هل اخطات

[مشكلتي]

السلام عليكم

انا فتاة عينت مؤخرا في منصب بشهادتي الجامعية ماجيستير في البيولوجيا
عينت في احدى المؤسسات اين وجدت 4 عامبات في المخبر لديهن شهادة تقني سامي فقط يعملن فيي عقود قبل التشغيل
وفي ايامي الاولى عادي كنت اتصرف معهن بصفة عادية نتعامل في العمل وقت الافطار نفطرو سويا فقط مشكلتهن مايجوش للخدمة حتى 11 ويخرجن على الوحدة بحكم المخبر بعيد شوية على الادارة ووحدة فيهم تجي خطرة في الاسبوع وتحظر ابنها الصغير معاها يقلب قاع الحالة والمدير نيتو راهم يخدمو

تحدثت معهن شحال من خطرة يقولولي المرسم هو اللي يخد ويدخل في الوقت ويخرج في الوقت وحنايا لانام اللي تخلصنا نديرو شانحبو
وشوية شوية ولاو يرمو قاع الخدمة عليا وهما يجيبو ماكولات وحلويات ويجوزو ساعتهم في القصرة


رحت اشتكيت عليهم جاو مرمدوني وبهدلوني قالولي عندنا 4 سنين نديرو كيما نحبو والان جيتي ديرنا في مشاكل
زادت ساءت الحالة ولاو يخدمو وحدهم ويخبيو عليا العينات

والبارح اضطرينا لتغيير بعض التجهيزات في المخبر هما قعدو يقصرو وانا قاعدة نخدم ونرفد ونحط عييت حقيقة
اليوم تاني صباحا جوزت ميزيرية خدمة 4 عباد خدمتها وحدي وزيد اشتنشقت بعض المواد عن غير قصد قريب متت وانا نرفد ونحط تفتحلي ساشي
رحت زدت اشتكيت للمدير وانا تبكي صراحة

جا هدر معاهم قالولو احنا نخدمو كيما نحبو لانام تخلصنا حاسبها هي مرسمة نتا تخلصها ورفضو يعاونوني في الخدمة نطقت وحدة قاتلو احنا هاد الخدمة خدمناها ننذ 4 سنين والان دالتها تخدم

المدير اضطر يلغي عقود 2 اللي كانو اكثر قبح معو وزوج الباقيين قالهم نحطكم تحت الرقابة

والان وكان ضميري انبني قلت بالاك كنت سبب كيتحاوزو
هل اخطات مع اني والله تسترت عليهم وعلى غياباتهم الاف المرات ورفدت الخدمة قاع انا وهما مايجوش

[sarl02]

لم تخطئي في شيء وفق ما رويتي ..انت حافظت على شعرة معاوية لكن هم اعتبرو هذا ضعف واستحقروك...انت تواضعتي وهم استكبرو بالرغم من منصبك وشهادتك ...الان زوج بنات لخرين يحكمو الصف ...لكن بالمقابل لا تضغطي عليهم وحاولي تكسبيهم بالحسنى باش الامور تمشي ...وفقك الله.

[mino 19]

لا لم تخطئي
اصلا مالهم كان حرام
عملتى صواب وهكا مدير مرة جاية يدير فى بال فى كاش promotion

[imane@alger]

يا اختي وش نقولك انت درت الصح معهم كيفاه لحاب يخدم يخدم ولمحبش يروح راهم مش ملزمين عليهم بش يدو مليون في العقود وهكذا تكوني وضعت النقاط على الحروف مي حاولي تكسبي لباقو منهم وكان محبوش يخدم يدبرو رسانهم ثاني رهي كاين الاف شباب يستنو في منصب ديالهم و ليحترمكش متحترميهش مهما يكون والصح في اتقن العمل مهما كان الاجر

[selma f]

اسمحيلي اخت بصح الارزاق بيد الله
كون جيت في بلاصتك الليل ما نقدر نرقدو

ياكلولي حقي ولا نا كل حق الناس
يغلطو فيا ولا نغلط فيهم

كون من الاول درتي النية وخدمتي خدمتك وما عسيتي عليهم وزيد راكي في موضوعك قلتي عندي ماجستير وهومة يعني انتي على حساب حكايتك شايفة روحك عليهم ,,,,,,,,, ونقولك

ا

اولا ربي لي يحاسب العبد وثانيا كاين الضمير انتاع كا وحدة وثالثا كاين المسؤؤول لي اعلى منهم يهدر معاهم

المثل يقول ماتقرب للنخالة مايدقك الجاج كون

[optimism]

