من دخل المنتدى فهو صــائــم و من دخل هذا الموضوع فهو فــاطــر

[zawch]

و اسمحولي يا خاواتي بلاك الصيام راه يخرفلي درت هذا الموضوع
و اسمحولي نهدر
المهم .. انا راني لاحظت ظاهرة
... نتاع الرد السريع
رد نتاع ليه ليه
رد نتاع الطلقيني يا ذي الحية نطلقك
ناس ترد باش تزيدلها في النقاط و في المشاركات ... اصلا تلقاه ما قراش الموضوع
تلقاه يمشي لاخر مشاركة و يدير ردو و موافق و اقلب
نعطيكم مثال واحد يكتب : مشكوووووووووور و الاخر : يا سلاااااااااااااااااااااام ...
واش اخاوتي خلاصت عليكم الهدرة او كاش واحد طاير عقابكم ( يجري موراكم)
ياخي راك مريح في كرسي و الكلافي قدامك و ما تخسر والو كي تكتب فقرة
او حتى جملتين .. يا خويا بين روحك في الساحة
او على الاقل صلي على النبي عليه افضل الصلاة و السلام
انا راني خايف من سنة 2050 كيفاش نولو .. اربي استرنا
انا حبيت الناس تمد رايها . حبيت ناس تكون اكثر صدق بين بعضها . انا حبيت الوقت يرجع كيما بكري
غير قالونا رانا في عصر السرعة خلاص رحنا معاها طووووووول
رانا ولينا من قوم الكوبي كولي

اهداني نفرغ غشي و راني عارفوا راه غير الصيام يديرلي هاك

شفت تاني ظاهرة ( أنا خوك عاوني برد ) كي واحد يخدم موضوع من الاخير يكتب :
اكتب رد حتى يكتمل التحميل
او الردووود يا جماعة

علاش يا خويا راه ولات الطلبة ( المساسية - التسول ) في الردود
خصك غير تكتب لله يا محسنين كاش رد لوجه الله

العنوا ابليس .. الواحد كي يخدم موضوع لازم تكون نيتو صافية
يخدموا لله في سبيل الله
يخدمو من اجل ان يفيد الاخرين
يخدمو و ما يستناش الردود نتاع الشكر

و هذه و هذا هو يا خاوتي
على بالي نفختلكم ريسانكم مع العشية
و اسمحولي .... راني مرمضن
و صحة الشريبة و صيام مقبول ان شاء الله