الإعتراف المرير .....

[مشكلتي]

السلام عليكم
أنا صاحبة مشكلة العروس المصدومة
https://www.djelfa.info/vb/showthread.php?t=1887151
راني في حالة و ما عرفت كيفاش ننصح أختي و خاصة بعد الحدث الأخير ....
طبعا بعد ما زوج أختي وعدها باش يبطل فعايلو و بدا يصلي زعمة في الجامع مي على حساب الشوفة كان يسكت فيها برك و كانت مجرد تمثيلية و البارح أختي اكتشفت أن ريمة عادت لعادتها القديمة و رجع يتواصل مع الفتاة فانهارت و خبراتو بلي علابالها بكلشي واش راهو صاير بيناتهم و ماراهيش راقدة على وذنيها و هو تشوكا و رجع غير يرجف و اعترفلها بالأعتراف المرير و قاللها انه كان على علاقة مع بنت خالتو و هي راحت خلاتو و تعرفت على شخص آخر و هو في هذيك الفترة شاف أختي و عجباتو و خطبها و تم الأمر بسرعة و عقدو عقد شرعي و مدني و أثناء فترة الخطوبة بنت خالتو رجعت ليه و رجعت العلاقة بيناتهم .....
و اختي قالتلو أنها رايحة تطلق منو و مارايحاش تبقى معاه .....و طبعا هو قعد يحلل فيها و يعتذر كي العادة ....
انا و الله عجزت ننصح أختي بنصيحة مناسبة مي في قلبي راني حابتها تتطلق منو مي ماشي ضركا حتى للعام الجاي باش الناس ما تخرجش فيها العيب و تزيد تكمل قرايتها على خاطر أختي راهي في عامها الجامعي الأخير .........
ادعيولها لأختي راهي في حالة انهيار تام و راهي شحال من مرة تطيح تدوخ في دارها وحدها ...و لي زاد الطين بلة عجوزتها لي دخلت البارح ليها و حطتلها سعدها في يدها و قالتلها كيفاش ما تجيش تزوريني بعد ما جيتي من داركم مباشرة على خاطر هوما يسكنو باب لباب و قعدت تعيط و تقوللها ماديتيش وليدي مزنقة وليدي عندو يماه و كلام آخر بزاااااف .....