلك الحياة معاهم مستحيلة لكن كي تعاشريهم و تعرفيهم مليح تعجبك لمعيشة معاهم؛ ربي يكملك و ييسرلك أمرك.

[آسيا 25]

من رأيي أدخلي معاهم خصوصا أنك قلت أنو أمو مريضة جدا يعني حتى منباب الإحسان و حكاية أختو تسكن معاهم مليحة ليك على الأقل ترفد يماها و لكن أوقفي باش تكملدارك لأنو قادر زوجك يتهاون باش يكملها كي يشوفك قابلة الوضع و عاجبك الحال لازم ديما تفكريه أنك ماكش مرتاحة بسبب زوج أختك و ماش لاقية راحتك باش يزرب يخلص الطابق, ربي يسهل أختي.

[oumhana]

-قيس قبل ماتغيس،زواج ليلة تدبارو عام-

انامن رأيي روحي بلعقل خاطر إذا فتي سكنتي معاهم راح يفشل و ميكملش،بالعكس قوليلو إفيني غير لا شومبر وادخلي على السيمان متخافيش ميصرالك والو أومن بعد إفيني الباقي بلعقل و الله أعلم.

[ايمان4]

اذا فاتت فيك و قبلتي مشات عليك ساكنة تم رأيي واقعي من رأي الاخت ام هناء ... اسكنس لكان غير على السيما و معليش باش يزرب يكملها

[*أم سجى*]

اسكني مع اهلو واصبري راكي في نعمة لأنو انتي الكنة الوحيدة في العايلة يظهرلي مكان حتا مشاكل النسا راهم عايشين 5و6 كناين وبنات مع بعض في نفس البيت ونفس المطبخ الموحد ومقالوش كاين مشاكل وانتي عندك اخت زوج وحدة وخفتي المشاكل أي مشاكل ديرو الدالة وعيشي عام قيس ميبني وتسهللكم الحياة ان شاءالله

[امّ اياد]

اختي مضيعيش وقتك ودري نية وتوكلي على ربي هو قاع كي يطول ميتزوج نورما بصح نتي لازم تفكري في ضناية سبحان الله بلاك تلقاي مشكل لازم يكون عندك الوقت الكافي راه كل شهر يفوت يتحسب عليك نتي من الاول احكمي قدرك معاهم وقومي بواجباتك واصبري حتان يفرج عليك ربي المهم نتي ذرك متعرقليش زواجك على جال سكن شحال من وحدة سكنت مع اهل زوجها ومبعد دارت وحدها

[اياد حياتي]

اختي اوافق راي الاخت بانو يفينيلك غير لاشوبرغ ومبعد كملي والله فيك سكنتي معاهم راح يتمرض سورتو الا سكتي راجل يفشل كامل بعد لزواج سورتو على البنيان مع تعب تاع العرس سكني وحدك ومكانش منها هذي كل ما يكونو قلال مكانش مشاكل كي تجيك سوسة يا لو كان طفل صغير تجي منو المشاكل وكاين عايلات كبار مشاء الله عليهم وعايشين لباس بيهم وانتي وحدك تبقاي عزيزة واكيد تنزلي لعجوزتي تحسني ليها وتبقاي مليحة وربي يكملك على خير ودعيلي معاك انا نستقل وحدي وربي يهنيك

[روح المي]

أختي أقبلي سكن مع أهله العمر راه يمر و ادعي ربي يسهل

[ramzi-messi]

المشاكل الى مادرتيهاش انتي ماراحش تصرا , سكني معاهم و راكم درجة درجة الى وين كمل بناء منزله ,

و لو حتى اكمل البناء يعني راح يكون فوق المنزل يعني فيها فيها , واش غادي طسيس وحدك و تاكلي وخدك و ماتهوديش ليهو , لاااا عيب

[سجل أنا جزائري]

لماذا دائما عندكم سوء الظن على اهل زوج حتى و قبل ما تتعرف عليهم و تروحو ليهم

على جال هذي تولي كاينة حساسية كبيرة و و حاجة يدورها تولي مشكلة كبيرة لكن لو عائلتك عادي جدا

بالنسبة للأم ديرها مثل أمك و خاصة مريضة ادي فيها الأجر

بالنسبة الأختو يكون الحدود فقط ولا صاحبها و بالنسبة لراجلها عادي اذا جا نتي روحي لداركم ياخي يقعد أيامات برك

[حاملة المصحف]

هدي هيا الي تدير المشاكل الاحكام المسبقة بلي كتسكني مع اهل الزوج راح تصرا حرب
و انا نكلك كتكون النوايايا حسنة كون تعيشو اكل في غرفة وحدة ميصراش مشاكل و كتسوء النوايا كل واحد في دارو والمشاكل تصب
ديري النية و اسكني معى اهلو حتى يفرج ربي و ممكن حتى يعجبك الحال و تكملو البنية و متروحيش وحدك وحدك

[ملامح خجولة.]

سلأم عزيزتي
أختي هوِّنِ عليك كل هذآ
أنت قلتِ أنكِ لستِ صغيرة أنت في الثلاثينآت وهو كذلك
يعني معه كل الحق أتردين أن تتزوجي على أربعين سنة لن تتمتعي بشبابك بطبيعة الحال لو كنتِ صغيرة مثلأ 25 كنت ساقول لك عكس
ذلك وكنت سأقول لك لا تستسلمي حتى تؤسسي منزل ولكن الامر عكس هذا
ومثل مانقول بالدارجة انتي ادخلي بالنية الصافية مع أهل زوجك وعامليهم بالحسنى بطبيعة الحال وفوتي العام معاهم حتى يبنيلك وحدك
موفقة عزيزتي في حيآتك الزوجية والعاقبة للنسل الصآلح
تحيآتي