مشكلتي زوجة اخي

[مشكلتي]

مشكلتي زوجة اخي

انا فتاة في العشرينات، من فضلكم انصحوني واش ندير مع زوجة اخي، عندها عقلية تاع ذراري صغار وتحب المشاكل علما ان اخي يعمل في ولاية بعيدة، وظروف عمل لاتسمح بالسكن هناك ، وهي ساكنة معنا لاكن في جناح مستقل، ومع ذلك ما يخصها والو من جيهتنا : ابي يصرف عليها كيما يصرف علينا الرزق اللي يدخل للدار نبعتولها منو، واخوتي الاولاد ما يرفدوش عينهم قدامها والبنات كامل متزوجين كي يجو من صحا صحا ما يحوسوش يفهمو وماما ما تحبش تتدخل فيها تقولي بينها بين راجلها وعمرها ما عتبت غرفتها او مطبخها .... ومع ذلك تفتري علينا بالباطل، وتتهمنا انا و امي بتهم باطلة ، والله تحط نفسها في مواقف بايخة و تسب امي بكلام بذيء متاع شارع على جال امور تافهة وتخرج من البيت بدون اذنها في غياب اخي، تروح لعند الجيران، وحنا صابرين عليها على جال خويا.
واحدة كبيرة و متزوجة مع واحد متربي وخدام لاباس عليه واهلو يحترموها ويحترمو خصوصياتها ويقدمولها هدايا ثمينة فالمناسبات واش تحب اكثر !! حابة تبع راجلها تقول حابة نتبعو، ماشي تستفز حماتها باش تعايبها وتمسح فينا الموس حنا اللي ما نسواوش، لدرجة ولات توصي ولادها ما يحكوش مع امي بصح الملايكات يشوفوها يروحو باش يلعبو معاها تروح يماهم تجبدهم من قدامنا ودخلهم عندها للبيت، ونهار يجي خويا تلعبها ملاك اااااااخ ، والله مرات نقول نجبدها من الشعر ونمسح بيها لرض كيما سبت يما بصح نتفكر خويا وتعبو في خدمتو نولي نسكت، انصحوني رجاااااءا لاني في وجه المدفع وانا هي همزة الوصل الوحيدة بين زوجة اخي وابنائه و بين اسرتي خاصة امي، تجي تسبك وطيحلك قدرك وتقولك انت الظالم بالسيف عليك. لا انكر ايجابياتها ولاكن النفاق وعقلية مصالح تنسيك في كل شيئ

[aymen01]

راهي الدير في المشكال باه تخرج من الدار

مصايب هدو النسا ما يحمدرو ربي ما يخلو الناس تعيش حياة ساكنه و هادئة يسودها الحب و الاحترام

[aminazy]

الله يصبركم

[حبيبة زوجها]

ربي يكون معاكم

[زبدة ذايبة]

السكات انتاعكم هو اللي خلاها تدير هكذا

كيفاش تخرج من الدار ويماك ساكتة ؟؟؟؟؟؟؟؟؟؟؟؟؟

دايرة روحها ماعلابالهاش أو مايهمهاش

والطفلة تنغز فيكم بالحركات انتاوعها وانتوما ما تتحركوش.

والله لوكان عرفتكم حروشة معاها ماكانتش تدير هكذا.

هذي سلبيتكم هي اللي دارتلكم المشاكل.

خليتوها تنقزلكم من الصور وتعفس على حدود بيتكم.

درتولها جناح خاص وخليتوها على رايها كي شغل ماشي ساكنة عندكم

خوك خلاها أمانة عندكم باش تحافظو عليها ماشي باش تخافو منها وتخلوها دير رايها في غيابو

لوكان كاشما يصرا لاقدر الله انتوما تتحملو المسؤولية

وين راهي غيرتكم على عرضو

[SAHHI]

ربي يكون في العون...مشاكل دائمة ...الصبر و حسن التصرف خير لك
ربي يهدي ما خلق

[ابتسام smile &hope]

تسب يماك وتسكتي حيرتيني
واش نقولك حبسو الكادوات وحكي لخوك على التبهديل للي راهي دايراتو
ونقصي شوية جياحة تشوفي يماك واش يصرا فيها وماتحكيش لخوك
يااختي نعرف وحدة كيما عروستكم كي سكتو عليها حاولت تغوي شيخها الله يحفظنا

[chouchou w]

المشاركة الأصلية كتبت بواسطة ابتسام smile &hope

تسب يماك وتسكتي حيرتيني
واش نقولك حبسو الكادوات وحكي لخوك على التبهديل للي راهي دايراتو
ونقصي شوية جياحة تشوفي يماك واش يصرا فيها وماتحكيش لخوك
يااختي نعرف وحدة كيما عروستكم كي سكتو عليها حاولت تغوي شيخها الله يحفظنا

