بريوشاتي و لا اطيب

[زينب 83]

السلام عليكم و رحمة الله و بركاته


الصراحة ماكنتش راح نحط الوصفة موضوع لكن كاين أخوات منهم الواثقة بالله و الأخت ابتسام طلبوا مني نحط البريوش موضوع

هذي الوصفة صراحة احسن وصفة جربتها طبعا بالنسبة ليا ، جاني الطعم كيما البريوش لي يتباع و احسن و الخفة مانحكيش و زيد المقادير مضبوطة و ماشي محتاجة تحريفات نتمنى جربوها

المقادير

300غ او شوي زيادة فرينة
150ملل حليب
30 غ زبدة ، ملعقة اكل
30 غ سكر، ملعقتين اكل
اذا ماستعملناش الكريم باتيسيار نزيدو ملعقة سكر

12 غ خميرة خبز ، 2 ملاعق قهوة
بيضة واحدة
ملعقة قهوة ملح
ملعقة قهوة فانيلا
كريم باتيسيار ، انا استعملت لي يتباع خفيف و بنين

نحطو الخميرة في الحليب الدافء مع السكر و نخليوها حتى تطلع
نزيدو باقي المقادير الا الزبدة و الفانيلا و نعجنو ، كي ترجع العجينة ملساء نزيدو الفانيلا و الزبدة و نعجنو
نغطيوها و نخليوها تخمر في مكان لا سخون لا بارد ، دافئ

بعد ما تخمر نشكلوها كالتالي
نطرحو العجينة فوق سطح مرشوش بالفرينةو نوزعو فوقها الكارام باتيسيار لازم تكون باردة ، ممكن اضافة حبيبات شوكولا او زبيب او فواكه جافة او مكسرات مفرومة
نروليو العجينة و نقصوها دوائر بسمك 3سم و نرصوها في بلا مفرش بورق الزبدة بلا مانضغطو عليهم
نخليوهم يخمرو مليح و نطيبوهم في فرن سااااااااخن مسبقا ، لي عندها مروحة تشغلها


كاين حطيتهم في مول المافن و جا الشكل هايل ، و طبعا ندهنوهم بالجو لي انا خففت معجون المشمش بالماء و دهنت بيه




















و هذي افكار اخرى

تارتولات البريوش
ندهنو مولات التارتولات بالزبدة و نطرحو فيها العجينة
نحطو في وسط العجينة فاكهة او مربى انا حطيت صوص الرمان
و نحطو فوقها كريم باتيسيار ، انا خلاصت لي درت علبة بتي سويس و خلطت معاها سكر و فانيليا
نخليوها تخمر و نطيبوها في فور سخووووون ، بهد ما طابو دهنت هم بمربى المشمش










مشيمشات البريوش

نشكلو العجينة على شكل حبات بحجم حبة القصطل بعد ما يخمرو نطيبوهم في فور سخون
، كي يبردو نديرو ثقب من تحت و نحشيوهم بالكريم باتيسيار و ندهنوهم بالمربى و نرمدوهم بالسكر و نلصقوهم بواسطة الكريم الباتسيير و نزينو هم كيما نحبو











نسيت البريوش دهنتو بالحليب +فانيلا

ان شاء الله يعجبوكم بريوشاتي صدقوني بنان بزاف بزاف
في امان الله