السلام عليكم
تصرفات صاحبات عقود ماقبل التشغيل ,,,,,,,رد فعل طبيعي ,,,,,,,لانهن يعتقدن انك اخذت محلهن ,,,,,باعتقادهن سيتم ادماجهن وسيرسمن ,,,,,,,,بهذا المعتقد علينا ان نعذرونتحمل تصرفاتهن ومهما كانت ,,,,,,ولكن لن يفهمن هذا ,,,,,وانما يعتبرهن ضعف ,,,,,,,,وبحكم انت صاحبة منصب ,,,,فانت اقوى واقدرمنهن ,,,,,,,والغلبة لك ,,,,,,,من اجل ذلك ,,,,,,,,كان عليك ان تجد حل ,,,,,دون تسبب في طردهن,,,,,,,,,,مثل ,,,,,,,,ان تصبري ولاتعملي معهن مشاكل ولاتشتكي ,,,,,,,وانما تذهب للمدير ,,,,,,,وتطلب منه ,,,,ان ينتقلن الى محل اخر في مؤسستكم ( هذا ان توفر ) ,,,,وتشرحي له الوضع
وهذا لايعني اني اقول انك مخطئة ,,,,,,,لان كل شخص و ظروفه وقدرة تحمله
ربي يرزقك راحة البال

[الفاتحة]

يا ختي تسببتي في قطع أرزاق اثنين من خلق ربي، عمل غير دائم ، فتات وزيد طار .....المهم ربي يعوض عليهم بعمل دائم ويلتزمو بأوقات العمل، نصيحتي ليك حاولي مرة اخرى تحلي المشاكل بهدوء وبأقل الأضرار لك ولغيرك، صلي وادعي ربي يغفرلك إذا كنت كبرت الحكاية أكثر مما تستحق والله الموفق.

[aymen01]

شفتي هدو لي راهم معارضينك و ردو عليك كامل عقود ما قبل التشغيل

يحبو الراحه و الاستجمام على هذيك البلاد ضاعت ياكلو في الحرام نورمال و تجي تقلك علاه قطعتي رزقها

رزقها تديه بالخدمه و التعب مشي يوم كال راقده و الشهريه تجي في اخر الشهر

كفماه تشوف في المنكر و الفساد و ماتشكيش بيهم ؟ عندها الحق

كون جاو الناس كامل كيما انت رانا لاباس بينا

[خالد عنابي2]

المشاركة الأصلية كتبت بواسطة selma f

اسمحيلي اخت بصح الارزاق بيد الله
كون جيت في بلاصتك الليل ما نقدر نرقدو

ياكلولي حقي ولا نا كل حق الناس
يغلطو فيا ولا نغلط فيهم

كون من الاول درتي النية وخدمتي خدمتك وما عسيتي عليهم وزيد راكي في موضوعك قلتي عندي ماجستير وهومة يعني انتي على حساب حكايتك شايفة روحك عليهم ,,,,,,,,, ونقولك

ا

اولا ربي لي يحاسب العبد وثانيا كاين الضمير انتاع كا وحدة وثالثا كاين المسؤؤول لي اعلى منهم يهدر معاهم

المثل يقول ماتقرب للنخالة مايدقك الجاج كون

منطق تافه جدا

ماهيش تعس عليهم راهم يخدمو مع بعض

واذا وصلت بهن الوقاحة ان يقلن للمدير صراحة نخدمو كيما نحبو اذن هنا يجب طردهن الاربعة

الاخت اخطات في شيئ واحد وهي انها تساهلت معهن في البداية

وليس فقط ربي لي يحاسب العبد لو كان جات المؤسسة تاعك هل كنتي تقولين هذا الكلام ام تقفين على رؤوس العمال ؟

امثالك وامثالهن عالة على المجتمع والاقتصاد

[خالد عنابي2]

المشاركة الأصلية كتبت بواسطة aymen01

شفتي هدو لي راهم معارضينك و ردو عليك كامل عقود ما قبل التشغيل

يحبو الراحه و الاستجمام على هذيك البلاد ضاعت ياكلو في الحرام نورمال و تجي تقلك علاه قطعتي رزقها

