الطل القائد عشور زيان معركة خلفون

[ali herzallah]

[size="5"]يَا ذَكْرَتْ زَيَّانْ عَنَّكْ قُلتْ أَقْـــــــــــوَالْ.......قَولِي صَادَقْ هَاكْ كَاتَبْ مَقَالُـــــــــــو
قَايَدْنَا مَعْرُوفْ مَنْ خِيرَةْ لَبْطَــــــــــالْ.......وَ اشْهُودُو بَالْخَيرْ هَاكَذْ تَلْقَالُـــــــــــــو
الْبَيَّـضْ مَعْلُومْ مَنْبَعْ للرِجَــــــــــــــــــال ........جَلاَّلَه رَبَّاتْ شِيخِي وَ امْثَالُـــــــــــو
بْنَ الْعَابَدْ وَاقْطَـابْ مَنْ بَنِي جَــــــــلاَّلْ........ بَالْعَلمْ وْ جِـيـهَــادْ عَنَّا يَتْهَالُــــــــــو
دارْ الشِيخْ امْقَرْيَة شِيخِي بَاكْمَــــــــــالْ.........وَ اتْزَوَّدْ بَالنُّورْ بَانَتْ بَفْعَالُــــــــــــو
هَاذْ الذَكْرَى غَالْيَة عَنَّا وَشْ حَـــــــــالْ........ مَنْهَا عَـطـرْ إِفُوحْ سَاعَةْ تِيجَالُــــــو
أكْتَبْ يَا تَارِيخْ سَجَّلْ للْأَجْيَـــــــــــــالْ ........وَ اكْتَبْ عَنْ زَيَّانْ وَامْعَاهْ ابْطَالُـــــو
سَجَّلْ بَالزَغْرَاتْ وَاحْرُوفْ الرَافَـــــالْ .........وَ ابْدَمْ الشَهِيدْ وَاشْعَابْ انْسَالُـــــــو
هَاذِي ثَورَة عَارْمَة حَطَّتْ لَرْحَـــــــالْ ........مَا نَفْعَتْ قُوَّاتْ لَطْلَسْ وَاهْوَالُــــــــو
الْبِي فَانَتْ سِيسْ وَأعْسَاكَرْ وَاهْــــوَالْ .........وْ دَبَّابَاتْ ادْرُوعْ مَا دَارَتْ وَالُــــو
ذَالْإِرَادَة صَادْقَة وَاعْطَاتْ امْثَـــــــــالْ ........وَ الْمَشْعَلْ هَزُّوهْ نَاسُو وَ ارْجَالُـــــو
مَاذَا مَنْ عُدَّاتْ مَنْ جَيشْ الْأَنْــــــــذَالْ ........مَهْـزُومَة وَ احْـطَامْ تَشْهَدْ مَزَّالُـــــــو
وَاجْيُوشْ الْعَدْيَانْ عَنْهُمْ ضَاقْ الْحَــالْ.........مَنْ ضَربْ الأبْطَالْ بَاعْقُولْ انْجَالُـو
وْ طَيَارَاتْ اتْخَالْفَتْ عَنْهَا لَحْــــــــوَالْ.........وَ الدُخَّانْ ابْنَارْ دَايَرْ مَشْعَالُـــــــــــو
وَيْحَكْ يَامَسْكِينْ أَجْلَكْ جَا فَلْحَــــــــالْ.........يَاطَـيَّارْ اعْلاَهْ سَبْعِي تَصْفَالُــــــــــو
بَانْيَابُو جَرَّاحْ وَ الْمَخْلَبْ قَتَّـــــــــــــالْ........وَ اللِّي يَصْـفَا لَيهْ هَاكَذْ يَجْرَالُــــــــــو
مَثلْ أُعْقَابْ اللِّي امْوَكَّرْ شَافْ أُخْتَــالْ.........فَرْفَرْ بَالْجَنْحَينْ وَ اصَّبْ أُقْبَالُـــــــو
عـَينُو صَفْرَة مَاضْيَة مَنْ فُوقْ اتْـــلاَلْ.........وْ يَاوَيحْ الْمَقْصُودْ بَظْـفَارُو نَالُـــــو
يَا مَنْ تَجْهَلْ طَيرْنَا أَرْوَاحْ وْ سَـــــالْ.........و انْشَدْ فَالْخَرُّوبْ ثَمَّة وَاعْنَالُــــــــو
تَلْقَى اطْيُورْ امْشَبْرَة مَا هُمْ كُسَّـــــــالْ........تَرْبِيَةْ زَيَّانْ عِزَّة وَادْلاَلُــــــــــــــــــــو
