جبتلكم صابلي نوار بالشوكولا و الكريمة روووووعة

[أم آدم و دارين]

سلام يا أحلى و أغلى عضوات ..راني جبتكم معايا صابلي رووووووعة و يذوب في الفم خاصة الكريمة اللي فيه عملتها بالزبدة و النيسلي و معجون المشماش مدتلو ذوق رهيييييب نترككم مع الصور

نعطيلكم الوصفة و آسفة جدااااا على التأخير :
العجينة : 500 غ فلوريال نخدمها مليح +كاس إنوكس سكر +3 بيضات +زاست حبة برتقال +زاست حبة ليمون +3 ملاعق كبار كاكاو أسود+كاس مايزينة+نصف باكي خميرة +فرينة حتى تتلم العجينة ثم حليها في وسط البلاستيك باش ما تزاوديش الفرينة و تتيبس العجينة و النتيجة جد مرضية ديري الشكل اللي تبغي و أعمليه في بلاطو مرشوش بالفرينة ما يحكمش بزاف الوقت في طيابو في هاذاك الوقت تكوني وجدت كريمة الزبدة : أخدمي الزبدة مليح و ابداي تضيفي بالدالة خطرة نيسلي كاراميليزي خطرة معجون مشماش حتى تتحصلي على الحلاوة اللي تبغي لما يطيب لصقي حبة فوق حبة و أعملي طبقة مليحة نتاع الكريمة ثم ذوبي شوكولا نوار في الميكروأوند و ديري القلاساج نتاعك و اعملي الديكور اللي تحبي أنا عملتو سامبل على خاطر درتو للدار برك نشربو بيه القهوة أما كي تكون عندك مناسبة تقدري ديري مثلا اللوز إفيلي على الحواشي و تعملي حبة توت في الوسط اللي تقدري تخليها حمرة ولا تغطسيها هي الأخرى في الشوكولا و تعمليلها بريون فضي و تزيني بيها ..هاذي مجرد فكرة و التزيين أذواق
ملاحظات:
-الشوكولا اللي إستعملت هي منى نوار الكمية هاذي تاخذلك تقريبا 5 طوابل
-هاذي الكمية قطعتلي تقريبا 65 حبة
-الحلوى هاذي حساسة جدااا إتعاملي معاها برفق كي ديري القلاساج
و أخيرا جربو هاذي الحلوى ما تندموش عليها لأنها رووووووووووعة و بنتها خيالية ننتظر ردودكم................. دمتم في رعاية الله