رزقها تديه بالخدمه و التعب مشي يوم كال راقده و الشهريه تجي في اخر الشهر

كفماه تشوف في المنكر و الفساد و ماتشكيش بيهم ؟ عندها الحق

كون جاو الناس كامل كيما انت رانا لاباس بينا

نعم اخي كيعاد ماهمش حابين الخدمة وعلاه يجبو السلاك ؟
هذا كثير جدا ياتين على 11 صباحا ويخرجن على الواحدة واحداهن صارت تاتي مرة واحدة في الاسبوع وتجيب معاها ولدها الصغير الى مختبر هههههه
ماهذا ؟ والاجرة على اساس العمل يوميا مهما كانت تلك الاجرة
صحيح لا يجب توقع عمل كبير من شخص ياخذ اقل اجر ولكن عليه ان يقوم بالحد الادنى من واجباته

[* الحلم سكر *]

الساكت عن الحق شيطان اخرص و انتي ما سكيتيش على الحق و ماراكيش غلطة بالعكس اللي داتهم العاطفة و قالو لي راكي قطعتي ارزاقهم اولا الرزق بيد ربي سبحانه و ثانيا هذا درس ليهم يتعلمو واش معناتها ياكلو لحرام و حالياتلهم و حتى صح يخلصو اقل يخدمو اقل حتى على وجه ربي ما قدرش قاعدة و نشوف واحدة متمرمدة في الخدمة وحدها على بيها بلادنا رايحة للهاوية نشوفو الغلطة و نغطو عليها بالحنانة حنانة الكذب هادي يا يخدمو يا يروحو يخليوها للناس لي تحب تاكل بعرق جبينها حتى و لو السلاك قليل نحلل الدوروما درتي غير واجبك و الله يعاونك

[نسيم حميد]

لا لم تخطإي

[sarl02]

المشاركة الأصلية كتبت بواسطة selma f

اسمحيلي اخت بصح الارزاق بيد الله
كون جيت في بلاصتك الليل ما نقدر نرقدو

ياكلولي حقي ولا نا كل حق الناس
يغلطو فيا ولا نغلط فيهم

كون من الاول درتي النية وخدمتي خدمتك وما عسيتي عليهم وزيد راكي في موضوعك قلتي عندي ماجستير وهومة يعني انتي على حساب حكايتك شايفة روحك عليهم ,,,,,,,,, ونقولك

ا

اولا ربي لي يحاسب العبد وثانيا كاين الضمير انتاع كا وحدة وثالثا كاين المسؤؤول لي اعلى منهم يهدر معاهم

المثل يقول ماتقرب للنخالة مايدقك الجاج كون

ما لونته لك هو مركب نقص راسخ لدى العديد من اصحاب فئة عقود ما قبل التشغيل ومنهم انت ....يعني حتى ولو تواضعت لهم صاحبة الماجستير والمنصب القار ما يعجبهمش الحال ...واحدثك عن تجربة ...كلنا نعمل في مؤسست وادارات تجد 40 وحدة ادماج لكن اثنين او ثلاثة فقط الي فيهم خوف ربي ويخدمو وتقدر تتكل عليهم ....والباقي كلهم يفكرون مثل تفكيرك....الانسان ازين النية باش ربي يفتح عليه ...واليوم راكي بعقد عمل مؤقت غدا تكون في منصب عمل دائم.....ووفق الله الجميع.

[إكليل]

السلام عليك يا أختي

أعتقد و الله أعلم أنك لم تخطأي لأنهن مطالبات بالعمل و لكنهن لم يقمن بالواجب يأكلن من مال الشعب و في نفس الوقت لا عمل و لا هم يحزنون للأسف الشفقة على هذا النوع طاغية و عدم تنبيههم و طردهم في حال عدم إمتثالهم للأوامر هذا ما تركنا في الحضيض

[نارينا]

خذيها مني نصيحة " امشي عدل يحتار عدوك فيك"

الا القانون من هنا وصاعدا طبقيه وتعلمي نصوصه لكي لايكون لك نقطة ضعف

يستعملها الغير ضدك.....أنت في موقف قوة ووفق روايتك لاداعي لتانيب الضمير

فالتساهل هو من جعل المفتشين مثلا يرسمون أي أستاذ أو أستاذة فور رؤية دموعه بغض

النظر عن مستواهم الاكاديمي وكفائتهم البيداغوجية ..حتى صار الجميع لايعمل ويبكي

من لايريد العمل والكسب الحلال عليه بالبقاء في البيت ....ان سالوكِ عن تخلف الجزائر

فمثالك انت عينة للدراسة ..ناس لاتعمل وتقبض ...ونحن في المجال ونعلم ان الكثير من اصحاب عقود لانام يودون لو

يبقون في بيوتهم والراتب يمشي وهكذا ...بالنسبة لضميرك خليه مرتاح فالحق والعدل يحتاجان لصرامة لا الى شفقة في غير محلها

بالتوفيق