ضحكت عليّ

[مشكلتي]

السلام عليكم ورحمة الله تعالى وبركاته

شكرا على المساحةالطيبة هذه كي شفتها ريحت انا غرضي نحكي همومي ونح على روحي راه تخف بالحكي
بلاك تظهرلكم مشكلتي هينة ، بصح راها عندي دايرتلي القلقة ،نختصر عليكم المشكل ونحكيلكم .
أنا شاب كنت نقرا باكلوريا علمي وجبت الباك تقدير جيد ، ورحت نقرا شعبة علمية ولكن للأسف لظروف نفسية ومالية إلخ ما كنتش جايب روحي واصلا صراولي ضغوطات خللاتني نوقف مساري الدراسي ونحبس عام كامل وبطلت ذيك الشعبة
ومنيش مندم عليها ذرك . لأنو لو عاد الزمن مرة اخرى كنت راح ندير نفس القرار اذن مانيش نااادم اطلاقا .
قريت عامين وحبست عام ...الصراحة في هذو الثلث أعوام جاتني حالة نفسية خلاتني نكره القراية وجد القراية وكل ما يتعلق بيها لكن الأهل والاصدقاء حاولو معايا
باه نروح نعاود نسجل بالباك في شعبة اخرى ونقراها المهم رضخت وروحت نقرا على وجه الوالدة أما ففقدت الرغبة اصلا في القراية
مالا هزيت الملف تاعي وطرقت أبواب الجامعات والكليات لكنهم رفضوني كانوا يقبلوا فقط الباك الجديد
انا في الاخير تأخرت على موعد التسجيل وقربت لشهر ديسمبر فوجدت كلية العلوم الانسانية والاجتماعية اخيرا قبلتني بعد تحلال طويل.
اذن درت شعبة ادبية وقريتها وفي بالي نقرا هكذاك وخلاص ماعندي حتى نفحة في القراية كان الي يسقسيني هذا انت درت شعبة أدبية نقلوا اذا الاساتذة يخلصو قع كيف كيف ها ندير مادة ادبية وخلاص ونعشي استاذ كيما الاخريين تاع الفيزيا والرياضيات .
المهم يخي كملت ودرت الماستر وجات المسابقة وسجلت في الابتدائي لانو عندي الليسانس اما الماستر راني نقرا فيه
كي سجلت نلقى العشرات من الشعب خاصة التقنية والاقتصادية الي معندهم حتى علاقة بالتعليم مع ذلك مشاركين معانا ومزاحمينا مع انهم هم عندهم الفرص في الشركات والمؤسسات وحتى يفتح لروحو
بينما أنا عندي الأمل الوحيد في مهنة المعلم الي بعض الشيء تضمنلي حياة كريمة على الأقل بتعفف .
أنا منيش نلوم في هذو الطلبة لا والله حاشا انما نلوم في الدولة .... يخي على الأقل يعطيونا الأولوية عليهم لا لشيء سوى أن هذه هي فرصتي الوحيدة باه نضمن مرتب قار وكافي .بينما هو عندو فرص كثيرة .
أنا منيش نحكي من خيال هكذاك لأني اليوم فقط رحت ندور على خدمة رحت لوحد المركز تاع فلاحة عارف بلي ماعندهاش علاقة بالشعبة تاعي ولكن قلت ندير ألاسباب وخلاص
مالا دخلت لقيت وحدة تخدم ثم مالا قتلها يا مدام اذا راهم يشدو في ملفات تاع الخدمة ولالا ؟ . قتلها أنا نخدم أي خدم بيرو عساس الي جات مرحبا بيها .نخدم كلش أنا منحبسش . مالا قاتلي انت وش عندك قتلها والو ماعندي حتى ديبلوم أنا جيت هكذاك برك سجليني بالباك .
المهم قاتلي وش راك دير ذرك قتلها نقرا ماستر مالا قاتلي هيه وش داير ليسانس تاعك قتلها التخصص تاعي فلسفة مالا انفجرت بالضحك وتضحك وتضحك وتضحك أنا حسيت بالحرج مالا قعدت نقللها نورمال سجليني بالباك برك نخدم الي جات بثمنيمية راضي ولا حتى ستمية نخدم عساس نورمال ولا نشد أي بيرو راني نعرف للاعلام الآلي .
لكن أنا نهدر وهي تضحك حتى جمعت الخدامة عليا . ومبعد حسيتها ندمت وقعدت تصلح في الغلطة تاعها مالا قاتلي اعطيني نمروك واسمك عطيتملها وجيت خارج .
وانا نمشي مروح للدار حاس بحجرة في صدري حسيت بعمري راح خسارة كي خيرت هذه الشعبة حتى الواحد باه يعاود الباك ويقرا راه راح ليه الحال
نخمم في هذه الدنيا العوجة لوكان جات البلاد مسقمة والمواطن محترم فيهاالديبلوم = منصب ، منحوسش نفهم المهم عطيتني ديبلوم ماتقعدش تضحك عليا انا نحوس توفرلي منصب بيه وإلا الواحد يقرا قراية وبعد يضحكوا عليه على الشعبة تاعو اذن سكرها ونح هذه الشعب مش تدخل فيها الطلبة ومبعد تضحك عليهم وتحقرهم في النهاية
الديبلوم هو الديبلوم مهما كان نوعو في الدول المتقدمة ويحتاجو لجميع التخصصات بنفس الدرجة
في عوض ما يقضو على البطالة في القطاع الاقتصادي يروحو بفتح المصانع يروحو يبعثو الناس دير تعليم المهم يسكتوهم ويشروا السلم الاجتماعي والضحية هو الطالب الي داير تخصص أدبي .
حبيت نفهم جميع الناس أن الطالب الأدبي هوطالب مثقف مثلو مثلك وليس أقل منك درجة بالعكس في الدول المتقدمة هو من نخبة المجتمع الي يقودو الوزارات والجمعيات والأحزاب والسياسة وهوما الي يأسسوا مراكز الدراسات وهوما اكثر شي من صناع القرار في البلد
انا ضد انك تضحك على أي ديبلوم تاع طالب مهما كان نوعو في النهاية هو طالب جامعي مثلو مثل خيوتو.

