فهمووووني من فضلكم

[مشكلتي]

السلام عليكم

انا فتاة 20 سنة متزوجة وعندي طفلة
خطبني زوجي بلا ما يشوفني
يعني وراوني
مي جا شافني دار معايا نظرة وعجبتو على حساب قولو
انا درت استخارة وسقسيت عليه سمعت غير لخير وقبلت

كان فمرحلة الخطوبة يعاملني بطريقة رائعة بين لي بلي راه ميت عليا ويحبني
وكنت صغيرة وجامي جربت معنى الحب ما كنتش نعرف
كان ديما يطلب مني نقولو نحبك وخايف ويلا ما نحبوش


المهم كان ديما يعاملني مليح ووقف معايا في ظروفي القاسية فالخطوبة وتحدى ماليه على جالي باسك رفضوني على جال الظروف لي مريت بيهم

تزوجني ودار لي دار شابة صغيرة في بيت العايلة تاعو ووفر كل حاجة من اثاث وادوات تاع المنزل كلش كلش من الغالي
وزيد عاني فالجهاز بلا المهر لي مدهولي
مالغري هو ماشي غني قدو قد روحو

هاد الشي خلاني نتعلق بيه بزاف وحبيتو من كل قلبي واول حب ليا صراحة لاني ولا مرة هدرت مع شاب

كنا عايشين بيان وديما كنت فرحانة باسكو ربي عطاني وش كنت متمنية
الوغ بينتلو حبي ليه وبلي انا تاني نموت عليه

انا فيا سلبية اني نحب نسقسي بزاف

سقسيتو مرة في اول خطوبتنا وقتلو اسكو خطبت وحدة قبلي او حبيت قالي لالا
فرحت

صرالي مشاكل ماشي معاه مع ماليه كانو حاقريني باسك ماحبونيش وانا كنت نسكت
حتى مين مرة تماداو وتمسكنو على زجي ورجعوني انا مش مليحة

انا غاضني الحال وكرهتهم حكيت لزوجي كلشي
زوجي بقا حاير مي فالاخير قالي كون حكيتيلي من قبل
وقالي عودي اهدري غير يما وبابا بالاكي
مي انا تربيتي ما تسمحليش
المهم
من القلق وليت كل يوم نغلي عند راسو واش يديرو فيا سلافاتي ولواساتي

حتى مين حسيتو كره مني
مي ديما نقول خلاص و نزيد نهدر

سيرتو كي جي عندي سلفتي وانا صغيرة تقولي سمعت بلي قلتي راجلك اشريلي هادي اي حاجة وانا صح كنت حكيتلهم عليها نقلها ايه تقولي راهو شراهالي راجلي بدراهم راجلك وانتي لي دراهم راجلك وما شرالكش باسكو زوجي يصرف على كامل العائلة من ا الى ي
وهادي سلفتي كبييييرة عليا ب8 سنين تحط راسها براسي
وانا كنت ندير عليها
فالاخير عرفتها غيورة وتحب تخربلي داري باسكو جات مورايا متزوجتش بكري

وانا درت عليها ووليت نحكيلو كلش ونقولو ما تشريلهمش وما نديرش وانا علاه ما تشريليش هادي

المهم

مؤخرا كنت قاعدة معاه ونكونيكتي فالجلفة
سقسيتو على نيتي نوغمال اسكو عرف وحدة قبلي وانا فالحق كنت نقرى في موضوع مشابه كي شغل سهيت

ومنبعد قالي ياخي قتلك من قبل ضحكت وقتلو اش قتلي بالاك كشما خبيت بالضحك طبعا
قالي كون نقولك تنضري
انا هنا تقول عطاوني بكف
قتلو درك تقولي
تنهت تنهيتة كبيرة وقالي حبيت وحدة قبلك مي ماليا عفسولي فيها وعينيه تغرغرو بالدموع قالي ماليا ماعلابالهومش بلي حبيتها حسبالهوم غير هاكدا
وانا فالحق ماليه كانو يظلو يغيروني بالبنات يكذبو مي جامي جبدو على هادي الطفلة

انا تقول موس عطاوني نيه
بديت نبكي ونقولو كدبت بيا وانا لي حبيتك ولي ولي وانت حبي الاول
المشكل قالي مانسيتهاش ومزالها في قلبي وهي لي تمنيتها تكون مرتي ودور في داري

ما فهمت وال حسيت فمي نشف وحكمتني الدوخة
قتلو انا عشرة تاع 3 سنين تروح باطل ما نسيتكش قالي شوية وباين متاثر
المهم داوست معاه وقتلو طلقني قالي ما نقدرش باسكو نتي ثان نحبك وما نقدرش نعيش بلا بيك

للعلم زوجي طلباتي اوامر ليه يجيبلي كلشي ويحن عليا بزااااااف بزااااااف
وقالي كلام قاسني بزاف كي كثرت عليه وانبتو