العياذ بالله هذي ملحتلها الموت وش دارولها كيدارت هكذا مع شيخها اما صاحبة الموضوع هذا اخر دلال لعرايس سلام

[ابتسام smile &hope]

المشاركة الأصلية كتبت بواسطة chouchou w

العياذ بالله هذي ملحتلها الموت وش دارولها كيدارت هكذا مع شيخها اما صاحبة الموضوع هذا اخر دلال لعرايس سلام

شوفي ياختي هاذ الشيطانة راجلها يخدم بعيد ويجي غير فالويكاند مالا راهي دايرة فيهم العجب وهوما ساكتين عليها وكي دارت بشيخها شنفو عليها هذا مكان وموراها بيامات ولاو يهدرو معاها كي شغل مادارت والو وزيد يماها وااعرة يخافو منها
صابتهم جايحين كيما صاحبة المشكل تقول تسب يما بصح ماننكرش عندها ايجابيات

[mrmilano1984]

اختي تلايدين الصراخة انتي تقولي عقليتها هكا والله مش مليح واحد يدير فتنة ربي يصبركم اثبرو وخلاص خصوصا من اجل اخيكم ردو بالكم كاش مادرو سينون هو الخاسر وهي ايضا طلاق بعدها تشرد الاطفال نسالك عندو خوك اولاد منها او مازال جاوبني روحو بالتي هي احسن وصح مش مليح تروحو لعندها لمطبخها ووو بيتها وووو خلوها في حدها الا للضرورة كلموها تجنبا للمشاكل

[mrmilano1984]

الله يهدينا علابيها مليح واحديسكن وحدو في مجتمعنا كي يتزوج مستحيل في عقليتنا العيش كف كف لانو كل واحد وعقليته صراحة شوفو لقور كل واحد عايش وحدو وهانيين من راسهم هنا العرب مشاكل

[KARIO]

بالنسبة لي متدخلوش في خصوصياتها هاذا حقها و ماراكمش دايرين مزية, مشكلتها الوحيدة انها ساكنة معاكم، و حتى لو عندها جناح مستقل تحس روحها مراقبة دائما و ماهيش مستقلة، و تاني ديري روحك في بلاصتها راجلها دائما غائب هذا مشي زواج، لوكان يكريلها زوجها في الولاية اللي راه خدام فيها، تكمل كل مشاكلكم و تولو سمنة عالعسل، و بالنسبة ليك متزيديش تسمحيلها تسب امك، و اجتنبو الاحتكاك معاها
و بالنسبة لاخوات اللي راهم يزيدو فالنار نقولهم اتقوا الله في انفسكم

[لحن الحياة.]

المشاركة الأصلية كتبت بواسطة kario

بالنسبة لي متدخلوش في خصوصياتها هاذا حقها و ماراكمش دايرين مزية, مشكلتها الوحيدة انها ساكنة معاكم، و حتى لو عندها جناح مستقل تحس روحها مراقبة دائما و ماهيش مستقلة، و تاني ديري روحك في بلاصتها راجلها دائما غائب هذا مشي زواج، لوكان يكريلها زوجها في الولاية اللي راه خدام فيها، تكمل كل مشاكلكم و تولو سمنة عالعسل، و بالنسبة ليك متزيديش تسمحيلها تسب امك، و اجتنبو الاحتكاك معاها
و بالنسبة لاخوات اللي راهم يزيدو فالنار نقولهم اتقوا الله في انفسكم

اسمحيلي اختي راكي غالطة
راهم دايرين فيها مزية كبيرة .....هي علاه قبلتهم كي خطبوها دايوغ السكنة تعهم قبل ما تجي هي و عندهم الحق في خوهم قبل منها . وكيما هاك راهم قادرين والديه يعمروها بدعاوي الشر .........بلا ما يدعو ..و تروح يدبرلها راجلها سكنة
احنا العروسة كي تروح تتزوج يقولولها طيعي الوالدين والشاهدين والشاهدين هم اوالدين راجلها....يا اختي ماناش نتزوجو باش ندو راجل و نضربو دارهم بركلة ..لالا ...الزواج راه حاجة كبييييييييييييرة

[بحيرة اللؤلؤ]

لاأستطيع أن أقول أكثر من هذه الجملة

أخيتي الغالية نصيحتي لك أن تتحلى بالمزيد من الصبر كما تعلمين أن بعد الصبر النصر



و أرجوا أن نصيحتي أفادتك

[ايناس ايناس]

السلام عليكم الله يكون في عونكم ياالاخت وربي يصبركم انا عندي فكرة على هاذ الموضوع لانو صراحة كنت نعاني منو وكنت تقريبا في نفس الموقف مع اختلاف بعض التفاصيل المهم انك انت تحاولي تصبري امك ماشي تزيدي عليها وحاولي تتفاداي زوجة اخو قدر المستطاع وان شاء الله ربي يهدي كناين هاذ الوقت ليس جميعا لانو كاين بنات ماشاء الله ادب واخلاق