كم انا غبي

[مشكلتي]

السلام عليكم شكرا ليكم على هذه الفرصة
أنا شاب عمري 25 سنة اصبت بمرضين الاول مرض مستعصي ومزمن لكنو الحمدلله مش خطير اطلاقا هو حب الشباب والثاني تعبني برك شوي هو الرمل الكلوي الحمدلله على كل حال
حب الشاب اصابني في عمري 18 اساسا عندي بشرة دهنية مزيتة حتى انو الي مقابلني يقدر يشوف وجهو فيا منحكيلكمش كيفاه بقع بكل الالوان وخرائط واثار وحبوب صغيرة عند الانف الى اخره هذا الامر قلقني طبعا لكنو كنت نتالم دخلاني يعني لانو معنديش جرأة نشكي ولا نبين بلي راني متاثر بيه لاني عايش في دوار ومجتمعنا رجولي نوعا ما فكنت في ذك السن نعتبر هذا من طبائع البنات انها تسقل في وجها فماجاتنيش فكرة اصلا نروح لعند طبيب فكنت نتخيل انو اذا رحت لطبيب يضحك عليا فلجأت إلى واش كنت نسمع من علاجات لاني كنت غبي نظن بلي حب الشباب عندو علاج وهو كيما تعرفو حب الشباب لا علاج له ، فبديت نخلط في وجهي نشري الليمون ونديرو على وجهي نشري صابون الكبريت ونغسل بيه نشري كريم من عند الصيدلي وكي نروح ليه نقلو راهم قالولي الدار جيبنا كريم تاع حب الشباب وكي نشريه نحلو الكرطونة ونخبيه على الدار المهم حتى وصلت لهذا السن طبعا هدا الشي عقدني خاصة قدام البنات ، فما نهدر معاهم الا ضرورة كي نهدر معاهم نزرب لاني منيش نحوس نزعجهم بوجهي .انا معقدنيش حب الشباب انما الزيوت الي في البشرة والمسامات والحفر والبع والاشكال والخرائط فما كنتش نتقدم لحتى لطفلة ابدا قطعا نهائيا اطلاقا كي تعجبني طفلة نتبعها بعيني طول الزمان حتى تتخطب ولا تتزوج . ، كملت هاك حتى قررت نروح لطبيب فرحت لطبيب فوصفلي ادوية على مدى ستة اشهر لكنه خدعني وسرق اموالي باطل لانو وصفلي ادوية تزيد في معاناتي فوصفلي دوتير dotur كذلك عطاني أدابلين وعطاني صابونة مرسيليا فطبقتهم كنت نغسل بهذاك الصابون الي زاد عليا أكثر واكثر وليت كي نمسح وجهي بفوطة يبان فيها الزيت كي قريت في الانترنت لقيت السبب في صابونة مرسيليا لانها تجفف البشرة ومبعد تولي البشرة نفسها تخرج الدهون اكثر واكثر من ذي قبل نفس الشي لأدابلين هو علاج موضعي لا اكثر ولا اقل ينح الحبة اليوم وغدوة تعاود تطلع اما دوتور فهو اقل شي سببلي الام الامعاء ومشاكل في المعدة بلا نتيجة لانو مقاوم للبكتيريا ليس الا لوكان عطاني صابون سائل احسن منو . المهم واصلت كملت ال6 اشهر وهو في الوقت الي كانت المشكلة تتفاقم اكثر واكثر كان هذا الطبييب الاحمق ينقصلي المقادير تاع الادوية يعني بطريقة غبية وكي قتلو نحب نتخلص من الدخنة تاع الوجه كتبلي بيافين وهي كريم ماعندوش اساسا علاقة مع حب الشباب اطلاقا لا من قريب ولا من بعيد هو موجه للاحمرار تاع الاشعة رفضت نطبقو على وجهي لاني منيش غبي لهذه الدرجة فبطلت المعالجة عندو ورحت لياسر اطباء نفس شي خسرت ياسر دراهم بلا فايدة وندمت على النهار الي بديت نعالج فيه على حب الشباب ....اليوم قررت نحبس المعالجة اطلاقا ومانزور حتى طبيب فنحتفظ بالدراهم لنفسي ومانحطهاش عند الدجالين الذين يسمونهم أطباء
وبعد بحثت في الانترنت على هذا المرض ومبعد ما ديت خبرة طويلة في هذا المجال عرفت بلي كنت مخدوع فدواء حب الشباب لا يوجد الا في رؤوس هولاء المخادعين فمن المستحيل يكون كاين دواء فحب الشباب هو مرض مزمن يبتلى به الواحد كل واحد شحال يبقالو من فترة وهو يعالج كيما يعالج مرض السكري فكل ما ينوض الحب يديرو ادوية موضعية تروح هديك الحية وتنوض اخرى في بلاصتها باستمرار اما اثارها فهي ازلية باقية ببقاء الانسان اما طبيعة البشرة الزيتية فهو امر وراثي لا يمكن ازالته
الموضوع جاني طويل ان شاء الله نكملهم في موضوع منفصل معاناتي مع الرمل الكلوي
شكرا على القراءة والانصات بارك الله فيكم