الحراقة

[مولود حداد]

السلام عليكم ورحمة الله


بْلاَدْنَا لاَلْجِيرِي وْعِيشْ *** تْشُوفْ فِيهَا غِيرْ الجْدِيدْ
رَاسَكْ يَحْبَسْ مَا يْسِينْيَالِيشْ *** عْقَلْ لِي جُونْ رَاحْ بْعِيدْ
فَالوِلاَيَاتْ أَرِيَّاتْ رُوحْ مَا تْوَلِّيشْ *** بْلاَيَكْ مَارْسَايْ إِيطَالْيَا مَدْرِيدْ
يْطِيحْ اللِّيلْ فَالشَّطْ تَلْقَى جِيشْ *** الحَرْقَة نْهَارْ هْنَا مَا نْزِيدْ

الشَّبِيبَة كَرْهَتْ حَابَّة تْقَلَّعْ *** مالقاتش روحها ديقوتات
مَاعَادْ مْعَاهَا يَنْفَعْ *** وَعْظْ أَئِمَّة وَشْيُوخْ قَنَوَاتْ
فِي بْلاَدْ البِتْرُولْ طَالَعْ *** وَالدْرَاهَمْ دُولاَرْ بَالمَلْيَارَاتْ
كَمْشَة شَابْعَة وَالشَّعْبْ جَايَعْ *** النَّاسْ حَاشَاكُمْ تَاكُلْ مَالبُوبَالاَتْ
السْرِيقَة المِيزِيرِيَة لَخْدَعْ *** لَكْذَبْ وْحَتَّى الحَاجَة اللِّي بْقَاتْ
البَالُونْ وَلاَّ مَا يْقَنَّعْ *** أَشْرِيهْ بْمَلْيَارْ رَجْلِيهْ زُوجْ دَرْوَاتْ

الشَّبِيبَة رَاهِي تْغَامَرْ *** وْعَالحَرْقَة تْدِيرْ كُلْ شِي
تْرُوحْ تْسَلَّفْ تْدَبَّرْ *** دْرَاهَمْ بَاشْ مَا تَقْعُدْشِ
تَرْمِي رُوحْهَا فْلَبْحَرْ *** مَا نَعْرَفْ تَرْجَعْ وَلاَ مَا تَرْجَعْشِ
شَايْفَة لْهِيهْ حْشِيشْ خْضَرْ *** وْمَا يْجِيبْ الصَّحْ اللِّي مَا يْجَرَّبْشِ

قْبَلْ مَا تْرُوحْ نْقُولَّكْ *** هَذِيكْ مَهْمَا كَانْ غُرْبَة
خَمَّمْ مْلِيحْ مْعَ رُوحَكْ *** خَاطَرْ الحَالَة صْعِيبَة
تَمَّا مَا قَالْشْ وَاحَدْ يَعَرْفَكْ *** وَالمَعْرِفَة فَالخَدْمَة تْكُونْلَكْ سَبَّة
تَمَّا وَشْ كَايَنْ فْبَاقَاجَكْ *** وَالحَرْفَة حَاجَة مَطْلُوبَة
سِي نُونْ رَاحْ تَتْشُومَرْ وْتَتَهْلَكْ *** تَرْقُدْ عَالكَرْتُونْ مْعَ شَرّْ الصُّحْبَة
وْرَايَحْ تَكْرَهْ حْيَاتَكْ *** وَتْقُولْ وَالله مَا زَدْتْ ضَرْبَة
وْتَنْدَمْ عَالخُطْوَة دْيَالَكْ *** تَرْجَعْ مَتْحَسَّرْ عَايَشْ نَكْبَة

نْخَرْجَكْ شْوِيَة الآنْ *** نَنُقْلَكْ لْوَاحَدْ المَعْنَى
لْوَاشْ رَاهُو شَايَفْ الجَانْ *** أَنُّو لاَبَالْ فِي جَنَّة
ضَحَّى خَبَّى بَاتْ جِيعَانْ *** سْمَحْ فْلَحْيَاة وْفَلْبَنَّة
هَلْ يَا هَلْ تَرَى لُوكَانْ *** نَقَدْرُُوا نْدِيرُوهَا حْنَا

هَاوْ وْعَدْنَا المُتَعَالْ *** بَالعَاقِبَة جَنَّة عَدَنْ
حَقِيقَة مَاهِي خَيَالْ *** يْكُونَلْنَا الخُلُودْ وَالمَسْكَنْ
جَزَاءْ الصَّبْرْ وَالاِحْتِمَالْ *** لَكَنْ لَكَنْ وْلَكَنْ
الاتِّعَاظْ صَارْ صَعْبْ المَنَالْ *** وْصِرْنَا نْشَحُّوا فَالثَّمَنْ
وْرَبِّي نْشَالله يَصْلَحْ الاَحْوَالْ *** وْيَرْزُقْنَا القُوَّة بَعْدْ الوَهَنْ