سَلَّمْ عَنْهُمْ قَاعْ كُلْ وَاحَدْ بَسْــــــــوَالْ........وَ الْإِدَارَة ثَمْ يَا مَنْ تُقْدَالُـــــــــــــــــــو
تَلْقَى سِي زَيَّانْ وَ الْكَرْمَة وَاظْــــــلاَلْ..........وَ امْيَاهْ الْخَرُّوبْ تَصْفَى تَحْلاَلُــــــو
شَنُوفي وَامْعَاهْ صَاقَة مَنْ لَبْطَــــــــالْ.......... ذُو رِفَاقْ الشِيخْ أَهْلُو وَ اعْيَالُــــــو
اسْبُوعَة وَانْمُورْ مَاهُمْشِي عُطــــــَّالْ..........رَهْبَة لَلْعَدْيَانْ عَنْهُمْ مَاقَالُـــــــــــــــو
سَقْسِي جَبلْ اكْحَيلْ عَنْهُمْ وَ الْعُقَّــــالْ........ عِمُورَة وَ افْجُوجْ ذَا الْبَرْ اتْوَالُـــــــــو
الْمَيمُونَة وَ قْسُومْ وَالصَحْرَاء وَرْمَـالْ..........وَ احْمَايَدْ وَ احْرَاشْ يُصْعُبْ تَكْيَالُـو
اقْرُونْ الْكَبشْ وْزيدْ كَمَّلْ يَاجَـــــــوَّالْ..........للشَقَّة وَ اجْبَالْ لَطْلسْ مَزَّالُـــــــــــــو
كَمَّلْ لَعْرَيعِيرْ جَبْلُو زَادْ اطْـــــــــــوَالْ.........لَجْقَيدَلْ وَ ادْيُورْ تَشْهَدْ تَلْقَالُــــــــــــو
الْمَنْعُومَة وَاطْرِيقْ للظَّهْرَة تَسْهَـــــــالْ..........في لَطْرَشْ وَ وْعَارْ شَبَّكْ بَجْبَالُـــــو
سَقْسِي عَنْ زَيَّانْ وَشْ كَانُو لَبْطَــــالْ..........وْ يَاحَصْرَاهْ عْلَى ارْجَالِي وَ ارْجَالُـو
وْ عَينْ الرِيشْ انْهَارْهَا مَاهُو بَطَّـــالْ..........في لَطْرَشْ وَ وْعَارْ شَبَّكْ بَجْبَالُـــــو
وَ قْعَيقَعْ يَومَينْ بَاصْوَاتْ الرَّافَــــــالْ..........وْ يَاحَصْرَاهْ عْلَى ارْجَالِي وَ ارْجَالُـو
شِيخِي يَا زَيَّانْ يَا زَينْ الْخِيصَـــــالْ.........يَانَحَّاحْ الظَّيمْ لَلْقَلبْ اعْلاَلُـــــــــــــــو
يَا ذَوَّابْ احْدِيدْ وَاسْلاَسَلْ وَغْــــلاَلْ..........نُورَكْ شَعْ عْلَى الْأُمَة بَهْلاَلُـــــــــــو
والله مَا نَدْرِيهْ يَمْسَى ذَا الْهِــــــــــلاَلْ..........في خَلْفُونْ اللِّي اتْرَابُو يَهْوَالُــــــــــو
كِي رَادْ الله جَاتْ مَكْتُوبَة فَالْحَــــــالْ.........وَ الْخُطَّة شَيطَانْ عُدَّة وَ ثْقَالُــــــــــــو
أدَى حَقُو وْرَاحْ مَنْ جَيشْ الظَــــلاَلْ..........مَهْمَى كَانْ الْحَالْ مَاهُمشْ عْدَالُـــــــو
مَيَتْنَا شَهِيدْ لَلْجَنَّة عَـــــــــــــــــــــوَّالْ.... .....وْ مَيَتْهُمْ فَالنَّارْ مَشْدُودْ ارْحَالُــــــــــو
لي قَالْ الْأَبْيَاتْ قَلْبُو زَادْ هْبَـــــــــــلْ.........وَ اتْفَكَّرْ رِجَالْ صَدْقُو وَشْ قَالُـــــــــو
عبدالواحد نَاظمْ الشَعرْ وْ لَقْــــــــوَالْ..........بْنَ الشَاعَرْ قَسُّومْ يَخْتَمْ مَقَالُــــــــــــو
حرزالله مَعْـرُوفْ مَنْ بَكْرِي جَــوَّالْ...........وَ امْسَمِي ذَا الْبَرْ نَهْوى تَجْوَالُــــــــو

الشاعر: علي عبدالواحد حرزالله[/size]