تارتولات بالفريز من مطبخي Tartelettes aux fraises

[walido2011]

السلام عليكم اليوم درت تارتولات بالفريز بما أنو وقت الفريزة نشالله يعجبوكم و تجربوهم .



بالنسبة لمقادير العجينة:
أنا كنت درت المقادير و الوصفة في تارت التفاح تجدونها هنا https://www.djelfa.info/vb/showthread.php?t=1777352

الكريم باتيسيير:
2 حبات بيض
100غ سكر
مغرفة قهوة فاني
نصف لتر حليب
3 ملاعق مايزينة

و الفريزة للتزيين من فوق أنا كانت عندي يابسة شويا درتلها شويا سكر و غطيتها ببابيي فيلم و حطيتها فوق حمام مائي حتى ذاب السكر وطرات شويا.

نحضر العجين ونخليها ترتاح نصف ساعة.

طريقة تحضير الكريم :
نحط نصف لتر حليب يغلي، نضرب البيض و السكر و الفاني حتى يبايض شويا الخليط، نضيف المايزينة و نضربها شويا قيس ما تدخل فالخليط،
بعد ما يغلي الحليب نضيفلو خليط البيض و نخلط حتى تعقد، ونخليها تبرد.

نبدا في ملأ التارتولات بعد ما ثقبتهم و طيبتهم في فرن مسخن 180° مدة ما بين 15 إلى 20 دقيقة حتى يحمارو ونخليهم يبردو.



نملأ التارتولات بالكريم و نحط الفريزة من فوق و ندهنها بالجولي و نديرلها البيستاش إختياري و نخليهم يبردو لأنو العجينة تكون طرية.





نشالله يعجبوكم و تجربوهم.