الدرس التاني من مدرسة تعليم فنون الطبخ

[*أم كوثر*]

البسملة1





درسنا اليوم عبارة عن وجبة محببة لدى الجميع صغار وكبار
واخترتها لكم بكل اسرارا ها وان شاء الله تنال رضاكم
درس اليوم هو

الشورما
عبارة عن طبق رئيسي غني كامل ومتكامل
نبداو على بركة الله طريقة الخبز ومن عجينة واحدة رح نعمل اكتر من نوع خبز للشورما
نحتاج الى :
اولا: نذوب 2 مغارف كبار خميرة و2 مغارف كبار سكر في قليل من الماء الدافئ



نمزج
4 كؤوس فرينة
مغرف كبيرة حليب بودر او لحظة
4 مغارف كبار زيت
ملح حوالي نص مغرف كبيرة





نضيف الخميرة بعدما تكون خمرت .ماتاخذش وقت 5 د لااكتر


ونعجن بالماء الدافي حتى نتحصل على عجينة طرية تلتصق في اليدين لااازم تكون طرية نبلل يدي بالماء وننفض العجين كما نديرو في جينة المحاجب

نخلي العجين يختمر 30د فقط





نهبط العجين وبالاستعانة بالفرينة ندير قرصات باحجام مختلفة من بعد تفهموا علاه الحجم مختلف






نبدى على بركة الله في التشكيل

هنا رح نشكل خبز البانيني




نفرد العجينة رقيقة ونلف كما هو موضح ونخليها تختمر مدة ساعة كاملة




هنا نقرص الخبزات فوق السميد ونخليهم يخمروا مدة ساعة ايضا





هنا نحل بالحلال القرصات الصغار



وهنا نحل القرصات الكبار رقاق عكس لي قبل لانو هذو رح نلف فيهم الشورمة مش نحشيهم

يرحو 5 د لاغير ونكونوا سخنا مقلاة تيفال او طاجين الحديد ونبدى نطيب
كي يسخن ملييييح نقص للنار خلاص
نحط اول قرصة بديت نحلها ولما تشكل فقاعات نقلبها مباشرة





رح تلاحظو انها بدات تنتفخ نقلبا بخذر باه طيب من كل الجوانب ونحاذر ماتتثقبش لانو رح يخرج كامل الهواء لي فيها وماتنتفخش بشكل مرضي

هنا نكمل نطيب البقية





نغطيهم مليح ونديرهم في ساشي لوقت الاستعمال
بعد مرور ساعة نطيب الخبزات لي بقاو

هنا نسخن الفرن مليييييح مع السنيوة ونحط الخبزة تطيب من فوق يعني نشعل الشواية

ذ

وهادو نطيبهم كما مالفين نطيبوا الخبز


الان نحضر صوص التومية اللي هي الاساس في الشورما السورية ولاغنى عنها وماازمش تتبدل باي صلصة اخرى
الطريقة ناجحة وبسيطة ومقاديرها مضبوطة
كاس ماء + مغرف كبيرة ونص نشاء نحركهم مليح ونديرهم على النار حتى يغلوا نحرك تحريكة مليحة ونطفي مالازمش تغلي بزاف فوق النار لانو من بعد رح ينفصل الماء وتفسد الصلصة





نخليها تبرد ونديرها في الثلاجة تبرد وتتماسك مليح



من بعد نديرها في ميكسور لاااازم ميكسور او براميكسور او الطاس لي يجي مع البيترا
نحط خليط النشاء مع 2 سنات توم ونميكسي مليح باه يترحى التوم

من بعد نبدى نضيف 4مغارف كبار زيت على دفعات كل مرة مغرف
ونمكسي مليح حتى يروح اثر الزيت ونزيد نكمل المغرف الموالية ونمكسي حتى نكمل نضيف عصرة قارص وملح حتى يتعدل الذوق نخلط مليح وصارت جاهزة
لنجاحها برك لازمها تتخلط مليح مليح



الان نطيب الدجاج او السكالوب لي تبلناه وخليناه يتشرب



صدر دجاج او طرف اسكالوب مقطع قطع صغيرة وملح وفلفل اسود فلفل احمر حار وتوابل الذواقة وراس حانوت وكمون وعصير نص حبة قارص 2 مغارف زيت ونص مغرف موطارد ونص مغرف طماطم مصبرة ونخلطهم ونخليه يتشرب




من بعد نطيبهم بلااضافات لازيت ولاماء
نظل نحرك حتى يطيب ويتشرب كل الصوص لي نزلوا



نحضر بطاطا مقلية وسلاطة وطماطم وكاضافة مايونيز بلفلفل الحار ونبدى نحشي كما هو موضح وكل واحد وذوقه







هنا فرغت الخبزات من داخل باه يبقى مكان للحشو والخبز من داخل طري وكي الاسفنجة
هنا لفيت الشورمة








اخر حبزتين حشيتهم هوما لي رمدتهم في السميد وطيبتهم
مايحتاجوش باه نحمصوهم كما البقية
وكان هذا درس اليوم اتمنى يكون في المستوى ويحوز على رضاكم
لي عودة للرد على استفساراتكم
اي خطأ في الكتابة او ماشابه راجع لثقل النت ولاني نكتب ونعاود مرات ومرات فــ عذرااا