[~أميرة أميري~]

اخي ان شاء الله تلقى خدمة وتعبك مايروحش في باطل
وديك الحية ربي يهديها والله ماحق عليها شابعة على روحها على ديك ضحكت لكان جازت بحالتك ماتضحكش عليك
كبر قلبك ودير في بالك راه عندك نيفو بغيت ادبي ولا علمي برك كاين ناس مايعرفوش معنى التربية
اتكل على ربي وكمل شي لي بديت فيه وعمرو ربي سبحانو ماراح يخيبك
دير ثقة فروحك بويسك ادا راحت ثقتك فنفسك ماكانش لي راح يقيمك
مكانش لي يحبلك الخير من غير والديك وماتعمر راسك بحتى حاجة ماتستاهلش
ربي يفرج عليك ويعوضك على تعبك وماتعيا خدام وتضحك على هاد ليام
بالتوفيق

[مراد سابقا]

هذيك لي تضحك عليك

كيفاش جابت المنصب انتاعها

نقولك يا خويا

ما اكثر الساقطات في بلادنا

وما اندرهن بنات الفاميليا

[نور لاتراه]

السلام عليكم
المسالة مسالة ثقة بالنفس وليس مايقوله الناس

[إنسانة بسيطة]

نخمم في هذه الدنيا العوجة لوكان جات البلاد مسقمة والمواطن محترم






مادامك تهدر هاك مش رايح تتعدل امورك يا اخي يا اخي الدنيا ليها رب واحد كيفاه تقول الدنيا معوجة عاود مصطلحاتك
ثانيا وش الدولة ما الدولة كي الدولة قع تلوحك وتنفيك مايحقك غير لي كتبوا ربي
منين ثقتكم بربي تتزعزع وتدخلكم حب الدنيا ولينا نقراو في عباراتكم العربية الخالية من الحس الايماني والاسلامي

ربي يفتح عليك هذا مانقولك

[نورسين.داية]

بالنسبة لصاحب الموضوع ....بكل صراحة و هو رأي طبعا .....مقياس الفلسفة ....تخصص واش هي الفائدة منه مثلا .....و الله صح بجدية ؟؟؟؟؟؟؟؟؟؟؟؟؟؟ الفلسفة واش تنفعنا في الحياة ؟؟؟؟؟


لا انكر أحترم كتابات إبن خلدون من باب تخصص علم الإجتماع .....لكن الصراحة أنا شخصيا تعبتني و أساتدتها تعبونا معاهم بكل صراحة حتى هم إعترفو ا بهده الحقيقة ..............

