بيسكوي رولي ولا اروع ارواحو ماتفوتوش الفرصة و ساها

[نهر التسنيم]

السلام عليكم اخواتي توحشتكم بزاف عندي مدة مادرتش وصفات جدد اليوم جبتلكم وصفة البيسكوي رولي ماكاش اللي مايحبوش و تان خفيف و ساهل بلا مانطول عليكم نبداو بالمقادير بسم الله
المقادير:
4 حبات بيض بحرارة الغرفة
6 مغارف كبار سكر
5 مغارف فرينة مغربلة لازم
1 مغرفة كبيرة و نص نشاء او مايزينة
نصف ملعقة خميرة الحلوة
طريقة التحضير :
نضرب السكر مع البيض بالباتور مدة 10 دقايق حتى يولي الخليط متضاعف من بعد نضيف المكونات الجافة اللي غربلناهم ، نضيفوهم على 3 مراحل باه يجينا خفيف و لازم تخلطي من التحت للفوق بالملعقة الخشبية ، كي نكملو نفرغو الخليط فوق سنيوة مربعة الشكل نكونو حطينا فوقها بابي الومنيوم و ندخلوها طيب فالفور مدة 5 د الى 10 درجة حرارة 180 كي يطيب خرجيه من الفور ماتخليهش يحمار كيما راكي تشوفي فالصورة المرفقة غير تخرجيه من الفور اقلبيه فوق طرشونة مندية بالماء اي تشمخيهة و تعصريها مليح من بعد نحي بابي الومنيوم بكل سهولة و روليه قبل مايبرد ، من بعد خليه يبرد ،كي يبرد ادهنيه بالمعجون اي ذوق انا درت المشمش و روليه زيري عليه باه يشد لافورم من بعد رولي عليه بابي سيلوفات و خليه فالثلاجة يشد روحي مليح مليح من جهة اخرى حضري القاناش ذوبي باطة اومبسادر نوار فالحمام المائي غير تذوب نحيها من النار و ضيفيلها نصف علبة ياوورت طبيعي و خلطي مليح من بعد خرجي البيسكوي رولي من الثلاجة و نحيلو بابي سيلوفان و ادهنيه بالقاناش و رجعيه للثلاجة باه تجمد القاناش ومن بعد قطعيه كي راهي فالصورة و بالصحة و الهنا نتمنى تجربوه