قالي ندمت عالزواج وقالي ما نقدرتش نطلقك تغيضيني وين تروحي
وقتلو علاش ما حبستش فالخطوبة
باسكو انا علاجال الظرف كنت قتلو نحبسو مي هو بقى متمسك وقالي مستحيل

ودركا قالي باسكو كنتي غايضتني
وعلابالو بلي انا ما نحبش لي يشفق عليا

من هاذاك النهار انا ولات مشاعري مخلطة وما عرفتش واش ندير
وليت نشك فيه
قلت بالاك تلاقاها اووووووو
ووليت نداوس معاه بزاف باسكو ما تقبلتش المشكل
وزيد انا غيرتو قتلو انا تاني خطبني بزاف وهاد الشي علابالو بيه ويعرفهم مليح وكاين لي بكاو عليا وعاودو جاو سنين وهوما يحوس عليا وواحد صحبو انتيم دركا راهو متزوج تزوج مورايا
وواحد خطبني من عندو

انال غيرتو بصاحبو مالغري ماكانش عندي مشاعر اتجاهو قتلو بلي انا تان الظرف منعتني وكان عاجبني وطاحتلي الدمعة كي رفضتو وقتلو اصلا مرتو جابها تشبهلي
الوغ غار وزعف
ودركا لمحلي باش ما نروحش نهني مرتو كي زيدت باسكو راجلها كان مصر باش تتعرف عليه، وزوجي حسب لحساب


المهم مؤخرا راجلي رجع ما يهدرش بزاف
وديما يقولي تهدري بزاف
ماشي رومنسي كي شغل يتجاهلني

وحسيتو بلي يشربني يوكلني ويلبسني فقط
كي قتلو يسكت ويقولي الله يهديك انتي تتحسسي وما يجاوبش

فهموني زعما صح ما يجبنيش

وخطرة على خطرة يقولي حنا بيناتنا المكتوب برك
وما تحصي المكتب منا للفوق الدنيا طويلة

حسيتو راهو ينتقم مني ويادبني بطريقتو هو

فهموني خاصة الرجال واش رايكم
وهل صح قادر الراجل يعيش مع مرا بدافع الشفقة برك

ويبقى يحب حبو الاول

وقالي بلي نوغمالمن تحسي بيا الله غالب القلب واعر
انتي شوفي كي انا حبك الاول هادا قبل ما نقولو على صاحبو

وانا راني مصرة باش نزور مرت صاحبو؟؟؟

فهموني كيفاش ندير
راني خايفة نخرب داري ما نعرفش نتصرف

خاصة مؤخرا شكى لزوج اختي مني قالو بلي صغيرة فهمها
مي ماحكالوش الموقف
وانا ماقدرتش نفهم اختي خفتهم يدخلو
فهموووووني ارجوكم

[MaX32Dz]

عذرا لكن
بينزوج ذراري في عقلكم و لوكان جات ليا مانخليكمش تتزوجوا
الحل هو أنكم تترفعوا على هذي التفاهات و راكم ازواج تنظروا للمستقبل

ماشي تنبشوا فالماضي و تزعفي لاخاطرش أحب وحدة قبلك ، واش ذنبو هو أنه حب وحدة قبلك أو العكس ؟
فكروا أنه هناك أولاد أنتم مقبلون على تربيتهم

[مراد سابقا]

انت زوجك كان يعاملك بطيبة واش زاك للهدرة هذي انتاع ماضيه ..................الخ

ربي يهديك

انت لنوضتي فيه ألأحاسيس هذو ولا يكرهك

زيدي انت راكي صغيرة في يالعمر

لو كان كنت كبيرة

ورزينة راكي متجبديش الحكايات هذو

ولو كان لا قدر الله قالك انا الطفلة هذي فعلت معاه هكذا وهكذا

كيف يكون موقفك يومئذ

الخلاصة مادام زوجك طيب معك

لا تنبشي في الماضي

[الصديق قروف]

لاتذهبي الى زوجة صديقه
واش حابة عندو ؟
راح تخربيلي دارو
ولا تسقسي مرتو كيما زوجك ؟

[hodayena]

اختي الكريمة عاودي ردي زوجك ليك وهني مخك وحياتك فتحتي عليك باب جهنم بلا متفيقي والشيطان صاب ثغرة باه يدخل بيناتكم
روحي اشري حاجة لراجلك وديري عشاء وقوليلو منروحش وانت حب حياتي ومكانش الي يدي بلاصتك وبركاو من اللعب تع بليس

[ensberg jupi]

الزوج و الزوجة في فترة الخطوبة يتفاهمان بعد ذلك اذا كتب المكتوب كما نقول خلاص لماذا هل حبيت هل عرفت هذه الاسئلة يجب طرحها من الاول ثم يا اما ان تقبليه بماضيه او لا لكن النبش يؤدي الى الهدم فقط اذا يقولك لا تقولي ماكاش منها اذا يقولك نعم تولي في الحالة التي انت فيها

[سدرةالمنتهى]