أنا لا أحبطك ....لكن أضف شهادات لنفسك ....تدعمك في الحياة .......هو قطاع التربية أكيد هو المقر الأصلي لك كأستاذ لكن ....من أجل منصب العمل يقتضي ....أن تدعم نفسك في مجالات اخرى


و لك فرصة للتوظيف بمستوى سنة أولى ثانوي لمنصب عمل عون مكتب و مستوى ثالثة ثانوي منصب عون إدارة ....و مستوى باك يعني متحصل على الباكالوريا ...منصب عون إدارة رئيسي و هذه المناصب الثلاث تخضع لقانون الأسلاك المشتركة .....يعنيتقدر تدخل لللإدارة عادي جدا بهذه المستويات ....و لديك فرصة أكبر بطبيعة الحال

وفقك الله

[طاعة زوجي ..]

يا أخي ربي يفتح عليك ، تأكّد أنّ الرّزق بيد الله وحده سبحانه وتعالى ، أمّا هاته المرأة هذاها الله فلا تلق لما قالته بالا ، أصلا لم سمحت لها بإهانتك والضّحك عليك ، كان الأولى بك أن توقفها عند حدّها ولتذهب الوظيفة التي تأتي من طرفها إلى الجحيم
لا أدري لم هذا التّشاؤم عادي جدّا قرأت فلسفة جيّد غيرك يحلم بها ولم يحصل عليها ، أنت رجل ومجالات العمل كثيرة أمامك ولم يحالفك الحظ هاته المرّة ستجد عملا مرّة اخرى المهم أن لاتيأس وتفائل خيرا إن شاء الله

واعلم أنّ الأرزاق كما ذكرت آنفا بيد اللله وحده لذا توكّل عليه وأحسن الظنّ به وبإذن الله ستجد عملا وتتحسن أمورك

[redeye]

لا مبرر لتلك المرأة ان تضحك عليك سواء كانت عندك شهادة في الفلسفة أو بدون أي مستوى أصلا
لكن مفهومك حول العمل و الحياة و التوظيف كله خاطئ صديقي. الدولة ليست مشكلتها أن تقوم بتوظيف ملايين البطالين الفاشلين. بل يجب عليك ان تشمر على ذراعيك و أن تبحث عن فكرة ما أو مشروع و تعمل فيه. و صدقني هنا أنت لا تحتاج إلى ملايير الدولارات لكي تبدأ فقط مبالغ صغيرة يمكن جمعها بسهولة
أيضا أنت اخترت شعبة تعلم تماما أنها لن تؤدي بك إلى أي مكان. هل نلوم الفضائيين هنا أم نلومك انت على قراراك الخاطئ
لا تستسلم إن كانت لديك الارادة فسوف تبحث عن مخرج ما بدون ان تنتظر أن تمن عليك الدولة بمنصب حقير أو تغالي في تقدير شهادتك
تحياتي

[إعصار الشمال]

الفيلسوف إسحاق الكندي قد تكلم عن بعض البهائم العجماء منذ ألاف السنين وهي متواجدة بيننا بكثرة صديقي ولا تحزن ولا تترك مجالا للسفهاء لتثبيط عزيمتك دعك من كلامها فأنت تملك شهادة لا تمتلكها هي ولا يمكن لها أن تمتلكها إنها الأخلاق صديقي فتلك الورقة التي تملكها هي لا تساوي شيء أمام ما تملك أنت فكن مطمئن صديقي

[ابراهيم داود]

ربي يخفف عليك اخي الهم والحزن الذي اصابك....انا ايضا درست الفلسفة لكن في المدرسة العليا للاساتذة...وانا سعيد جدا بتدريسها.......اخي ثق بالله عز وجل وان الفرج ات لا محالة...لكن في المقابل عليك ان تكون واقعيا وتاخذ باسباب التوفيق.... مشكلتك اخي جملة من القرارات الخاطئة وغير الواعية التي اتخذتها.... عليك ان تدرك وتزن نتائج افعالك وان لا تترك العاطفة تسيرك....الظاهر من كلامك انك مزاجي وتنفعل امام القرارات الحاسمة....حاول ضبط هذه المشكلة....اما ضحك تلك الفتاة فدليل على قلة ادبها وغبائها لا غير

[إعصار الشمال]

نحن نعيش في عصر ثورة معلوماتية ومازال البعض يسأل عن الفلسفة و أهميتها أو فائدتها ومن يسأل عن مثل هذا السؤال كمن يسأل عن فائدة العقل وأهميته ؟ غريب ....

