حسبي الله

[مشكلتي]

السلام عليكم
جيت نفرغ قلبي ونفاجي عليه معندي غير قسم مشكلتي مانيش حابة نحكي واش صرا لامي او خواتاتي دارتلي القلقة وجيت نكتب هنا وراني نبكي مقدرتش نحكم في روحي وانا امراة حامل وفي الشهر السادس

اليوم نضت قلت نفوت على دار خويا نشوف بناته نحي على بالي شوي وصلت 10.40 لدار خويا بحكم انه يسكن قريب ليا طبطبت في الباب 3 مرات مفاحتش عليا الباب كنت رح نروح مع انه علابالي باللي راهي في الدار لانها غير عاملة
فتحت عليا الباب وهي مشنفة عمري في حياتي مصرالي هكدا مش وجها مثلا مفيهش تعابير لا مشنفة وتشوف معايا كاللي واش جابك وانا كون جيت كل يوم نروح نقول بالاك كثرت راني قليلة الزيارات رغم انهم قراب لينا من نيتي قلت بالاك كشما صرالها سالتها قتلها واش صرا كشما تشاجرتي مع خويا قاتلي والو مصرا غير هذا وقت رقادنا كنا راقدين عميلكم قريب ضربت وجهي كف حكمت في اعصابي خلاتني كي الرخيسة في الصالو وحدي مكملتش دقايق هزيت لبست صباطي وقتلها راني رايحة حكمت في روحي باش متشوفنيش نبكي ورحت للباب وخرجت وباقية ماشية ونقول كشما درتلها انا كشما نهار انا درت في عبد هكا حتى تصرالي مفهمتش علاش وانا خارجة شغل تشوف معايا ببرود يعني روحي ومن بعد
هبطت حكمت طاكسي غلبوني دموعي وانا راكبة مقدرتش نمشي على رجليا دارتلي الدوخة

هاذي اللي الوالدى تاعي حطتها كي بنتها وشرطتلها كلش كي بناتها وكانت تدافع عليها ضد خويا وواحدة متداخل فيها خارجة بدارها ومستقلة بكلش

حسبي الله ونعم الوكيل فيها كنت رح نشكي لامي من بعد حبست قلت نستاهل نوكل عليها ربي ذوقتني الذل تزعكت بطريقة غير مباشرة جامي في حياتي معشت موقف كيما هكد

[محمد جديدي التبسي]

وعليكم السلام ورحمة الله وبركاته
هاذو هوما النساء واش راح ديري التناقض يمشي معهم في الدم الا ما رحم ربك .. وكلي أمرك لله وادعيلها بالهداية وخير الناس الذي يصبر على أذى الناس ولا يعاملهم بالمثل.. أشيد بكتمك للأمر عن والدتك هذا يدل على نضجك ووعيك ربي يسهلك حملك ويرزقك الذرية الصالحة.

[لامْية]

ايه وديرلك اكثر انتي مازلتي مشفتي والو هذو هوما نسا الخاوة لكان يصيبو اخوات زوجهم يلتصقو فالارضية وهوما يصعدو للعلالي هذا الواقع المعاش انا قبل منزوج كان عندي زوج نسا خاوتي خدمو فيا لي خلفها بليس بصح وكيلهم ربي وكي تخطبت كادو ينفجرو معجبهمش لحال زعما كفاه نتي تتزوجي الزواج لينا برك وانتي تقعدي ودارو البوسيبل تاعهم باش منزوجش والحمدلله ضرك يعني صح يغيرو منك يحسدوك توصل بيهم الدرجة ميتفاهموش فيما بعضاهم بصح عليا يتفاهمو ويتكتلو وش نقول اختي انشاله كل انسان يدي حقو مدنيا هذي

[baalache]

المشاركة الأصلية كتبت بواسطة وردة صفراء

ايه وديرلك اكثر انتي مازلتي مشفتي والو هذو هوما نسا الخاوة لكان يصيبو اخوات زوجهم يلتصقو فالارضية وهوما يصعدو للعلالي هذا الواقع المعاش انا قبل منزوج كان عندي زوج نسا خاوتي خدمو فيا لي خلفها بليس بصح وكيلهم ربي وكي تخطبت كادو ينفجرو معجبهمش لحال زعما كفاه نتي تتزوجي الزواج لينا برك وانتي تقعدي ودارو البوسيبل تاعهم باش منزوجش والحمدلله ضرك يعني صح يغيرو منك يحسدوك توصل بيهم الدرجة ميتفاهموش فيما بعضاهم بصح عليا يتفاهمو ويتكتلو وش نقول اختي انشاله كل انسان يدي حقو مدنيا هذي