ربي يفرج عليك اختي حاولي تتجاهلي الموضوع واخطيك من تنباش نتع الماضي راح تجيبي البلا لروحك فقط

[knives66]

كي تطلقي وين تروحي ؟؟

مجتمع ما يرحمش وزيد عندك طفلة خممي ملي أبنتي طلاق موش ساهل

خلاص فات مات ضورك حبها ما حبها كذب عليك هذيك يخلصها عند ربي

انت ضورك خمي في روحك وفي بنتك

مدام راه حنين معاك اربحه وحولي تنساي موضوع حبيبتوا لقديمة لانوا مراح يفيدك بولوا

هو حتي بعد طلاق راح يزوج وانت اروحي ولقي ليزوج بيك

يو خطكم من هذا العقلية وجياحة انساء رنا 2015


روحي اطلبي سماح رقلي روحك معاه أنساي موضوع ومن حقك تطلبي تعويض على كذبا

وانا نقولك والله انت الخاسرة في موضوع كل

[نورالهدى بيولوجيست]

هاذي من اهم نتائج الزواج من مولات ال20 اللي مازالت حتى م مرتبة افكارها

نتي المفروض يكبروك قبل حتى تنضجي صدقيني ظلموك كي زوجوك

كي تكبري و تنضجي تفهمي باللي راكي غااااااااااااالطة يا وخيتي

مش قادرة نخاطبك بأكبر من هاذي الهدرة لأنك مش رايحة تفهميني

تهلاي في راجلك و احمدي ربي عليه و اخطيك ماتخربي في دارك

بنتيلي عنيدة في هدرتك و العنااااد اكبر عدو للعلاقة الزوجية

ربي يوفق بيناتكم اسمحيلي على القسوة لكن عاااااااودي روحك

[3ab2ou]

المهم الله يسهل و المجتمع او ميرحمش.

[Ayad3]

أنصحك للرجوع لزوجك ونسيان ما حدث وأنصحك بالابتعاد عن ذكر الماضي فلتعلمي أن لكل انسان ماضي ليس بالضرورة التكلم عنه لزوجته لأن مهما كانت درجة المودة ين الأزواج هاته الأمور تعكر الجو وتشجع على نمو أمر خطير جدا و هو الشك فحذاري حذاري اتقوا الله وعودوا الى جادة الصواب فياما بيوت دمرت وكان مصيرها الفناء والطلاق بسبب هاته التصرفات غير المقبولة أنظروا للمستقبل و دعكم من الماضي

[oprah]

أعرفي تكسبي راجلك
متكثريش عليه الهدره متنسايس الهدره للنسا مي الراجل يكره و يمل
قادره تنسيه في هاديك البنت و ركزي باش تنسيه و تخليه يموت عليك ماشي تخمي بلي انا صغيره نورمالمو يموت عليا
المعامله ركزي عليها و انساي المشكاكل نتضليش تكسريلو في راسو
خمي يا طفله رايحه تخربلي دارك بتفاهات

[staifia]

وانت علاه تعاودي تنبشي في الماضي
هو مش حق عليه يقلك وًشكون كان يحب هذه اي بنت لما يقولها زوجها ولا خطيبها انو كان يحب من قبل رايحة تعيش في كابوس
واقعدي هني روحك ماتروحي لا عند مرت صاحبو ما والو
حاولي تنساي لي صرا وضرك تحكمي في راجلك وحاولي تخليه يحبك

[الألماسة]

يا طفلة انعلي ابليس و اخطيك من القيل و القال
واش داك للمرت صاحبو و صاحبو و اللي خطبك و اللي خطيها؟؟؟؟؟؟
اللي فات خلاص انسوه و شوفي للمستقبلك
و اخطيك من جمايع النسا
و اتهلي في دارك و راجلك و بنتك
راكي في نعمه

[amel03l]

اتهلاي في راجلك و حمدي ربي ماراهش حاقرك و راهو واقف معاك malgré صرعتيه بحكايات النسا و سلافاتك و لوساتك ..انا امراة و لوكان ديما تحكي و تشكيلي نكره ..راهو مساعفك و صابر عليك...لازم تكبري شوية و تنضجي شوية راجل مالازمش طول نهار تشكيلو على اهله ..و زيد -اسمحيلي -مي هذه جياحة تاع تروحي عند دار صحبو-وتقوللو حبيتو هبلتي و الا واش بيك احمدي ربي ماعطاكش زوج كفوف -واش هده الهدرة الزايدة و زيد علاش تسقسيه ادا حبيت !!و شكون حبيت!! ماكاش انسان ماحبش .كيما قالك هذا قلب ..اه لوكان جيتي اختي نديرلك حالة..يا اختي راني قاسية معاك و لكن نقولك خفي صلحي الموقف و سقمي روحك و اكبري و خليك من الجياحة و على 5 سنين او 10 تفيقي بلي كنتي تجياحي و اياكي و تخربي بيتك و انتي الغالطة 100 ب 100