[(( هبة الرحمن ))]

السلام عليكم

لا أدبي ولا علمي ، المشكل يكمن في الثقة بالنفس .

شخصيتك تحدد مكانتك في المجتمع .

لو كنت مكانك لأسمعتها كلاما لن تنساه، سألتك عن تخصصك فأجبتها لماذا ضحكت قليلة الأدب هاته .

[زبدة ذايبة]

المشكلة فيك انت وليس في هذه المرأة

لو كان جيت عاطي قيمة لروحك ماكانتش تضحك

لحقت روحك لهذ المستوى ومن بعد جيت تشكي

تحضر في الماستر وتقوللها نقبل بخدمة عساس ؟؟؟؟؟؟

لوكان جا خويا اللي قالي هذا الهدرة نزعف عليه

وراك كي خويا

كيفاش طيح بروحك لهذ الحد ؟؟؟؟؟؟؟؟

تقوللها الي جات نخدمها مهما كان

الحمد لله اللي ماقلتهالهاش نخدم femme de menage

!!!!!!!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟

وش بيك ؟؟؟؟

مانفعكش العلم اللي تعلمتو

ضحكها هذا تحصيل حاصل لضعفك انت

ماشي هكذا يحوسو على الخدمة

نكتبلك نموذج لشخص أندنوسي ( أندنوسيا)

قال : تقدمت لشركة أمريكية كبيرة في أمريكا

كان عدد المترشحين كبير من كل التخصصات والخبرات

قال : مع كثرة المترشحين احتمال الفوز بالوظيفة 0%

في الأخير فاز هذا الشخص بالمنصب

ولما سأل مدير الشركة لجنة المقابلة لماذا اخترتم هذا بالذات

كانت إجابتهم أنه قال:

أنا مسلم وأصلي لاأريد أن تمنعوني من الصلاة بسبب العمل

احترم دينه فاحترموه

دخل للمقابلة بقوة

مع أنه يوجد أفضل منه

يا أخي وش نقولك

تعوذ بالله من الذلة والمسكنة

وكون راجل ماشي هكذا يديرو الرجال

تكون هدرتك حرشة وخزرتك حرشة

ماشي تقوللها نخدم عساس عند الباب !!!!!!!!!!!!!

صراحة زعفتني بزاف

[(( هبة الرحمن ))]

المشاركة الأصلية كتبت بواسطة زبدة ذايبة

المشكلة فيك انت وليس في هذه المرأة

لو كان جيت عاطي قيمة لروحك ماكانتش تضحك

لحقت روحك لهذ المستوى ومن بعد جيت تشكي

تحضر في الماستر وتقوللها نقبل بخدمة عساس ؟؟؟؟؟؟

لوكان جا خويا اللي قالي هذا الهدرة نزعف عليه

وراك كي خويا

كيفاش طيح بروحك لهذ الحد ؟؟؟؟؟؟؟؟

تقوللها الي جات نخدمها مهما كان

الحمد لله اللي ماقلتهالهاش نخدم femme de menage

!!!!!!!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟

وش بيك ؟؟؟؟

مانفعكش العلم اللي تعلمتو

ضحكها هذا تحصيل حاصل لضعفك انت

ماشي هكذا يحوسو على الخدمة


ماشي تقوللها نخدم عساس عند الباب !!!!!!!!!!!!!

صراحة زعفتني بزاف

هذا ما وددت إيصاله للأخ واختصرت ردّي في الثقة بالنفس ،

هكذا رأيته أنا كذلك ، هو من صغّر نفسه فجعلها تسخر منه ، وربما مستواها الدراسي أدنى من مستواه بكثير .
أتمنى ألا يغضب الأخ من كلامنا لأننا نريد به خيرا .
شكرا زبدة .

[غزلانْ]

السلام عليكم

ان كنت تجد من ضحكها نوع من الاستهزاء فقد

يعود اليك لأنك لست مقتنع بما تحصلت عليه

من شهادة و تخصص فلو تقبلته لرضيت ووجدت الأمر عادي

حتى موضوعك فيه نوع من عدم التقبل فكيف لك

أن تلوم تلك الفتاة أو أي شخص تظن أنه يستهزء بك

و في حد ذاتك كاره لما تحصلت عليه و ما كان

ينبغي عليك فعله هو أن ترد عليها كلمة لتعرف قيمتها

و قيمة ما درسته.

وفقك الله و رزقك من فضله