ااااااااا تريثي فقد تقول اخت زوجك هذا الكلام عنك

[نسيم الشوق]

ليس أريح لقلب العبد في هذه الحياة ولا أسعد لنفسه من حسن الظن، فبه يسلم من أذى الخواطر المقلقة التي تؤذي النفس، وتكدر البال، وتتعب الجسد. إن حسن الظن يؤدي إلى سلامة الصدر وتدعيم روابط الألفة والمحبة بين أبناء المجتمع، فلا تحمل الصدور غلاًّ ولا حقدًا
إن إحسان الظن بالناس يحتاج إلى كثير من مجاهدة النفس لحملها على ذلك، خاصة وأن الشيطان يجري من ابن آدم مجرى الدم، ولا يكاد يفتر عن التفريق بين المؤمنين والتحريش بينهم، وأعظم أسباب قطع الطريق على الشيطان هو إحسان الظن.

رزقنا الله قلوبًا سليمة، وأعاننا على إحسان الظن بإخواننا، والحمد لله رب العالمين.

[عثمان الجزائري.]

أختي كيف تزورين عائلة على 10.40 دقيقة صراحة هذا ليس وقت الزيارات كنت تستطيعين الذهاب وراء العصر مثلا و تجلسين قليلا .....؟؟؟؟؟

[هدآية]

كاين احتمالين مادام كانت مليحة معاكم قبل

الاحتمال الاول انها قررت تبدل طريقة المعاملة
وتجبد روحها منكم
باه ما تولوش تزروها

الاحتمال الثاني
عندها مشكل ولا حاجة خلاتها ماهيش طبيعية
وكي تزول ترجع كيما كانت سابقا

ربي يصلح الاحوال

[أم عبد الكريم]

خليها لربي .............نصيحة اجبدي روحك و خلاص .كي تتغمي و تحبي تفاجي روحي حلي كتاب ربي واقراي احسن من مليون زيارة هذا بالنسبة ليا .............

[ameur elkhalil]

المشاركة الأصلية كتبت بواسطة أم عبد الكريم

خليها لربي .............نصيحة اجبدي روحك و خلاص .كي تتغمي و تحبي تفاجي روحي حلي كتاب ربي واقراي احسن من مليون زيارة هذا بالنسبة ليا .............

كما قالت لك الاخت أم عبد الكريم لا ازيد حرفا واحدا

[أم رقية نسرين]

حنونة متقلقيش روحك و عملتي براي مليح كي مقلتيش لماماك
هي ربي يهديها
ريحي روحك و متبقايش تخمي في هاد الموقف القلقة مهيش مليحة ليك راهي تأثر عليك و على الجنين

[غزلانْ]

السلام عليكم

مهما كانت حالتها
تبقي أنت أخت زوجها
أيعقل هو نعم و أنت لا
ربما طريقتها هده ترمي
من ورائها الى الانعزال عنك
و أسرة زوجها
الله يهديها
و لا تبالي بموقفها

[AMINA.Z]

الله غالب واش راح ديري
حاذري على صحتك و حالتك النفسية
ربي يقومك بالسلامة

[النجمة القطبية]

يا حبيبتى متقلقي روحك ما والوا
كاين بعض النساء تكره كثرة الزيارات
وكاين اللي متحبش الزيارات بدون وقت محدد تحب تتصلي بيها قبل ما تروحي 7وكاين اللي مسوسة متحبش تشوفي
دارها ماشي نظيفة او مرتبة تخاف تحكي عليها
شخصيا نعرفو واحدة هكا لدرجة واحد ماراه يزورها خلاص
لكن مهما كان السبب متقلقي روحك ما والوا صحتك اهم والتمسي لها الاعدار الله اعلم بالسبب
ما تحكي ما والوا فاصيها من راسك تماما واضحكي والعبيوخليها وحدها تشك في روحها ومتفهم والوا
ربي معاك
ويطلعك على خير

[فرح 97]

نسا الاخوة كل هاك الا من رحم ربي و لي تخاف ربي و بالنبسة ليك ما تزيديش تروحيلها الا اذا كنتي متاكدة بلي خوك في دارو و قدام خوك عمليها عادي كانها ما دارت والو ووكلي عليها ربي

[أم سلوى]

مثلما قال الاخرون