سؤال للبنات مشكلة في التسلام

[مشكلتي]

رايح نخطب فتاة من عائلة محافظة كما نقولوا ملتزمين زعمة دوك تفاهمنا مع والدهم اننا نروحوا انا و الوالدة و اختي و اخي بمعنى انا و اخي نقعدوا مع الرجال و امي و اختي مع النسا
ضرك حبيت نفهم ادا مثلا جات ليا والدة الفتاة ول فتحت هي الباب ول التقيت بها لاي سبب نسلم عليها زوج نورمال كشغل امي ول من بعيد برك ؟ ايضا لديها اختها عمرها حوالي 13 سنة ادا صادفتها لاي سبب نسلم عليها ول منقيمهاش كأني مشفتهاش ؟ خايف من المواقف المحرجة متسلمش عليها يقولك راه متكبر و الطفلة صغيرة نسلم عليها يقولك اختلاط و معلاباليش نفس الشيء بالنسبة لوالدتها منسلمش اقولك في مقام والدته و ينفر منها نسلم عليها اقولك هدا يتلاح على لمرا
سمحولي مانيش موسوس بصح نأخد بحذري باه منحطش روحي في موقف بايخ خاصة اول مرة نخطب و معرف بقدري محافظ بصح منفهمش التقاليد هادي تخلطتلي شوية

كاين ناس اقولك مادامك محافظ متسلم على حتى وحد غير محارمك كما نقولوا خالاتك و عماتك و اخواتك و امك المشكلة عداو عليا ائمة زعمة اسلموا على حاماتهم يعني ام زوجتهم قلت انا ربما يوجد خلل في تفكيري

[الصحة النفسية]

السلام عليكم و رحمة الله :
الأمر واضح ، الوالدة أجنبية و الأخت ذات 13 ربيعا كذلك ، سلم بالقول فقط و لا داعي للإحتكاك ، وفقك الله..

[الطيب الجزائري34]

ههههههه قتلتني بالضحك يا مصيبة ... اخويا ربي يباركلك و يسهلك .

[وَحْـــ القلَمْ ـــيُ]

ههههههههه لم اتوقع ان تكون هذه المشكلة هههه
حنا عادي زوج اختي كبير يسلم على امي بالعكس التسلام يشوفوه لي كبار قدر وقيمة
لكن كيماراك تقول المادام من عائلة محافظة تخاف هههه
وشرايك تسقسيها على عادتهم هههه ولا قول لختك تهدر معاها وتسقسيها ههههههههههههههههه
سمحلي اخي الكريم باين فيك نيية ما حابش تتبهدل..ربي يسرلك لكن في الجزائر تحير هههه

[sarl02]

اذا كانت الوالدة تاعها كبيرة ...سلم على راسها من باب الوقار والاحترام ...واذا كانت في سن عادية فالسلام عليكم والسؤال عن الحال تكفي بدون تقبيل ..بالنسبة لاختها الصغيرة عادي لا مشكلة ....المهم ازدم ومن بعد يرحمها ربي ووفقك الله .

[muhibbat rrasoul sws]

13 سنة!!! ماني الله يرحمها زاد عندها وليدها الكبير على 13سنة!
اما نسيبتك انت رآك برك خاطب يعني لا تزال اجنبيا
اما بعد الزواج، هنا انا شخصيا بحثت كوني لا أحب التسلام هادا ففوجئت بجوازه على حسب فهمي
و انت تقول محافظين يعني رد بالك تغلط

[أمل94]

اخي انا من رأيي الوالدة أم خطيبتك يلا كانت صغيرة متسلمش عليهاادخل وقوللهم السلام عليكم وبس.أما اذا كانت كبيرة قريب تكون في مقام يماك هنا تجوزلك تسلم عليها والأحسن تحب راسها وتقوللها واش راكي يايمة او ياخالتي .......هكداباش تبان محترم وميزعفوش منك .أما البنات الاخرين بما فيهم صاحبة13سنة فلا داعي لصنع حكاية لهم.....متعطيهاش أهميه ديرها كلي مكاش. وأصلا مهيش راح تظهر أمامك كونهم محافظين ..... ومتخافش يقولو متكبربلعكس.....ربي يوفقك ويباركلك

[***ريهام***]

هههههههه والله اضحكتني كثيرا جيد منك ان تهيا نفسك قبل الوقوع في مواقف محرجة ههه

بحكم ان اختي الكبرى اختطبت الاسبوع الماضي ممم نقدر نعاونك شوي

صحيح الرجال لوحدهم والنساء لوحدهم لا وجود لاختلاط بتاتا
ثم ان امي لم ترى حتى وجهه بل وضعت الحجاب حتى وقت رؤية اختي من بعيييد تاني قدام باب الصالون كانت نظرة خاطفة وسريعة هههه(ربما كي شافها في عملها) وامي غضت بصرها ولم تره وهو كان خجولا ايضا مطاطئ الراس يعني بداية اول مرة الامر مخجل شوي
يا اخي واش تسلم هههه هذا لايجوز في الدين ابداا لا لامها ولا اختها القي السلام فقط السلام عليكم وانتهى وزيد تاني مدام عندها بنت 13 سنة الا امها صغيرة .... بالنسبة لجدتي عمرها 85سنة وبابا جامي سلم عليها رغم قد اولادهاوغالبا ما يكون السلام بالمصافحة فقط نظرا انها قريبة له من نفس العائلة يعني ماش غريب ياخي حنا نحشموا بزاف هه وانا من عائلة محافظة عطيتك مثال هه حتى الطاعن في السن اظنه لا يجوز كون المحارم معروفة
اتمنى فدتك ولو بالقليييل
ربي يسهلك اخي ويبارك زواجك

[غزلانْ]

السلام عليكم

مسألة التسلام كما ذكرت
فيما يخص الخطيب و والدة الفتاة
أنت الأدرى ان كانت تستحق
أو لا تستحق من خلال مظهرها
من ناحية السن ان كانت كبيرة و تعطِ لسنها احترام
فيكفي " تقبيلها على رأسها "
و ان كانت غير ذلك يكفي تحية " بالكلام "
" لا التسلام "
و عن أختها " سلام باليد يكفي "


بالتوفيق

[Golden Princess]

انا على العكس لم يضحكني سؤالك بل وجدته جد مهم خاصة مع الانفتاح الذي بتنا نعشيه
انا ايضا نفس المشكلة تواجهني مع اقاربي الرجال ,,,,,
مدامك مزال مارحتش لازم توضح الامور من البداية فهذا الامر مهم جدا ,,,,, يعني اذا من اول مرة سلمت عليهم رح تبقى طول عمرك تسلم و اذا اخذت موقفك من البداية رح تكمل كيما هاك و حتى هوما يتعودو على الامر و يصبح جد عادي ....... و بما انك محافظ فهذا سيساعدك كثيرا يعني عندك السبة الي تخليك ما تسلمش و حتى هوما رح يتفهموا الامر ,,,, انا مثلا لدي زوج عمتي هكذا ما يسلمش لانه محافظ و هذا من حقه,,,,,,, بل ان الرجل الذي يقوم بذلك في نظري هو رجل بمعى الكلمة على الاقل تربح دينك ,,,,, هذا الشيء راه حرااااام بلا ما ننساو ,,,,,,,,,
نرجع ليك اذا كانت امها كبيرة في السن كيما قالت الاخت حب راسها من بابا الوقار لا اكثر اما اذا كانت صغيرة فلا تسلم و ان لزم الامر اخمس معاها و اختها ايضاا ,,,, و نصيحة اذا كنت تحادث خطيبتة حاول توصل لها الفكرة و هذا لتفادي الاحراج ,,,,,,,
كلشي مبروك مسبقاا ,,,,,, وفقك الله

[ريشة خير]

السلام عليكم

يظهر عليك من حسن الخلق ما شاء الله

وفيما يخص قضيتك

لا طاعة لمخلوق في معصية الخالق

ومن توكل على الله فهو حسبه

من رأيي دع المبادرة لهم لأن طالما لا طريقة للالمام بأمرهم
فكيفما تصرفوا ألا تعترض لكن حاول لا تبادر أنت بتصرف

ثم بعد زواجك ان شاء الله يمكن لزوجتك مساعدتك
في الحفاظ على تعاملاتك الدينية

والله أعلم
يمكنك زيارة الفتاوى المباشرة في موقع اسلام ويب
من الساعة 6 صباحا الى 8
ربي يوفقك ويباركلك

[hodayena]

ام الزوجه في مقام والدتك وهي محرمه عليك شرعا تسلم وقار فقط اما الاخت الصغرى فما شي شرط تسلم عليها
بالنسبه لخالاتها وعماتها كي تلاقاهم سلام عليكم وخلاص ماشي شرط تسلم بالخدود

[نسيم الريح ش]

حنا اسرة محافظة امي ما شلفتش راجلي حتى تزوجته وجيت ضيفة لدارنا عادة باش سلمت عليه وكل واحد وظروفه والموقف لي يتحط فيه

[AMINA.Z]

تاخذ راي اخطيك من التسلام من الاول يعرفوك خاطيك
اصلا هاذ العادة تافهة عندنا و كون نبطلوها نتهناو.

[ابو ارسلان]

يا اخي يعطيك الصحة على طرح الموضوع..
هذا التسلام ورثناه من العفن نتاع فرنسا و هي عادة دخيلة علينا خاصة تسلام الراجل على المراة الاجنبية يعنى لي ماهيش من المحارم نتاعو
و كيما قالك الاخ ما دامك جديد على العايلة من الافضل تعطيلهم عقليتك بلي ما تحبش التسلام و رايحين يتقبلوها..
لانك رايح يطيح في مواقف حرجة وين تلقى روحك تسلم على قاع نسا اقارب زوجتك و ما تفهم فيها والو.

وشنو روح بالشوية و اعرف كيفاه تقنعهم.

اما عن نسيبتك بعد ماتعقد على زوجتك طبعا لان الخطبة معناه مازالت اجنبية عليك.. انا ما نقولك حلال مانقولك حرام لكنها العادات و هي رايحة تصبح مثل امك فهذي نورمالمو ما فيها والو
و حنا نطلبو ربي تروح هاذي العادات الفاسدة